1 Mansoolu 1:25 - Mandinka Bible

²⁵ Bii faŋo a taata le ka beeyaŋ sadaa jamaa bondi: saajiyolu, ninsituuraalu, aniŋ ninsiriŋ batundoolu. A ye i dinkewolu bee kumandi le, ka taa Yowabu, i la kelediŋolu la kuntiyo, aniŋ Piriisi Abiyata. Saayiŋ teŋ faŋo ì niŋ a be domoroo niŋ miŋo le la, aduŋ ì ka ñiŋ ne fo ko, ‘Allamaa Mansa Adoniya mee la.’

1 Mansoolu 1:25 Mawu Ofanana

2 Samuweli 16:16

Bituŋ Husayi Arikinkoo, Dawuda teerimaa, taata Abusalomu yaa, a ko a ye ko, “Allamaa mansa so la siimaayaa la! Allamaa mansa so la siimaayaa la!”

1 Mansoolu 1:19

A hayinaŋ a ye saajii jamaa bo sadaa ti, ninsituuraalu, aniŋ ninsiriŋ batundoolu. A ye i dinkewolu bee kumandi sadaa to le, aniŋ Piriisi Abiyata niŋ i la kelediŋolu la kuntiyo Yowabu, bari a maŋ i dinkewo Sulemani kumandi.

1 Mansoolu 1:24

Bituŋ Natani ko, “M maarii mansa, fo ite le ko Adoniya le be sii la i noo to mansasiiraŋo kaŋ ka ke mansa ti baŋ?

1 Mansoolu 1:34

Jee to Sadoki niŋ Natani si tuloo boŋ a kuŋo to ka a toloo Banisirayila mansa ti. Bituŋ ali si binoo fee, ali ye sari ka a fo ko, ‘Allamaa Mansa Sulemani mee la!’

1 Mansoolu 1:39

Piriisi Sadoki ye tulu keraŋ binoo taa, a ye meŋ bondi naŋ Yaawe la Tiriliisi Senuŋo* kono, a ye tuloo boŋ Sulemani kuŋo to ka a toloo. Bituŋ ì ye binoo fee, aduŋ moolu bee sarita ka a fo ko, “Allamaa Mansa Sulemani mee la!”

1 Mansoolu 1:9

Bituŋ Adoniya ye saajiyolu bo sadaa* ti, kooreeto ninsoolu, aniŋ ninsiriŋ batundoolu, dulaa to meŋ ka kumandi Saa Beroo la, Rokeli woyoo daala. A ye Mansa Dawuda dinkewolu niŋ mansa la ñaatonkoolu bee kumandi, mennu bota Yahuuda.

1 Mansoolu 2:15

A ko a ye ko, “I ye a loŋ ne ko, nte le ñanta ke la nuŋ mansa ti, aduŋ Banisirayila moolu bee ye wo le miira. Bari wo maŋ naa ke, n doomaa le naata ke mansa ti, kaatu Yaawe la lafoo mu wo le ti.

2 Mansoolu 11:12

Piriisi Yehoyada ye mansa dinkewo Yowasi fintindi naŋ, a ye mansanaafoo duŋ a la, aduŋ a ye mansayaa seedeyaaraŋo dii a la. Wo le to ì ye tuloo boŋ a kuŋo to, ka a toloo mansa ti. Ì ye buloo kosi, aduŋ ì sarita ka a fo ko, “Allamaa mansa mee la!”

2 Mansoolu 11:14

A ye mansa tara looriŋ samasiŋo daala, komeŋ aadoo ye a yitandi ñaameŋ, kelediŋ kuntiyolu niŋ footaŋ feelaalu be looriŋ mansa kara la. Aduŋ bankoo moolu bee tarata seewooriŋ, ì be footaŋolu fee kaŋ. Wo le to Ataliya ye a la duŋ feŋolu fara a faŋ na niikuyaa kamma la, aduŋ a wuurita ka a fo ko, “Jamfaa! Jamfaa!”

2 Mansoolu 9:13

Bituŋ wo loodulaa kiliŋo to ì bee ye ì la dendika baalu bo, ì ye ì feenee Yehu ye seleraŋ teputepoolu kaŋ. Ì ye binoolu fee, ì sarita santo ka a fo ko, “Yehu mu mansa le ti.”

1 Taarika 29:13

Saayiŋ ǹ na Alla, m̀ be i tentu la, m̀ be i too kallankeeyaariŋo jayi la.

1 Taarika 29:21

Wo saamoo le ì ye beeyaŋ sadaalu* bo Yaawe ye, ì ye ninsituuraa wuli kiliŋ, saakotoŋ wuli kiliŋ, aniŋ saajiiriŋ wuli kiliŋ samba a ye naŋ jani sadaa* ti. Ì ye miŋ feŋ sadaa fanaa samba naŋ, aniŋ sadaa koteŋ jamaa, Banisirayilankoolu la kuwo kamma.

2 Taarika 23:11

Bituŋ ì ye mansa diŋo Yowasi fintindi naŋ, ì ye mansanaafoo duŋ a la, aduŋ ì ye mansayaa seedeyaaraŋo dii a la. Wo le to Yehoyada niŋ a dinkewolu ye tulu senuŋo boŋ a kuŋo to, ka a toloo mansa ti. Ì wuurita ka a fo ko, “Allamaa mansa mee la!”

Matiyu 21:9

Aduŋ kafoo mennu be a ñaato, aniŋ mennu be a nooma, wolu be sari kaŋ santo ko, “Hosanna be Dawuda Dinkewo ye. Tenturoo niŋ jayiroo be ate le ye, meŋ ka naa Maariyo too la. Hosanna, fo saŋo santo.”

Matiyu 22:4

A ye dookuulaa doolu kii kotenke, a ko ì ye ko, ‘Ali a fo moolu ye, ŋa mennu kili ko: A juubee, ŋa n na domoroo parendi le. Ŋa n na ninsituuraalu kanateyi le, aniŋ n na ninsiriŋ batundoolu, aduŋ kuwolu bee pareeta le, ali ye naa maañoobitoo to.’

Luka 19:38

Ì be a fo kaŋ ko, “Tenturoo niŋ jayiroo be mansakewo ye, meŋ ka naa Maariyo too la! Kayiroo be Arijana kono, semboo niŋ waroo be Alla ye Arijana dulaa jamfariŋ baa to!”

1 Samuweli 10:24

Samuweli ko moolu bee ye ko, “Ali kewo juubee, Yaawe ye meŋ tomboŋ. Moo-wo-moo le niŋ a maŋ kiliŋ moolu bee kono.” Bituŋ moolu wuurita ko, “Allamaa mansa mee la.”