Jabuuroolu 99:3 - Mandinka Bible

³ Batu ì ye a jayi a too la, a too silaŋñaa warata le. Yaawe seneyaata le!

Jabuuroolu 99:3 Mawu Ofanana

Nehemiya 1:5

N kumata ko: “M Maarii Yaawe*, Arijana Maarii, Mansa Baa, Alla meŋ ñaasilaŋo warata, i ka kambeŋo niŋ kanu bambaloo muta moolu ye le, mennu ye i kanu, aduŋ ì ka i la yaamaroolu muta.

Nehemiya 4:14

Kabiriŋ ŋa ñiŋ kuwolu koroosi, n wulita ka diyaamu ñaatonkoolu, alifaalu, aniŋ moo toomaalu ye. N ko ì ye le ko, “Ali kana sila ì la. Ali hakiloo ye bula Maariyo la, meŋ warata, aduŋ a ñaasilaŋo warata. Ali si keloo ke ali baadiŋolu ye, ali dinkewolu, ali dimmusoolu, ali la musoolu, aniŋ ali la suwolu.”

Nehemiya 9:32

“Wo to, m̀ Maarii Alla, ite le warata, i semboo warata, aduŋ i ñaasilaŋo warata le. Ite meŋ ka i la kambeŋo muta niŋ kanu bambaloo la, bataa kuwo kana dooyaa i ñaa koto, meŋ laata ǹ kaŋ, ǹ niŋ ǹ na mansoolu, maralilaalu, piriisoolu*, annabiyomoolu, m̀ mumuñolu, ka taa i la moo toomaalu bee, ka bo Asiriya mansoolu la waatoo la, ka naa bula bii la.

Nehemiya 9:5

Bituŋ Lewi lasiloo moolu mennu keta Yesuwa ti, Kadimiyeli, Bani, Hasabuneya, Serebiya, Hodiya, Sebaniya, aniŋ Petahiya ko: “Ali wuli ka Yaawe, ali la Alla tentu, badaa-badaa Alla. Ali tentoo dii a too buuñaariŋo la, tenturoo niŋ jayiroo te a la waroo daŋo fo noo la ñaa-wo-ñaa.”

Jabuuroolu 100:4

Ali niŋ jayiroo ye duŋ niŋ a Batudulaa Buŋo* daa la, ali niŋ tenturoo ye duŋ a la luwo to, ali ye a jayi, ali ye a tentu niŋ a too la.

Jabuuroolu 103:1

Nte niyo be Yaawe* jayi la le. Ka bo niŋ n sondomoo bee la, m be a too senuŋo jayi la le.

Jabuuroolu 111:9

A ye a la moolu kiisa le, aduŋ a ye yaamaroo dii le ko, a ye a la kambeŋo londi le fo abadaa. A too seneyaata le, aduŋ a kuliyaata.

Jabuuroolu 145:17

Yaawe tilinta a kekuwolu bee le to, a ka balafaa yitandi a la keroolu bee to.

Jabuuroolu 66:3

Ali Alla jayi ka a fo a ye ko, “I ka kuwolu mennu ke, ì kaawakuuyaata le. I semboo warabaata le, a ye a tinna le i jawoolu ka kiripa i koto.

Jabuuroolu 76:1

Yahuuda moolu ye Alla loŋ ne, a too warata Banisirayila kono le famfaŋ.

Jabuuroolu 76:12

Ate le ka maralilaalu la faŋ waroo daŋ, a ka duniyaa mansoolu kijabo.

Yesaya 6:3

Ì tarata a fo la ñoo ye le ko, “Seneyaa, seneyaa, seneyaa be Yaawe* Alihawaa Maariyo* le fee. Duniyaa bee be faariŋ a la semboo niŋ a la waroo le la.”

Yeremiya 20:11

Bari ite Yaawe be loo la n ye le ko kelejawaroo meŋ silaŋñaa warata. Wo to n toorandilaalu be boyi la le, ì te i kutu la n na. Ì be malu la baake le, kaatu ì te kututeyi la. Ì la maloo be tu la le fo abadaa, a te ke la ñina kuu ti.

Yohana 17:11

“Saayiŋ, n ka naa ite le yaa, nte maŋ tara duniyaa kono kotenke, bari itolu be duniyaa kono le. M Faamaa Senuŋo, ì tankandi ka bo niŋ i too semboo la, i ye meŋ dii n na, fo itolu si ke kiliŋ ti, ko ntolu mu kiliŋ ti ñaameŋ.

5 Musa 28:58

Ali si ali hakiloo tu ka ñiŋ luwaa kumakaŋolu bee muta, mennu be safeeriŋ ñiŋ kitaaboo kono, fo ali si Yaawe ali la Alla too senuŋo horoma, meŋ kallankeeyaata*.

5 Musa 7:21

Wo kamma la, ali kana sila ñiŋ moolu la. Yaawe ali la Alla be ali fee le, a warata le, aduŋ a silaŋñaa warata.

Yosuwa 24:19

Yosuwa naata a fo ñiŋ moolu ye ko, “Ali te Yaawe batu noo la, kaatu ate mu Alla Senuŋ Baa le ti! A te yamfa la ali la baara jawoolu la, aniŋ ali la junuboolu. Alla kiiliyaata le.

Lankenemoo 4:8

Wo daafeŋ baluuriŋ naanoo, ì meŋ-wo-meŋ ye dampaŋ wooro le soto. Wo dampaŋolu be faariŋ ñaalu le la, ì kara fuloo bee. Suuto tili, ì nene maŋ i dahaa ñiŋ jayiroo la ko: “Seneyaa, seneyaa, seneyaa be Maarii Alla Tallaa le fee, ate meŋ be keriŋ nuŋ, meŋ be keriŋ, aniŋ meŋ be naa la.”

1 Samuweli 2:2

Senuŋ Baa te jee Yaawe koolaa, kiliŋ te jee meŋ be ko ite. Semberaŋ beroo te jee, meŋ be ko ǹ na Alla.