2 Mansoolu 3:25 - Mandinka Bible

²⁵ Ì ye ì la saatewolu tiñaa le. Niŋ ì futata senebanku kendoo meŋ-wo-meŋ ma, moo-wo-moo si beroo fayi jee, ka a fandi niŋ beroolu la. Ì ye ì la woyoolu bee suki le, aduŋ ì ye ì la yiri dinnaa kendoolu bee boyi le. Labaŋo la saatee kiliŋ doroŋ ne tuta looriŋ jee, meŋ keta Kiri-Hareseti saatewo ti. Kampuraŋ fayilaalu ye jee fanaa murubeŋ, ì ye a boyinkaŋ.

2 Mansoolu 3:25 Mawu Ofanana

1 Musa 26:15

Ì ye koloŋolu bee saareŋ, a faamaa la dookuulaalu ye mennu siŋ nuŋ.

1 Musa 26:18

A ye koloŋolu seyinkaŋ wuri, Iburayima la moolu ye mennu siŋ nuŋ, Filisitinkoolu ye mennu saareŋ Iburayima beleriŋ koolaa. Isiyaaka ye wo too kiliŋolu le dii ñiŋ koloŋolu la ko a faamaa ye toolu mennu dii ì la nuŋ.

2 Samuweli 8:2

Dawuda ye Mowabinkoolu fanaa noo keloo la le. A ka a ke le, ì ye i laa bankoo to. Moo saba-wo-saba, a ka fula le bo jee, a ye wolu faa. Moo sabanjaŋo, a ye wo tu jee. Wo to le Mowabinkoolu ye ì faŋ seyi a ma, ì ka naamoo joo a yaa.

2 Mansoolu 3:19

Elisa tententa ka Yaawe la kumoo sindi ì ma ko, “Ali be ì la saatee kende tatariŋolu bee muta la le, aniŋ saatee baalu bee. Ali be ì la yiri kendoolu bee boyi la le, ali ye ì la woyoolu bee suki, aduŋ ali be ì la senebanku kendoolu bee fandi la niŋ beroolu le la ka ì tiñaa.”

2 Mansoolu 3:24

Bari kabiriŋ ì futata Banisirayilankoolu la daakaa to, Banisirayilankoolu wulita ì kamma ka ì kele. Mowabinkoolu borita, aduŋ Banisirayilankoolu ye ì bayindi ka ì faa. Ì tuta ì bayindi kaŋ ne fo ì la bankoo kaŋ ka ì faa.

2 Mansoolu 3:26

Kabiriŋ Mowabi mansa ye a je ko ì be naa a noo kaŋ keloo ñiŋ to le, a ye kee keme woorowula taa, ì bee niŋ ì la hawusaroolu*. A ye a ke forisewo ti ka a kata ka kana Edomu mansa be daameŋ maafaŋo la. Bari a maŋ kana noo.

2 Taarika 32:4

Moo jamaa baa benta ñoo kaŋ, ì ye woyoolu suki bankoo kaŋ taariŋ. Ì kumata ko, “Asiriya mansoolu maŋ ñaŋ na jii soto la jaŋ, niŋ ì naata.”

Yesaya 15:1

Kiilaariyaa kumoo fele Mowabi la kuwo to. Ari meŋ be Mowabi, kasaarata le suuto kiliŋ! Kiri meŋ be Mowabi, kasaarata le suuto kiliŋ!

Yesaya 16:11

N kumboota Mowabi ye le ko suusaa kumakaŋo, Kiri-Hareseti saatewo la kuwo ye m baloo bee futufaa.

Yesaya 16:7

Wo to, Mowabinkoolu si lemba, moolu bee si lemba, ì la kuwo balafaa kaŋ. Ali sunu baake, ali ye sunu kendeke, Kiri-Hareseti saatewo la tiñaa kamma la, kaatu a la domori diimaa te soto la kotenke.

Yeremiya 48:31

“Wo to m be kumboo la Mowabi ye le, m be wuuri la Mowabi bee le ye, ŋa Kiri-Hareseti saatee moolu la kuwo woosii.

Yeremiya 48:36

“Wo to n kumboota Mowabi ye n sondomoo kono le ko ŋaliitoo, n kumboota Kiri-Hareseti moolu ye n sondomoo kono ko ŋaliitoo, kaatu ì la kafuŋ-kafuŋ naafuloo bee kasaarata le.

5 Musa 2:9

Bituŋ Yaawe ko n ye ko, “Ali kana boyi Mowabinkoolu kaŋ waraŋ ka ì maa keloo la. N te hani dulaa dii la ali la ì la bankoo to. Ŋa Ari saatewo dii Luuti koomalankoolu la le ka ke ì taa ti.”

Kiitindirilaalu 9:45

Abimeleki ye saatewo ñiŋ kele wo luŋ tiloo bee la, a ye saatewo taa, a ye a moolu bee faa, mennu be jee. A ye saatewo bee tiñaŋ-tiñaŋ, a ye koo janjaŋ a bee to.