Mice 5:7 - Sră Goh 2018

⁷ Pơnah gam wơl Jakôp dê rơp ơm digùl oă làng bol kung be dà tŭ tus bơh di Yàng Jehôwa, kung be mìu dùh hơđang ñhơt, gơ ò gơn kơnòm di cau hala kơp gơn jơi kòn mơnus.

Mice 5:7 Mawu Ofanana

II Samuel 17:12

Gen bol he rơp brồ lơh khai di tiah jòi bàn khai, bol he rơp tus hơđang khai kung be dà mơryuh dùh hơđang ù. Khai mơ ală cau jat khai rơp ò dô nă cau lơi gam kis.

Đơs Crih 110:3

Làng bol mê dê rơp ơn să bơh nùs kòñ bol khai dê, Tòm ngai mê lam mpồl ling mê dê hơđang ală mơnơm sàng goh. Ală cau pơnu mê dê rơp tus hơ mê kung be dà tŭ tòm àng drim.

Đơs Crih 133:3

Be dà tŭ bơh mơnơm Hermôn, Mù hơđang ală mơnơm Siôn dê! Tềng hơ̆ Yàng Jehôwa neh rcang lài ai bơta lơngai lơngò Kơnràñ dê, Hơ̆ la bơta kis gam sùm sùm.

Đơs Crih 72:6

Dan ai khai in gơlik be mìu dùh hơđang ñhơt pa pès, Be dà mìu tuh hơđang ù.

Jơnau Pơnđik 19:12

Bơtau gơhào khuh ò gơkrơi be klìu triă ơluh ơhùm; ai bơta nđàc khai be dà tŭ dùh hơđang ƀlàng ñhơt.

Esai 32:15

Jơl tus di tŭ Hwềng bơh tiah jơnhoa tuh hơđang bol he, mơ ƀlàng ngềt ngơt gơlik gơs sre bềng plai, mơ sre bềng plai gơlik gơs be dơr brê.

Esai 44:3

Bơh Añ rơp tuh dà hơđang ù rañ rsơh, ai ală croh dà tòm tiah ro rañ. Añ rơp tuh Hwềng Añ hơđang jơi bơtiàn mê dê, mơ bơta lơngai lơngò hơđang ală kòn sau mê dê.

Esai 55:10

Kung be mìu mơ piar dùh bơh trồ mơ ò rê wơl hơđang hơ̆ tai jơl tus di tŭ neh lơh sùh ù tiah mơ lơh gơcat sơmbut mơ gơlik plai đo, nàng ai gar sơntìl cau sih in mơ piang lă cau in sa,

Esai 66:19

Añ rơp ơn dô nơm tềl digùl bol khai, mơ Añ rơp sồr dô êt cau tòm mpồl ală cau gam kis lòt tus tòm ală lơgar, hơ̆ la tus hơ Tarsi, Libi, mơ Lidi la làng bol jak pañ sơna, tus hơ Tubal mơ Grek, mơ tus hơ ală bồt pơlào ơm ngài, la tiah òhềt kơno jơnau jòng ro bơh Añ, mơ kung òhềt gŏ bơta gơklŏ Añ jê. Bol khai rơp yal tơlik bơta gơklŏ Añ jê tòm ală lơgar.

Jeremi 14:22

Gơs rùp ràk lơi ală làng bol bơdìh dê rgơi cèng mìu sơl? Hala ală tap trồ rgơi ai mìu ơ? Ơ Jehôwa Yàng Tom Trồ bol hi dê, hơ̆ ò di la Kơnràñ ơ? Bol hi gơn kơnòm di Kơnràñ, Bơh Kơnràñ la Bơtau lơh gơs jơh ală bơta hơ̆.

Ejekiel 14:22

Bulah behơ̆ kung gơs dô êt nă cau gam kis, hơ̆ la ală kòn klau mơ ală kòn ùr rơp geh tă tơlik bơh hơ̆, bol khai rơp lòt tus hơ mê, mơ tòm tŭ mê gŏ gùng dà bol khai dê mơ broă lơh bol khai dê, gen mê rơp geh pơndòm pơniang gơwèt hơ bơta rung rài mơ Añ neh tơndùh hơđang Jerusalem, bơh jơh ală bơta Añ neh tơndùh hơđang gơ.

Ejekiel 47:1

Cau hơ̆ cèng añ rê wơl hơ gùng mut tòm hìu duh khoai, mơ añ gŏ dà gơhòr lik bơh di hơđơm mpồng hìu duh khoai dê wèt hơ đah mattơngai lik (bơh hìu duh khoai wèt hơ đah mattơngai lik). Dà hơ̆ gơhòr mù bơh đah đơm hìu duh khoai, đah đơm cơnòng ơn phan duh khoai.

Ejekiel 5:5

Yàng Jehôwa đơs be do: “Do la Jerusalem, Añ neh ơn gơ digùl ală làng bol, bal mơ ală lơgar ơm gùt dar gơ.

Daniel 11:32

Khai ngui jơnau rơmhòc nàng ơniai ală cau sang lòi bơta ho bal; mơya làng bol git Yàng Tom Trồ rơp tòmdră mơ khai dô bă pràn kơldang.

Sră Ôse 14:5

Añ rơp be dà tŭ Israel in; khai rơp gơlik bơkào be bơkào gun, Khai rơp kung be dơr brê srò ryas jrô tòm Liban.

Sră Ôse 6:3

Lòi bol he đal git tĕ Yàng Jehôwa; bol he pơnđơl tĕ đal git Kơnràñ. Bơta tơlik mat Kơnràñ dê la nền cê ngan be rìng àng drim, Kơnràñ rơp tus hơ bol he kung be trồ mìu nhàc, be mìu kơnhai phàng tơnsùh ù tiah.”

Jôel 2:32

Gen cau lơi hòi dan di sơnđan Yàng Jehôwa rơp geh dong klàs; bơh hơđang mơnơm Siôn mơ tòm Jerusalem rơp gơs ală cau geh dong tă, jat be jơnau Yàng Jehôwa neh đơs: mơ digùl ală cau gam wơl, bol khai la ală cau rơp geh Yàng Jehôwa hòi.

Amôs 5:15

Gơjrañ kơuềng tĕ di bơta iơh mơ kòñ gơboh tĕ di bơta niam; mơ bơt bơtào tĕ bơta song ring di mpồng ƀòn dờng. Digơlan Jehôwa Yàng Tom Trồ Gơnap Gơnoar Dờng Làm Jơh rơp ai bơta nđàc gơwèt hơ ală cau gam wơl Jôsep dê.

Mice 2:12

“Ơ Jakôp! Ngan Añ rơp pơjum wơl jơh ală bol mê; Añ rơp tơrgòm ală cau gam wơl Israel dê, Añ rơp ơn bol khai dô bă bal be belàt tòm dô mpồl, be dô mpồl tòm ƀlàng ñhơt gơ dê; rơp gơlik gơs jơnau lơh nggồr mpong bơh làng bol oă.

Mice 4:13

Ơ Kòn ùr Siôn, guh tĕ mơ pơrjòt tĕ! Bơh Añ rơp lơh ai in ală ngke mơ lòs, mơ ală nđias jơng mơ kòng; mơ ai rơp pòng bơcah lề lac oă làng bol. Ai rơp ơn phan bol khai tòmpìt geh Yàng Jehôwa in, ơn bơta pas sơm bol khai dê Yàng Jehôwa in la Yàng jơh dunnia dê.”

Mice 4:7

Añ rơp lơh cau kwet gơlte in gơlik gơs làng bol gam wơl, lơh ală cau neh kong kup cèng gơlik gơs dô nơm lơgar pràn. Yàng Jehôwa rơp at bồ bol khai tòm mơnơm Siôn, bơh tŭ do jơl tus sùm sùm.

Mice 5:3

Gen tàng Israel rơp gơkòl sang lòi jơl tus di tŭ cau ùr jê deh neh deh kòn mơ cau oh mi gam wơl Kơnràñ dê rơp rê wơl lơh gơs dô bă bal mơ kòn sau Israel dê.

Mice 5:8

Pơnah gam wơl Jakôp dê rơp ơm digùl oă lơgar, mơ ơm digùl oă làng bol kung be dô nơm klìu triă ơm digùl ală phan poan jơng tòm brê, mơ kung be dô nơm klìu triă brồ dam ơm digùl ală mpồl belàt, tòm tŭ gơ lòt gan gơ jă trơm mơ kap crè rpot rpet, ò gơs cau lơi rgơi dong klàs.

Mice 7:18

Ñcau la Yàng Tom Trồ tòm toh be Kơnràñ, ò kòp tồi glài mơ toh bơta tìs nrah làng bol gam wơl la sre brê Kơnràñ. Kơnràñ ò prap bơta gơjrañ sùm sùm, tài bơh Kơnràñ niam nùs yal tơlik bơta kòñ nđàc.

Sôphôni 3:13

Ală cau gam wơl Israel dê rơp ò lơh bơta tìs, bol khai rơp ò đơs blac, bơta blac pơrlồm jòi ò bàn tòm bơr bol khai dê. Bol khai rơp sa mơ bic rlô, mơ ò gơs cau lơi lơh bol khai in rngòt rngơt.”

Sacari 14:8

Tòm ngai hơ̆, dà kis rơp hòr lik bơh Jerusalem, nggùl hòr tus hơ dàlềng đah mattơngai lik, nggùl hòr tus hơ dàlềng đah mattơngai mut, tòm kơnhai prang mơ tòm kơnhai noat mrềt.

Sacari 9:13

Añ rơp wàr Juda kung be Añ wàr àtak Añ jê mơ ơn Epraim kung be kam gơ dê; Ơ Siôn, Añ rơp bơtào tơngguh ală kòn klau mê dê tòmdră mơ ală kòn klau Grek dê mơ Añ rơp ngui mê gơlik kung be dô nơm đào tòm tê pràn cau tòmlơh dê.

Mathiơ 28:19

Behơ̆, lòt tĕ lơh jơh ală làng bol in gơlik gơs cau bơtê Añ jê, ai sơnđan tĕ Yàng Bèp, Yàng Kòn mơ Yàng Hwềng Goh, lơh ƀaptem bol khai in.

Broă 11:15

Tòm tŭ añ sơntòm đơs, gen Yàng Hwềng Goh mù hơđang bol hơ̆, kung be neh mù hơđang bol he bơh sơnròp sơl.

Broă 13:46

Chòp Pol mơ Banaba khin cha đơs mơ bol khai lah: “Sơnròp ngan pal bơto jơnau Yàng Tom Trồ oh mi in; mơya tài bơh oh mi neh pơndang sang, mơ sơwì is să he ò di pal dòp bơta kis gam sùm sùm, gen tàng tŭ do bol hi wèt wơl hơ làng bol bơdìh.

Broă 16:9

Tòm mang hơ̆ Pol gŏ bơta gơtơnggŏ gơs dô nă cau Masedoan ntào di đap khai mơ rac dan lah: “Tus tĕ hơ Masedoan nàng dong kòl bol hi.”

Broă 9:15

Mơya Yàng đơs lah: “Lòt tĕ, bơh khai la dô nơm phan ngui Añ neh sac rwah nàng cèng sơnđan Añ di đap ală làng bol bơdìh, ală cau bơtau mơ ală kòn sau Israel dê.

Rôma 10:20

Mơ tai, Esai đơs dô bă khin cha lah: “Ală cau ò jòi jat Añ gen neh bàn Añ, Añ neh tơlik să di cau ò lùp jòi Añ.”

Rôma 11:12

Dilah bơta tìs glài bol khai dê la bơta pas gơs dunnia dê, bơta gơruc bol khai dê la bơta pas gơs làng bol bơdìh dê, tơ ài lah bơta rê wơl bol khai dê hơ Yàng Tom Trồ, gen sơlo lơh pas sơm, bềng lìu lin rlau ò git nđò!

Rôma 9:30

Behơ̆ mbe bol he kòñ đơs taih? Ală làng bol bơdìh ò jòi jat bơta song ring, mơya neh geh bơta song ring, hơ̆ la bơta song ring tus bơh bơta dòn;

I Kôrintô 3:6

Añ neh tam, Apôlôs neh tuh dà, mơya Yàng Tom Trồ neh lơh gơ in hòn dờng.

Yal Wơl 32:2

Dan jơnau bơto sồr añ jê gơdùh be mìu, mơ ală jơnau đơs añ jê gơ mù be dà mơryuh, kung be mìu nhàc hơđang ñhơt pa hòn, kung be mìu dờng hơđang ƀlàng ñhơt.

Ală Kwang Cahrña 6:36

Gen Gideôn đơs mơ Yàng Tom Trồ lah: “Nàng sền gŏ gơs Yàng rơp dong tă Israel kơnòm di tê añ, be jơnau Kơnràñ neh đơs,