Matyu 2:11 - Anatunya Buku Baepole Ole Testamene Pii Lapo dee Nuu Tesamene

¹¹ Karapala anda dokona kolando papala wane doko endangi Mariapa peteyambinyi kandapala pongwa nao baa mupwa lao mona maiyuo peteyami. Pisipala nakamana bokote dusipa lumbwapala bange keyange palyuo minyiyaminyi kana rao kuikui lasipi wakaiya dopale rendamu pingipi mamba rendamu pingipi dupwa maiyami.

Matyu 2:11 Mawu Ofanana

Jenesese 43:11

Dokopa rakange Isaraeleme lamaiyuo lao, Dopa pyuo parandena lyamo dopa pyuo pipa, leya. Yuunya bange angi kapa palenge dupwana lapo paki pipala mamba lapo amburali ipwangepe awa kyaa pingi lapope anga ulyape dee kumba roo lapope manjo pao akali doko mee pakiki mairami.

1 Kiŋi 10:10

Enda baame bange minyuo epeyamo dupwa kiŋi Solomone maiya. Maiyamo dupwa kana golo taosande kisima (4,000) daako mee mendele ulipili maiya dee kalya bangepe dee nenge rende pinya lao reto maingi ama wakasa maiyuo piya. Dopa pipala nenge kyaa pyuo rende pinya lao pyambungi dupwa panju nyelamopape dolome ama malu maiya.

1 Kiŋi 10:2

Lao dokopa enda baame wambu lapo role pyao nyiso papingi dupwa lanyuo nenge rende pinya lao pyambungi bange lapope kalya bangepe dee kana golo ama malupi dupwa mena kamele matana retapala lanyuo epeya. Epo Solomone kando nyepala enda baame piso singi pii peparae suu piyamuli pyuo piso siya.

Samu 2:12

Baa mupwa lao mona nembo karo kingi wapambu lakao mona maipape. Dopa pii narami ramo banya imbu singi waiya lao sipuraramo dokopa nakama aopa kumarami. Dokona baa keta mata kui lao kararamidupwa rae mairami ingilyamo.

Samu 72:10

Dopa pyuo yuu Sepene range kiŋipi dee yuu ipwa kota sukusa singi dupwana kiŋipi dupwame baa bange kipungi ingyuo maiyala eparaminyipa yuu Arapia rangepe yuu Itiopia rangepe dupwana kiŋi dupwame dopako pirami.

Samu 72:15

Kiŋi baa karo yaku nao kumunya. Baa yuu Arapia range wambumi kana golo maiyuo karena. Banya lao ateŋa doko lapa lapa pyuo sakaminya. Anatumi kalya pyuo nembenge renge doko baa keta palipa palipa pyuo pena.

Samu 95:6

Namwa wapambu pii pyaro piso Kamongo namwa wasiyamo dokolakandamana. Ipupwa.

Aisaya 60:6

Yuu Mitiane Epape dolapona piso mena kamele malu suku piro karo eparami. Dopa piraminyipa mena kamele lapo yuu Sipa dorena karo kana golope rendamu pingi bangepe minyuo eparami. Dokopa Kamongome yulu keyange pipyaŋa lao wambu dupwame waili pii doko larami.

Malakae 1:11

Wambu yuu muu dupwana peparaeme namba rape rape lao karaminyi. Dupwana peparaeme bange rendamu pingi dupwa kiso joo dee bange rae maiyuo nyeroli dupwa jilyaminyi. Jepala peparaeme namba rape rape lao karaminyi.

Matyu 1:18

Yesu Koraisa mandeyami doko dopa pyuo mandeyami. Josepeme Maria ene nyelana mokoriya pyao kareyamo dokopa Imambu Poo Pyasimi renge kuiyamosa wane rombanda palyamo lao Mariame soo peteya.

Matyu 12:46

Baame wambu dupwa pii ene lamaiyuo kareyamo dokopa banya endangi yangongepe epo kamarena karapala baa pii mende lamaimwali yaka lapala lamaiyakana leyami.

Matyu 14:33

Dokopa wambu bote dokona peteyami dupwame banya lenge kambu dokona pangu sepala, Kinyi emba Anatunya Ikinyingilyamo leyami.

Matyu 2:10

Dokopa bui doko kandapala ama mona pyakalyuo pyao kareyami.

Matyu 2:2

Juu wambunya kiŋi manjiminyi doko anja silyamo? Neta pyakaenge dorena karo banya bui doko kandapala baa mupwa lao yako lala epelyamano, leyami.

Luku 2:16

Lapala waiya lao papala Mariamoo Josepemoo nyaŋa bulamakao nenge reto maingi dokona siyamo dokomoo kando nyiyami.

Luku 2:38

Josepe Mariapa tembole anda Anatu mona maiyuo kingi lao peteyambinyi gii dokopako Ana baa epapala Anatu kando ange lapala Anatumi Jerusaleme kiiramo nyela epelyape lao kando kareyami dupwa peparae wane dokosa lao kando lamaiya.

Jone 19:39

Nikotimasa wamba Yesu kareyamo dokona kukwa mendepa epeya doko baame rendamu pingi bange mwua lenge dokopa luli lenge isa mendepa alose lenge dolapo minyuo kiminjasi ama kenda malu doko minyuo epeya.

Orepalaisane 19:10

Leyamopa namba banya kimbu siyamo dokona pao palipala baa lakandalana piyunu dokopa, Dopa pii napipi kae leya. Namba embape dee embena yangonge dupwapeme Yesunya lao karaminyi kendemande dopaleko karoŋo. Emba Anatu iki lakandape leya. Yesumi pii renge kinyi rolae lenge doko poropeta dupwame lenge apo dokonako lao epeya.

Orepalaisane 5:8

Buku nyiyamo dokopa lee renge bange kisima dusipape dee akali wambake 24 dupwape Sipisipi Ikyane kando wapambu pii pyaro peteyami. Peteyami dokopa akali wambake dupwa mendaki mendaki lao rambyalu minyaro piso dee pere warake golome wasisi Kurisene wambunya ateŋa lenge dopale makande minyuo kyaa keyange piyamo minyaro peteyami piso

1 Samyuele 10:27

Dokopa wambu kopyali lapome lao, Akali dakeme apa pyuo namwa keyange ingyuo nyisarase? leyami. Lapala nakamame Sole awa nao kilya kandapala bange lapo rae maiyuo mai nayami.