Hoseya 4:3 - Mandinka Bible

³ Wo le ye a tinna bankoo be kumboo kaŋ, a siilaalu be koririŋ, ì niŋ wulakono daafeŋolu niŋ kunoolu, hani baakono ñewolu be kasaara kaŋ ne.”

Hoseya 4:3 Mawu Ofanana

Yesaya 33:9

Bankoo be sunu la le komeŋ hadamadiŋo, a ye tiñaa. Hani Libanooni yiri sutoolu be malu la le, ì ye jaa. Saroni kunku betoolu be muluŋ na le ko keñewuloo*, Basani niŋ Karimeli yiroolu bee be ì jamboolu joloŋ na le.

Yeremiya 12:4

Ñiŋ bankoo be tara la jaariŋ fo janniŋ muŋ tuma, kenoolu bee ñaamoo ye tara nororiŋ? Moolu la kuruŋyaa kamma la, mennu be siiriŋ a kaŋ, daafeŋolu niŋ kunoolu bee le turutumbunta. Bayiri moolu ka a fo le ko, “A te a je la kuu ye ke ntolu la.”

Yeremiya 23:10

Bankoo kaŋ be faariŋ jeenelaalu le la, ì ye a tinna bankoo dankata, fo bankoo faŋo ka woosii, aduŋ a beeyaŋ daañini dulaalu jaata. Ì taañaa jawuyaata le, aduŋ ì ka ì semboo taamandi tilimbaliyaa le kono.

Yeremiya 4:25

Ŋa juubeeroo ke le, ŋa a je hadamadiŋ te jee, hani kunoolu bee yeemanta le.

Yeremiya 9:10

M be kumboo la le ka lemba konkoolu ye, ŋa beeyaŋ daañini dulaalu la kuwo saŋawoosii, kaatu ì jaata le ka kenseŋyaa, hani moo buka tambi niŋ jee la, ninsi kumakaŋ buka moyi jee. Kunoolu borita jee la le, aniŋ wulakono daafeŋolu.

Yeremiya 9:9

Fo m maŋ ñaŋ na ì jarabi la ñiŋ kuwolu la baŋ? Fo m maŋ ñaŋ na juloo joo la ñiŋ banku siifaa to baŋ?” Yaawe le ye a fo.

Esekiyeli 38:20

Ñewolu mennu be baa kono, kunoolu mennu ka tii santo, daafeŋolu mennu bee be wuloo kono, kuruntu feŋolu mennu bee ka kuruntu bankoo kaŋ, aniŋ moolu mennu bee be duniyaa kono, ì bee be jarajara la n ñaatiliŋo la le. Konkoolu be boyi la duuma, tintiŋolu bee be fotiŋ na ka jurumi naŋ duuma, aduŋ tata sansaŋolu bee be boyi la bankoo to le.

Yoweli 1:18

Beeyaŋolu ŋuntaŋñaa! Ninsi koorewolu ka yaayi, kaatu ì maŋ daañini dulaa soto, hani saajii koorewolu faŋo be toorariŋ.

Amosi 1:2

Amosi ko, “Yaawe* kamfaatoo daalita Siyoni* Konkoo kaŋ Yerusalaamu, komeŋ niŋ jatoo bumbunta. Beeyaŋ daañini dulaa ñaamoo bee jaata, Karimeli Konkoo kaŋ bee norota.”

Amosi 5:16

Yaawe Alihawaa Maariyo ye ñiŋ ne fo ko: “Jamaa bendulaa daa-wo-daa, lemboo le be tara la jee. Mbeedi-wo-mbeedi kaŋ, saŋakumboo le be tara la jee. Hani samaadoolaalu, ì si ì kili ka naa saŋakumboo la, aniŋ saŋawoosiilaa baalu ka lemba.

Amosi 8:8

Ñiŋ baara jawoolu kamma la, duniyaa si jarajara, duniyaa moolu bee ye woosii. Bankoo bee si jarajara, a si jiijaa ko Nayili baajiyo ka ke ñaameŋ meŋ be Misira.”

Nahumu 1:4

A si baa yaamari a ye jaa, a ye boloŋolu bee fanaa jandi, Basani la beeyaŋ daañini dulaa kendoolu ye noro, aniŋ Karimeli yiroolu, Libanooni fiifeŋ firoolu ye jiraŋ.

Sefaniya 1:3

Hadamadiŋ wo, beeyaŋ wo, kunu wo, ñee wo, m be ì bee le bondi la duniyaa kono, ŋa moo kuruŋolu la kuwo jindi. M be hadamadiŋolu bee le kasaara la. Nte Yaawe le ye a fo.

Jakariya 5:4

Yaawe* Alihawaa Maariyo* ko, ‘Ŋa yankankatoo ñiŋ bula naŋ ne ka duŋ suŋolu la buŋo kono, aniŋ meŋ-wo-meŋ ka i kali n too la faniyaa kaŋ. A be tara la wo maarii la buŋo kono le ka a bee kasaara, hani a beroolu niŋ babaroolu.’ ”