Hoseya 9:10 - Mandinka Bible

¹⁰ Yaawe ko: “Biriŋ ŋa Banisirayila je foloo-foloo, a munta le nuŋ ko, ŋa wayini yiridiŋo le je keñewuloo* kono. Biriŋ ŋa ali mumuñolu je, a be le nuŋ ko, ŋa sooto diŋ kuŋ foloolu je. Bari biriŋ ì naata Pewori Konkoo to, ì ye ì faŋ dii Baali* jalaŋo la. Ì keta moo ñewundiŋolu ti, ko ì la jalaŋ ñewundiŋolu, ì ye mennu kanu.

Hoseya 9:10 Mawu Ofanana

1 Mansoolu 16:31

A mulunta le ko, ka taama Nebati dinkewo Yerobowamu la junube sila kuruŋo la maŋ kaañaŋ a fee, bari a ye Yesebeli futuu le, Mansa Etibaali Sidoninkoo dimmusoo, aniŋ ka taa Baali* jalaŋo batu, ka sujudi a ye.

2 Mansoolu 17:11

Ì ye cuuraayoo siisindi batudulaa tintiŋolu* bee to le, komeŋ wo moolu ka a ke ñaameŋ, Yaawe ye mennu bayi ka ì fintindi ì ye. Ì ye kuu jawoolu le ke, mennu ye Yaawe kamfandi.

Jabuuroolu 115:8

Mennu ye ì dadaa, ì fanaa si ke wo ñaama, aniŋ mennu bee laata ì la.

Jabuuroolu 81:12

Bituŋ ŋa ì tu ì la sondome jaa kaŋ, ka bula ì fansuŋ yaamaroolu nooma.

Suukuwo 3:6

Muŋ ne ka naa teŋ, ka bo naŋ keñewuloo* kono, ko siisii samasimmaa? A ka seera ko miiri* aniŋ cuuraayoo, ko juloolu la seerandi feŋ munkumaalu.

Yesaya 28:4

Saatewo la sapuraŋo meŋ be looriŋ konkoo kaŋ, wulumbaŋ jambandiriŋo daala, be ke la le ko firi nororiŋo. A be muluŋ na le ko sooto juunoo, niŋ moolu ye a je doroŋ, ì ka tariyaa le ka a kati.

Yeremiya 11:13

Ì la jalaŋolu be siyaariŋ ne ko ì la saatewolu. Wo Baali* jalaŋo meŋ na kuwo mu malu baa ti, ì ye cuuraayi siisindidulaalu mennu loo a ye, ì siyaata le ko Yerusalaamu mbeedoolu.”

Yeremiya 24:2

Sinsiŋ kiliŋo, sooto kendemaa baalu le be wo kono, komeŋ sooto juunoolu, bari sinsiŋ doo, sooto tiñaariŋolu le be wo kono, mennu tiñaata fo ì te domo noo la.

Yeremiya 3:24

Ka bo biriŋ ǹ dindiŋ, ñiŋ malu kuwo, Baali* jalambatoo ye m̀ fondi m̀ mumuñolu la kata kuwolu la le, baalu niŋ saajiyolu, aniŋ ninsoolu, ka taa dinkewolu niŋ dimmusoolu.

Yeremiya 3:25

Ǹ ñanta le ka n laa duuma maloo kono, ǹ na dooyaa ye muuri ǹ kaŋ. Ŋà junuboo le ke Yaawe ǹ na Alla la, ntolu niŋ m̀ mumuñolu bee, ka bo biriŋ ǹ dindiŋ ka naa bula bii la. M̀ maŋ Yaawe ǹ na Alla la kumoo muta.’ ”

Yeremiya 31:2

Yaawe ye wo le fo ko: “Moolu mennu kanata hawusaroo* la faaroo ma, ŋa hiinoo soto ì ye keñewuloo* kono le, tuma meŋ ì be dahaa ñiniŋo la.”

Yeremiya 5:31

Annabiyomoolu ka faniyaa kumoolu le fo, piriisoolu* ka ì fansuŋ kaŋo le taamandi, aduŋ n na moolu ye wo le kanu. Bari ali be ke la ñaadii le kuwo labandulaa to?”

Esekiyeli 20:8

“Bari ì muritita m ma le, ì balanta ka n lamoyi. Hani moo kiliŋ ne maŋ soŋ ka a koo dii Misirankoolu la wo jalaŋolu la, waraŋ ka a la wo batufeŋ haraamuriŋolu fayi, ì ka ì jikoo loo mennu kaŋ ka ì batu. Bituŋ m pareeta ka n na kamfaa bee jindi ì kaŋ naŋ ka ì mantoora Misira bankoo kaŋ.

Hoseya 11:1

Yaawe* ko: “Biriŋ Banisirayila la dindiŋyaa waatoo le mu, ŋa a kanu. Ka bo Misira, ŋa n dinkewo kili naŋ.

Hoseya 13:5

Nte le ye ali topatoo keñewuloo* kono, wo banku jaaroo to.

Hoseya 2:15

Wo koolaa, m be a la wayini yiri kankaŋolu murundi la a ma le, ŋa Akori Wulumbaŋo ke jikoo bundaa ti. Jee to, a be soŋ na m ma le, ko a la fondinkeeyaa waatoo la, ko waatoo meŋ, a bota naŋ Misira.”

Hoseya 4:14

N te ali dimmusoolu jarabi la, niŋ ì ye cakayaa ke, n te feŋ ke la ali bitammusoolu fanaa la, niŋ ì ye jeenoo ke. Kaatu kewolu faŋo le niŋ jalaŋ batudulaa cakoolu ka taa kara la, ì niŋ ì ka beeyaŋ sadaalu bo jalaŋ batudulaa to. Hakilintaŋolu ka kasaara teŋ ne.

Hoseya 4:18

Ì la dolo miŋ baa koolaa, ì la niidiyaa ka ke cakayaa le ti, ì ka lafi malu kuwo le la diina horomoo ti.

Amosi 4:5

Ali ye ali la mbuuru leweñimaa fanaa jani ka ke Alla tenturulaŋ sadaa ti. Ali ye ali la fankadaŋ sadaa laa a kaŋ ka kibiri a la, fo moolu bee ye a moyi. Kaatu ali ka lafi a la wo le ñaama.” Maarii Yaawe le ye a fo.

Mika 7:1

Nte la kuwo be balafaa le daa to! N na kuwo ka muluŋ ne ko moo meŋ, a be lafiriŋ yiridiŋ katoo la, a be lafiriŋ wayini* karaŋo la wayini kankaŋo to, bari hani feŋ maŋ tu jee, a be meŋ faŋo domo la, sooto kumfoloolu to hani feŋ te jee, a si lafi meŋ na.

4 Musa 15:39

Ñiŋ jimfiroolu le be ke la ali ye hakilibulandiraŋo ti. Niŋ ali ñaa boyita ì kaŋ waati-wo-waati, ì si kali ali hakiloo murundi nte Yaawe la yaamaroolu kaŋ ka ì muta. I si a je ali te ali koo dii la n na ka bula ali la niidiyaa nooma, aniŋ marisa feŋolu.

4 Musa 18:13

Bankoo fiifeŋ kuŋ foloolu ì ka mennu bee samba naŋ nte Yaawe ye, be ke la i taa le ti. Moo-wo-moo be i la dimbaayaa kono, niŋ a seneyaata, a si ì domo noo le.

Roomankoolu 6:21

Kuwolu, ali ye mennu baara wo waatoo la, aduŋ ali maluta ì la saayiŋ, wolu ye muŋ joo le saabu ali ma? Wo kuwolu labaŋo mu saayaa le ti.

5 Musa 32:10

A ye ì tara keñewuloo* le kono, a ye ì je dulaa le to, feŋ te daameŋ fo daafeŋ saŋaroolu kumakaŋo. A ye ì sansaŋ, a ye ì hati, a ka a hakiloo tu ì to, ko moo ka a hakiloo tu a ñaakesoo to ñaameŋ.

5 Musa 32:17

Ali ka sadaalu* bo seetaanoolu ye, ì maŋ ke Alla ti, alloolu, ali nene maŋ mennu loŋ, alla kutoolu, mennu finti waatoo maŋ mee, ali mumuñolu nene maŋ sila mennu la.

5 Musa 4:3

Ali bee ñaa seedeyaata moolu la le Yaawe ye mennu faa ali kono, waati meŋ na ì ye Baali* jalaŋo batu Pewori Konkoo to.

Kiitindirilaalu 6:32

Ka bo wo luŋo la, ì ka Kideyoni kumandi Yerubaali fanaa la le, meŋ kotoo mu ñiŋ ti, Baali si i joo a maarii to meŋ ye a la sadaabodulaa tiñaa.