Daniyeli 9:5 - Mandinka Bible

⁵ Ŋà junuboo ke le, ŋà kuu kuruŋo ke, ŋà hakoo soto baake le, aduŋ m̀ balanta i ma le, ŋà ǹ koo dii i la yaamaroolu la, aniŋ i la karandiroolu.

Daniyeli 9:5 Mawu Ofanana

2 Mansoolu 18:12

Ñiŋ keta le kaatu ì maŋ Yaawe, ì la Alla la kumoolu muta. Ì ye a la kambeŋo tiñaa le, aniŋ a ye Musa yaamari meŋ na, Yaawe la dookuulaa. Ì maŋ i lamoyi a la, sako ka soŋ a la.

2 Mansoolu 21:15

A be ñiŋ ke la le kaatu ì ye kuu jawoo le ke a ñaa koto, aduŋ ì ye a kamfandi le, ka bo luŋo meŋ na ì mumuñolu bota naŋ Misira ka naa bula bii la.”

Esira 9:6

N kumata ko: “M Maarii Alla, m maluta le fo a tambita, ka n ñaa tiliŋ i la. Ǹ na junuboolu niŋ ǹ na boyoo la waroo tambita ǹ kunna le. Ì futata saŋ fatoolu ma le.

Jabuuroolu 106:6

Ntolu ye junuboo ke le komeŋ ǹ na alifaa foloolu, ŋà kuu kuruŋolu le ke, ŋà kuu jawoolu le ke.

Jabuuroolu 119:102

Nte maŋ n koo dii i la karandiroolu la, kaatu ite le ka n karandi.

Jabuuroolu 119:176

N taata le taariŋ komeŋ saajii filiriŋo. N ñini, nte mu i la dookuulaa le ti, aduŋ m maŋ ñina i la yaamaroolu la.

Jabuuroolu 18:21

Kaatu ŋa ite Yaawe la siloolu nooma le, m maŋ kuu kuruŋo ke, ka n koo dii n na Alla la.

Yesaya 53:6

Ntolu bee keta le ko saajii filiriŋo, moo bee taata a fansuŋ siloo la, bari Yaawe ye ntolu la junuboo bee laa ate le kaŋ.

Yesaya 59:13

Ŋà balaŋo niŋ jamfaa le ke Yaawe la karoo la, ka ǹ koo dii ǹ na Alla la, ka tilimbaliyaa kuwolu wulindi, aniŋ ka muriti, ka feeroo siti ka faniyaa fo.

Yesaya 64:4

Kabiriŋ koomanto nuŋ, moo nene maŋ a moyi, sako ka i hakilitu a to, moo ñaa nene maŋ Alla je meŋ be ko ite, meŋ ka loo moolu ye, mennu ka a batu.

Yeremiya 14:20

Hee Yaawe, ǹ sonta ǹ na kuu jawu kewo la le, aniŋ ǹ na alifaa foloolu la kuu kuruŋo. Ŋà junube kuwo le ke i la.

Yeremiya 14:7

Yahuuda moolu ko, “Ǹ na junuboolu ye jalayiroo laa ǹ kaŋ ñaa-wo-ñaa, Yaawe, kuu ke i too la kuwo kamma la. Ŋà ǹ koo dii i la le siiñaa jamaa, aduŋ ŋà junube kuwo le ke i la.

Yeremiya 3:25

Ǹ ñanta le ka n laa duuma maloo kono, ǹ na dooyaa ye muuri ǹ kaŋ. Ŋà junuboo le ke Yaawe ǹ na Alla la, ntolu niŋ m̀ mumuñolu bee, ka bo biriŋ ǹ dindiŋ ka naa bula bii la. M̀ maŋ Yaawe ǹ na Alla la kumoo muta.’ ”

Yeremiya 30:14

Ali niŋ mennu bee be laariŋ nuŋ ñoo kaŋ, ì ñinata ali la le, ì buka hani ali hati kotenke. Ŋa ali busa ko n jawoo, ko konnantee balafaabaloo la kelendiroo, kaatu ali la boyidaa warata le, aduŋ ali la junuboolu siyaata.

Yeremiya 44:3

Ì ye kuu jawoo meŋ ke, wo le ye a saabu. Ì ye n kamfandi le ka cuuraayoo siisindi jalaŋolu ye ka ì batu, itolu nene maŋ mennu loŋ, sako alitolu, sako ali la alifaa foloolu.

Niikuyaa Suukuwolu 1:18

“Rim! A fele m boyita bataa kono, moo bee, ali i lamoyi. N na sunkutoolu niŋ fondinkewolu, ì ye ì bee le samba mutoo kono. Yaawe tilinta le, bari hani wo m balanta a la kumoo la.

Niikuyaa Suukuwolu 1:20

“Hawusaroo* be faaroo la mbeedoolu kaŋ, buŋolu fanaa kono niŋ saayaa. Hee Yaawe, a juubee m be mantooroo meŋ kono, fo n niyo bee dewunta, n kijoo kuntuta, kaatu ŋa balambaatooyaa le tiliŋ i la.

Niikuyaa Suukuwolu 3:42

“M̀ balanta i ma le, ŋà junuboo ke, aduŋ i maŋ yamfa m̀ ma.

Esekiyeli 5:6

Bari Yerusalaamu saatee moolu muritita m ma le, ì balanta n na yaamaroolu niŋ n na saratoolu la. Ì naata kuruŋyaa ka tambi bantala banku* moo doolu faŋolu la. Ì balanta le ka n na yaamaroolu niŋ n na saratoolu muta, hani ka tambi wo banku moo doolu la, mennu be ì dandaŋo la.”

Esekiyeli 6:9

Aduŋ wo moolu mennu kanata keloo to, ì hakiloo be bula la n na, wo bantala bankoolu kaŋ ne, ì ye ì samba mutoo kono daamennu to. Ì hakiloo be bula la, ì ye niitooroo meŋ laa n kaŋ ì la m fulaŋ kafuñooyaa la ka bula jalaŋolu nooma aniŋ ka hame jalaŋolu la kuwo la. Labaŋo la ì be ì faŋ koŋ na, ì kekuwolu niŋ ì la kuu haraamuriŋ kewolu la le.

Daniyeli 9:11

Banisirayilankoolu bee le ye i la luwaa tiñaa, aduŋ ì ye ì koo dii i la le, ì maŋ soŋ ka i la kumoo muta. Wo le ye a tinna i ye dankoolu kupi ǹ kaŋ, mennu bee be safeeriŋ Musa la Luwaa* Kitaaboo kono, kaatu ŋà junube kuwo le ke i la.

Daniyeli 9:15

Ite m̀ Maarii Alla le ye i la moolu bondi naŋ Misira bankoo kaŋ niŋ i la semboo la, aduŋ wo ye a tinna le i too bota, fo ka naa bula bii la. Bari ntolu ye junuboo ke le, ŋà kuu jawoo ke.

Daniyeli 9:9

M̀ Maarii Alla, ite ye balafaa soto le, aduŋ i ka yamfa le, ntolu balanta i ma ñaa-wo-ñaa.

Hoseya 1:2

Yaawe la diyaamu foloo Hoseya ye, a ko a ye le ko, “Taa i ye cakamusoo futuu, ali ye cakadiŋolu wuluu, kaatu ñiŋ banku moolu ka cakayaa maañaa le ke, bayiri ì ye ì koo dii nte Yaawe la le.”

Malaki 3:7

Yaawe Alihawaa Maariyo ye ñiŋ ne fo ko, “Ko ali la alifaa foloolu keta ñaameŋ, ali keta wo le ñaama, ali ye ali ñaa kaasi n na yaamaroolu la le, aduŋ ali maŋ ì nooma. Ali muru naŋ n kaŋ, m fanaa si muru ali kaŋ! “Bari ali ye ñiŋ ne fo ko, ‘M̀ be muru la i kaŋ ñaadii?’

Hiburunkoolu 3:12

Baadiŋolu, ali ali hakiloo tu fo moo-wo-moo kana tara ali kono, meŋ ye jawuyaa niŋ lannabaliyaa soto a sondomoo kono, kaatu wo le ka a tinna, moo ka a koo dii Alla baluuriŋo la.