Amosi 9:14 - Mandinka Bible

¹⁴ M be n na moolu Banisirayilankoolu murundi la naŋ ne ka bo mutoo kono. Ì ye naa ì la saatee tumbundiŋolu lookuu, ì ye sabati ì kono. Ì ye wayini yiroolu tutu, ì ye ì jiyolu miŋ, ì ye naakoolu dookuu, ì ye i munafaŋ ì la.

Amosi 9:14 Mawu Ofanana

Jabuuroolu 107:37

Ì ka kunkoolu fii le, ì ye wayini* yiri kankaŋolu tutu, aduŋ ì ka tinee baa le soto.

Jabuuroolu 53:6

M be ñaaniriŋ ne fo kiisoo si bo Banisirayila ye naŋ Siyoni*. Niŋ Alla ye a la moolu murundi firiŋo kono, Yaakuba koomalankoolu si seewoo, Banisirayilankoolu bee si jusulaa.

Yesaya 60:4

Yaawe ko: “I dandaŋolu juubee, i ye a je, meŋ be ke kaŋ. Ì bee benta le ka naa i yaa. I dinkewolu be bo la naŋ dulaa jaŋ, ì ye i dimmusoolu fanaa sika naŋ ne.

Yesaya 61:4

Ì be tumbuŋ kotoolu lookuu la le, ì ye dulaalu mennu meeta kasaarariŋ, seyindi ì ñaama. Ì be saatee tiñaariŋolu dadaakuu la le, mennu janjanta, sanji jamaa koomanto.

Yesaya 65:21

Ì be buŋolu loo la le, ì ye sabati ì kono, Ì ye wayini yiri kankaŋolu tutu, ì ye ì yiridiŋolu domo.

Yeremiya 12:15

Bari niŋ ŋa wo ke wo banku moolu la fokabaŋ, m be naa balafaa la ì ye le, ŋa ì murundi ì fansuŋ bankoolu kaŋ, meŋ-wo-meŋ a bota daameŋ to.

Yeremiya 16:15

Bari ì be kali i kali la le ko, ‘A be koyiriŋ ñaameŋ ko Yaawe be baluuriŋ ne, meŋ ye Banisirayilankoolu bondi naŋ bankoo meŋ be maraa kara maafaŋo la, aniŋ banku koteŋolu bee kaŋ, a ye ì janjandi daamennu to.’ Kaatu m be ì murundi la naŋ bankoo kaŋ ne ŋa meŋ dii ì la alifaa foloolu la.”

Yeremiya 23:8

Bari ì be kali a fo la le ko, ‘A be koyiriŋ ñaameŋ ko Yaawe be baluuriŋ ne, meŋ ye Banisirayila koomalankoolu bondi naŋ bankoo meŋ be maraa kara maafaŋo la, aniŋ bankoolu bee kaŋ a ye ì janjandi daamennu to.’ Bituŋ ì si tara siiriŋ ì fansuŋ bankoo kaŋ.”

Yeremiya 24:6

M be n ñaa loo la ì kaŋ ka kuu kendoo le ke ì ye, aduŋ m be ì murundi la naŋ ñiŋ bankoo kaŋ ne. M be ì tutu la le, n te ì suloo wutu la, ŋa ì loo, n te ì boyi la.

Yeremiya 29:14

ali be n je la le. Nte Yaawe le ye a fo, aduŋ m be ali samba la naŋ ne ka bo bankoolu bee kaŋ, ŋa ali janjandi daamennu to. M be ali murundi la ali la firiŋo to le, ka ali murundi dulaa to ŋa ali bondi daameŋ ka ali samba mutoo kono.” Yaawe le ye a fo.

Yeremiya 30:18

Yaawe ye ñiŋ ne fo ko: “A juubee, m be Yaakuba koomalankoolu murundi la le ka tara firiŋo kono, aduŋ m be balafaa soto la ì ye ì sabatidulaalu la kuwo to le. Yerusalaamu saatewo be lookuu la a tumbuŋ noo to konko tintoo kaŋ ne, aduŋ mansasuwo be seyinkaŋ loo la a noo kotoo to le.

Yeremiya 30:3

Kaatu luŋolu be naa le, m be n na moolu, Banisirayila niŋ Yahuuda murundi la ì la firiŋo kono. M be ì murundi la bankoo kaŋ ne, ŋa meŋ dii ì mumuñolu la, aduŋ ì be a taa la le kotenke, ka ke ì taa ti.” Yaawe le ye a fo.

Yeremiya 31:23

Yaawe Alihawaa Maariyo*, Banisirayila la Alla ye ñiŋ ne fo ko: “Niŋ ŋa Yahuuda bankoo niŋ a saatewolu moolu murundi ì la firiŋo kono, ì be kali ñiŋ kumoolu fo la le kotenke ko: ‘Allamaa Yaawe neema la konko senuŋo* ma, tiliŋo ka tara daameŋ.’

Yeremiya 31:28

Bayiri koomanto ŋa ì juubee le, ŋa ì wutu, ka ì boyindi duuma, ka ì bondi ì noo to, ka ì kasaara, ka maasiiboo naati ì kaŋ. Bari m be a je la le ko, ŋa ì loo, ka ì tutu. Nte Yaawe le ye a fo.

Yeremiya 31:5

I be wayini* yiri kankaŋolu fii la le kotenke, Samariya konkoolu kaŋ. Ì fiilaalu be ì fii la le, aduŋ ì faŋolu le be ì diŋolu domoo foloo la.

Yeremiya 32:15

Kaatu nte Yaawe Alihawaa Maariyo, Banisirayila la Alla ye ñiŋ ne fo ko: Buŋolu niŋ kenoolu, aniŋ wayini* yiri kankaŋolu be saŋ na ñiŋ bankoo kaŋ ne kotenke.”

Yeremiya 32:37

A be koyiriŋ ne ko, m be ì kafu la ñoo ma le ka bo bankoolu bee kaŋ, ŋa ì bayi daamennu to, n na jusukandoo, diminnaa, aniŋ kamfaa baa kono. M be ì murundi la naŋ ñiŋ dulaa to le, ŋa ì sabatindi tankoo kono.

Yeremiya 33:11

Maadiyaa niŋ seewoo kumakaŋolu be ke la jee le, aniŋ maañoo niŋ a keemaa la maañoobiti maakaŋo, ka taa moolu kumakaŋo, mennu be kali tenturulaŋ sadaalu* samba la nte Yaawe Batudulaa Buŋo* to, ka suukuwo laa ko, ‘Ali Yaawe Alihawaa Maariyo* tentu, kaatu Yaawe beteyaata le, a la kanu bambaloo be tu la le fo abadaa.’ M be ñiŋ bankoo moolu la firiŋo murundi la a ñaama le ko ì be nuŋ ñaameŋ folooto.” Yaawe le ye a fo.

Yeremiya 33:7

M be Yahuuda niŋ Banisirayila murundi la naŋ firiŋo kono le, ka ì seyinkaŋ loo ko ì be nuŋ ñaameŋ folooto.

Esekiyeli 16:53

“Wo koolaa ñaato m be Sodomu niŋ Samariya niŋ ì dimmusoolu bee la neemoo murundi la ì kaŋ ne, aniŋ ite faŋo taa,

Esekiyeli 28:26

Ì be tara la kayiroo le kono, ì ye ì la buŋolu loo, ì ye wayini* yiri kankaŋolu tutu. Niŋ ŋa n na kiitiyo taamandi ì naaneeñoolu bee kaŋ, mennu ye kuu jawoolu laa ì kaŋ jutunnayaa kono nuŋ, wo to le ì be tara la kayiroo kono. Niŋ wo keta le, ì be a loŋ na ko, nte le mu Yaawe ti, ì Maariyo.”

Esekiyeli 37:21

i ye a fo ì ye, nte Yaawe, ì Maariyo ye ñiŋ ne fo ko: M be Banisirayilankoolu fintindi la wo bantala bankoolu* kaŋ ne ì taata daameŋ. M be ì kafu la ñoo ma le ka bo naŋ dulaalu bee to, ŋa naa ì seyindi naŋ ì fansuŋ bankoo kaŋ.

Esekiyeli 39:25

Maarii Yaawe ye ñiŋ ne fo ko: “Saayiŋ m be Yaakuba koomalankoolu la neemoo murundi la ì kaŋ ne, ko a be nuŋ ñaameŋ, aduŋ m be balafaa soto la Banisirayila muumee ye le. M be n too la horomoo kanta la le.

Amosi 5:11

Ali ye fuwaaroolu toorandi, aniŋ ali ye siimaŋ kese naamoo laa ì kaŋ. Wo kamma la, ali ye buŋolu mennu loo bere leseriŋo la, ali te sabati la ì kono. Ali ye wayini* yiri diimaalu mennu tutu, ali te ì jiyo miŋ na.

Sefaniya 1:13

Ì la fankoo bee si ñapinkaŋ ì bulu, ì la buŋolu bee ye kasaara. Ì ye buŋolu mennu loo, ì te sabati la ì kono, ì ye wayini* yiroolu mennu tutu, ì te ì jiyo miŋ na.”

Sefaniya 2:7

A be ke la Yahuuda moolu le taa ti mennu tuta baluuriŋ. Ì be kali la ì la beeyaŋolu daañini la jee le, ì ye i laa Asikeloni buŋolu kono wulaaroo. Yaawe, ì la Alla le be ì topatoo la, a ye ì la neemoo murundi ì kaŋ.