Efesusinkoolu 1:6 - Mandinka Bible

⁶ fo ǹ si a jayi a la hiinoo la meŋ kallankeeyaata*, a ye meŋ dii ǹ na ka bo niŋ a Kanu Dinkewo la.

Efesusinkoolu 1:6 Mawu Ofanana

Jabuuroolu 22:20

N niyo tanka n jawoolu la hawusaroo* ma. N niyo tanka ñiŋ wulu saŋaroolu ma, ŋa nii kiliŋo meŋ soto.

Jabuuroolu 60:5

Ǹ na duwaa jaabi, ǹ kiisa i ye ǹ deemaa ka bo niŋ i bulubaa buloo la, ñiŋ kamma la i la kanu moolu si tanka.

Kuma Kotoomaalu 16:4

Yaawe ye feŋolu bee daa daliiloo le kamma, hani moo jawoo be a fansuŋ luŋo soto la le.

Yesaya 42:1

Yaawe* ko: “N na dookuulaa fele, ŋa meŋ na kuwo bambandi. Ŋa ate le tomboŋ, aduŋ a la kuwo ye n seewoo le. M be n na Nooroo jindi la a kaŋ ne, aduŋ a be kiitii tilindiŋo naati la bankoolu kaŋ ne.

Yesaya 43:21

m faŋo ŋa n na moolu mennu daa, fo ì si n jayi ka a janjandi taariŋ.

Yesaya 61:11

Saayiŋ m Maarii Yaawe be a ke la le, tiliŋo niŋ jayiroo ye naa bankoolu bee kaŋ, ko fiifeŋ kesoolu ka faliŋ naakoo kono ñaameŋ, aniŋ ko bankoo ka fiifeŋ mereŋo so semboo la ñaameŋ.

Yesaya 61:3

ka moolu maakoyi mennu be kumboo la Siyoni*, ka ñaroolu dii ì la, seebuutoo noo to, ka ì jusoo landi tulu seera diimaa la, wo ye seyi woosiyo noo to, jayiroo warambamaa ye seyi nii fitiyo noo to. Ì la tiliŋo ye semboo soto ko yiri baalu, Yaawe ye mennu tutu ka a la kallankeeyaa* yitandi.

Yeremiya 23:6

A la waatoo la Yahuuda be tankandi la le, aduŋ Banisirayila be tara la sabatiriŋ tankoo le kono. Ì be kali a kumandi la ñiŋ too le la: Yaawe le mu ǹ ye Tiliŋo ti.

Yeremiya 33:9

Ñiŋ Yerusalaamu saatewo too si ke n ye seewoo ti, duniyaa banku koteŋolu bee ye n jayi, ka n horoma baake, niŋ ì ye a moyi nte ye kuu kendoo meŋ bee ke ñiŋ saatewo moolu ye. Wo moolu be kuu kendoo niŋ firiŋo je la le, ŋa meŋ dii ñiŋ saatewo la, fo ì ye sila ka jarajara.

3 Musa 15:15

Piriisoo si ì bondi sadaa* ti, a ye kiliŋo bondi junube kafarilaŋ sadaa ti, a ye kiliŋ doo bondi jani sadaa ti. Piriisoo be seneyandiroo saabu la a maarii ye teŋ ne, nte Yaawe ñaatiliŋo la.

Jakariya 13:7

Yaawe Alihawaa Maariyo ye ñiŋ ne fo ko: “Hawusari*, kuniŋ i ye wuli n na kantarilaa kamma, wuli a kamma, n na moo sutuŋo le mu. A seyi, saajiyolu ye janjaŋ. Hani domandimmaalu faŋo, m bulu be laa la ì kaŋ ne.”

Matiyu 17:5

A be diyaamu kaŋ doroŋ, minaayi koyiriŋo fer ye ì muuri. Kumakaŋo naata bo wo minaayoo kono ko, “Ñiŋ ne mu n Kanu Dinkewo ti, n jusoo laata meŋ na kuwo la baake. Ali i lamoyi a la.”

Matiyu 20:9

Kabiriŋ lebereesoolu naata, a ye mennu taa talaŋ luulu maafaŋo la, ì meŋ-wo-meŋ ye denaari kiliŋ ne soto.

Matiyu 3:17

Bituŋ kumakaŋo naata bo saŋo santo ko, “Ñiŋ ne mu n Kanu Dinkewo ti, n jusoo laata meŋ na kuwo la baake.”

Luka 2:14

“Semboo niŋ waroo be Alla ye, Arijana dulaa jamfariŋ baa to. Kayiroo be duniyaa moolu fee, Alla kontaanita mennu la kuwo la.”

Yohana 10:17

“M Faamaa ye n kanu le, kaatu ŋa n niyo le laa fo n si a taa kotenke.

Yohana 3:35

Faamaa ye a Dinkewo kanu le, aduŋ a ye feŋo bee duŋ ate le bulu.

Roomankoolu 8:1

Wo to saayiŋ, halakoo te moolu ye kotenke, mennu be Kiristu* Yeesu kafuñooyaa kono,

2 Korintinkoolu 4:15

Kaatu ñinnu bee ka ke ali la nafaa le kamma, fo Alla la hiinoo si futa moo jamaa ma, ka tenturoo lafaa, ka horomoo dii Alla la.

2 Korintinkoolu 5:21

Kiristu meŋ nene maŋ junuboo ke, Alla ye ǹ na junuboo dunoo laa ate le kaŋ, fo ǹ si Alla la tiliŋo soto Kiristu kono.

Efesusinkoolu 1:12

Ntolu mennu foloo ye ǹ jikoo loo Kiristu kaŋ, si a jayi a la semboo niŋ waroo kaŋ.

Efesusinkoolu 1:14

wo mu sankayaaraŋo le ti fo waatoo meŋ, m̀ be ǹ na keetaa soto la, meŋ mu kiisoo ti Alla la moolu ye, fo a la semboo niŋ waroo si jayi.

Efesusinkoolu 1:18

Allamaa ali sondomeñaalu ye maloo soto, fo ali si jikoo loŋ, a ye ali kumandi meŋ kaŋ, aniŋ ali si a la keetaafeŋ kallankeeyaariŋo la waroo loŋ, a ye meŋ soto moo senuŋolu ye.

Efesusinkoolu 2:7

A ye ñiŋ bee ke le, fo a la hiinoo la fanka baa aniŋ beteyaa, a ye meŋ soto ǹ ye Kiristu Yeesu kafuñooyaa kono, si yitandi jamaanoolu bee la, mennu be naa la.

Filipinkoolu 1:11

Ali si faa niŋ tiliŋo la, meŋ ka daajika betoo saabu, ka bo niŋ Yeesu Kiristu la, Alla la horomoo niŋ jayiroo ye.

Filipinkoolu 3:9

aniŋ ka tara a fee. Wo to m maŋ tiliŋo soto noo m faŋo la katoo la meŋ ka bo niŋ Luwaa mutoo la, bari ŋa tiliŋo le soto, meŋ ka soto niŋ lannoo la Kiristu kono. Ñiŋ tiliŋo ka bo Alla le bulu, aduŋ a be dendiŋ lannoo le la.

Filipinkoolu 4:19

Aduŋ n na Alla, fanka jamaa be meŋ bulu, a be ali la suuloolu bee topatoo la le, ko Kiristu Yeesu la semboo niŋ waroo be ñaameŋ.

Kolosankoolu 1:13

Ate le ye m̀ bondi diboo semboo bulu, a ye ǹ samba a Kanu Dinkewo la mansabaayaa to,

1 Pita 2:5

Ali ali faŋolu dii ka ke bere baluuriŋolu ti, fo ali si ke buŋ looraŋolu ti Alla la buŋo ye, meŋ loota a la Nooroo la siloo la. Alitolu si ke piriisi* senuŋolu ti, ali ye sadaalu* bo Nooroo la siloo la, ka bo niŋ Yeesu Kiristu* la, aduŋ Alla be soŋ na wo sadaalu ma le.

1 Pita 2:9

Bari alitolu mu moo tombondiŋolu le ti, aniŋ Mansa la moolu, piriisiyaa be mennu bulu. Ali mu nasiyoŋ jankuriŋo le ti, Alla fansuŋ moolu. Ali mu ñinnu bee le ti, fo ali si a la kebaaroolu la waroo bankee, meŋ ye ali kumandi ka bo diboo kono, ka naa a la mala kaawakuuyaariŋo kono.

1 Pita 4:11

Moo meŋ ka kawandoo ke, a si a ke ko, a ka Alla faŋo la kumoolu le kawandi. Meŋ ka maakoyiri dookuwo ke, a si a ke niŋ semboo bee la, Alla ye meŋ dii a la, fo Alla si horoma kuu-wo-kuu to, ka bo niŋ Yeesu Kiristu la. Semboo niŋ waroo aniŋ maraloo bee be ate le ye, fo abadaa. Amiin.