Jeremi 4:1 - Sră Goh 2018

¹ Yàng Jehôwa đơs: “Ơ Israel, dilah mê rê wơl, Dilah mê rê wơl mơ Añ, Mơ dilah mê sang ală phan cù kìr ngài bơh di đap Añ, Mơ ò wañ lơnggơr.

Jeremi 4:1 Mawu Ofanana

Sơnròp Gơlik Gơs 35:2

Gen Jakôp đơs mơ hìu nhă khai dê mơ jơh ală cau lòt bal mơ khai lah: “Tơlik sang tĕ ală yàng ndai bơh digùl ală bol mê, lơh bol mê in gơs sàng goh mơ bơsoh ào.

II Ală Bơtau 23:13

Bơtau kung lơh ƀơ̆ ƀơl ală tiah jơnhoa ơm di đah mattơngai lik Jerusalem, di đah đơm mơnơm Bơta Tơnroh, la ală tiah Salômôn bơtau Israel neh bơt bơtào nàng duh khoai Astarte, rùp ràk cù kìr cau Sidôn dê, Kemôs rùp ràk cù kìr cau Môap dê, mơ Milkôm, rùp ràk cù kìr cau Ammôn dê.

II Ală Bơtau 23:24

Jôsia kung tơnroh ală cau gru bơjơu, ală cau sền dà, mơ ală rùp ràk cù kìr tòm Juda mơ tòm Jerusalem, nàng lơh jat ală bơta boh lam neh cih tòm sră mơ cau gơnoar ơn phan duh khoai Hilkia neh jòi bàn tòm hìu duh khoai Yàng Jehôwa dê.

II Yal Yau 15:8

Tòm tŭ Asa neh kơno ală jơnau hơ̆ la jơnau đơs hwơr Ôdet dê, gen khai geh gơchồl nùs. Khai tă sang ală rùp ràk cù kìr bơh làm jơh lơgar Juda mơ Benjamin, mơ bơh di ală ƀòn dờng mơ khai neh tòmpìt geh tòm lơgar kơh mơnơm Epraim dê. Khai kung rcang wơl cơnòng duh khoai Yàng Jehôwa dê tòm ƀlàng dơlam hìu duh khoai dê.

II Yal Yau 33:8

Añ rơp ò tai lơh jơng cau Israel dê lik lòt bơh di ù tiah mơ Añ neh ai ală ồng pàng bol mê in, dilah bol khai kơrhia lơh jat jơh ală bơta mơ Añ neh sồr bol khai bơh ală bơta boh lam, ală jơnau lơh nền mơ ală bơta sồr lam neh kơnòm di Môise ai bol mê in.”

II Yal Yau 34:33

Jôsia tă sang jơh ală rùp ràk cù kìr bơh tòm làm jơh ù tiah gơrê bal mơ Israel, mơ khai sồr jơh ală cau gơs mat tòm Israel duh broă Jehôwa Yàng Tom Trồ bol khai dê. Jơh rài kis bol khai dê ò sang lòi mơ kư̆ lòt jat Jehôwa la Yàng Tom Trồ ală ồng pàng bol khai dê.

Esai 31:6

Ơ kòn sau Israel, rê wơl tĕ mơ Kơnràñ la Bơtau mơ bol mê neh jơh nùs tòmdră.

Jeremi 15:19

Gen tàng, Yàng Jehôwa đơs be do: “Dilah mê rê wơl, gen Añ rơp cèng mê wơl mơ mê rơp ntào di đap Añ; Dilah mê sac bơta niam mơ sang bơta iơh, Gen mê rơp duh broă be bơr Añ jê. Bol khai rơp rê wơl mơ mê; Mơya mê bañ rê wơl mơ bol khai.

Jeremi 15:4

Tài bơh Manase, kòn klau Ejekia, bơtau Juda, mơ bơh ală broă khai neh lơh tòm Jerusalem, Añ rơp lơh bol khai in gơlik bơta rngòt rngơt tòm ală lơgar dunnia dê.

Jeremi 18:11

Behơ̆ tàng tŭ do, yal tĕ mơ cau Juda mơ làng bol Jerusalem: ‘Yàng Jehôwa đơs be do: Do, Añ rcang bơta rung rài tòmdră mơ bol mê, mơ bơtào kai gơrmơ̆i tòmdră mơ bol mê. Tŭ do, jơh tơl nă bol mê pơrlac sang tĕ gùng iơh bol mê dê, mơ lơh niam wơl gùng dà mơ ală broă lơh bol mê dê!’

Jeremi 24:9

Añ rơp lơh bol khai in gơlik dô bơta rngòt rngơt, dô bơta iơh rmơh ală lơgar tòm plai ù in, dô bơta dơñŏ tơnhial, jơnau đơs kơnhơl, lah sơrpah, srat sơntơm, tòm ală lơgar mơ Añ rơp bơtrơh bol khai.

Jeremi 25:5

Tòm tŭ ală cau hơ̆ đơs lah: ‘Kòp nă tòm bol mê sang tĕ gùng iơh he dê mơ rê wơl; sang tĕ broă lơh iơh bơsak bol mê dê, mơ ơm tòm lơgar mơ Yàng Jehôwa neh ai oh mi mơ ồng pàng oh mi in sùm sùm.

Jeremi 3:1

Yàng Jehôwa đơs: “Dilah dô nă cau klau sang lòi bau ùr khai dê, Mơ bau ùr lòt bau mơ cau klau ndai, Gen bau klau rơp rê wơl bau mơ cau ùr hơ̆ sơl? Bơta hơ̆ ò lơh lơgar in ngkòr ngkàc dờng ngan sơl ơ? Mê neh lơh gơlềng gơlàng mơ oă ngan cau gơboh, mơ mê kòñ rê wơl mơ Añ ơ?

Jeremi 3:12

Lòt tĕ mơ yal tơnggit ală jơnau do wèt hơ đah đang lah: ‘Ơ Israel ò dòn song, rê wơl tĕ! Yàng Jehôwa đơs, Añ rơp ò sền di ai mơ muh mat gơjrañ tai, Bơh Añ jak nđàc sơngit; Añ ò prap bơta gơjrañ sùm sùm.’ Yàng Jehôwa đơs behơ̆.

Jeremi 3:14

Yàng Jehôwa đơs: “Ơ kòn sau pơrlơ̆ dră, rê wơl tĕ! Bơh Añ la cau tòm bol mê dê. Añ rơp sac dô nă tòm kòp nơm ƀòn dờng, mơ bàr nă bơh kòp hìu nhă, Mơ Añ rơp cèng mê tus hơ Siôn.

Jeremi 3:22

“Ơ kòn sau pơrlơ̆ dră, rê wơl tĕ! Añ rơp sơm bơta ò dòn song bol mê dê.” Bol mê đơs lah: “Do, bol hi rê wơl mơ Kơnràñ, Bơh Kơnràñ la Jehôwa Yàng Tom Trồ bol hi dê.

Jeremi 35:15

Añ kung neh sồr jơh ală dĭ gơna Añ jê, hơ̆ la ală cau gơnoar hwơr lòt tus đơs mơ bol mê: “Kòp nă tòm bol mê sang tĕ gùng iơh bơsak, mơ lơh niam wơl broă lơh bol mê dê. Bañ lòt jat nàng duh broă ală yàng ndai, gen bol mê rơp ơm tòm ù tiah mơ Añ neh ai bol mê mơ ồng pàng bol mê in.” Mơya bol mê ò ai tồr nàng iat, mơ ò bài dòn bơr Añ.

Jeremi 36:3

Tồ cau Juda rơp git ală bơta rung rài lơh nền dùh hơđang bol khai, nàng kòp nă rê wơl sang gùng iơh he, tồ Añ in rgơi toh bơta iơh bơsak mơ tồi glài bol khai dê.”

Jeremi 4:4

Ơ bol mê, la cau Juda mơ làng bol ơm tòm Jerusalem, Siat gơltau tĕ să tòm he Yàng Jehôwa in, Mơ siat gơltau nùs bol mê dê! Dilah ò behơ̆, bơta gơjrañ Añ rơp hơng kung be ồs, Chu pơrguc bol mê, mơ ò gơs cau lơi đơp chơt gơ ò, Tài bơh ală bơta iơh bol mê neh lơh.”

Jeremi 7:3

Yàng Jehôwa Gơnap Gơnoar, Yàng Tom Trồ Israel dê, đơs be do: Rcang niam wơl tĕ ală gùng dà mơ broă lơh bol mê; mơ Añ rơp ơm mơ bol mê tòm tiah do.

Jeremi 7:5

Bơh dilah bol mê rcang wơl gùng dà mơ broă lơh bol mê dê, dilah ngan bol mê lơh broă dô bă song ring bal mơ gơp,

Jeremi 7:7

gen Añ rơp ơm bal mơ bol mê tòm tiah do, tòm ù tiah mơ Añ neh ai ồng pàng bol mê in bơh rài yau jơl tus sùm sùm ò lồi.

Ejekiel 11:18

Tòm tŭ bol khai rơp rê wơl tềng hơ̆, bol khai rơp tă sang jơh ală rùp duh khoai iơh rmơh mơ ală rùp ràk cù kìr.

Ejekiel 18:13

Khai ai cau càn jền mơ sa cồng kơnjơ̆ mơ ai jền cồng oă rlau. Cau lơh behơ̆ rơp geh kis sơl ơ? Ò, khai rơp ò geh kis! Tài bơh khai neh lơh jơh ală bơta cù kìr hơ̆, gen ngan la khai rơp kong chơt, mơ mhàm khai dê rơp ơm hơđang bồ khai.

Ejekiel 43:9

Tŭ do lòi bol khai tă sang ngài bơh di Añ bơta duh khoai ală rùp ràk, mơ ală ƀồc ală bơtau bol khai dê, gen Añ rơp ơm digùl bol khai sùm sùm.

Sră Ôse 14:1

Ơ Israel, rê wơl tĕ hơ Jehôwa Yàng Tom Trồ mê dê, hơ̆ la tài bơh tồi glài mê dê neh lơh mê in gơplơ̆ gơpừ.

Sră Ôse 2:2

Tòmyă tĕ mơ mè bol mê dê, yă tĕ khai, bơh khai ò di la bau ùr Añ, mơ Añ ò di la bau klau khai. Lòi khai sang lòi bơta dri tơlàr bơh di muh mat khai, mơ bơta rềs àr bơh di ntơh khai dê.

Sră Ôse 7:16

Bol khai wèt hơ ală bơta ò gơs kwơ; bol khai kung be dô nơm àtak ò gam niam. Ală cau kwang at bồ bol khai dê rơp gơpừ bơh đào, tài bơh ală jơnau gơjrañ mañ bơh lơmpiat bol khai dê. Bol khai gơlik gơs bơta dơñŏ tơnhial tòm ù tiah Ejiptơ.

Jôel 2:12

Yàng Jehôwa đơs: “Tŭ do, jơh nùs tĕ rê wơl hơ Añ, ơt sa, ñìm rac mơ moat jrùng.

Sacari 1:4

Bañ lơh kung be ồng pàng bol mê dê la cau mơ ală cau gơnoar hwơr tòm rài yau neh yal tơnggit bol khai in lah: Yàng Jehôwa Gơnap Gơnoar Dờng Làm Jơh đơs be do: ‘Pơrlac sang tĕ bơh di gùng iơh mơ bơh broă lơh iơh bol mê dê.’ Mơya bol khai ò bài iat, mơ kung ò ơn nùs tồr iat Añ, Yàng Jehôwa đơs behơ̆.

Yal Wơl 27:15

‘Pal srat sơntơm cau lơi pac sềr dô nơm rùp duh khoai hala tŏ dô nơm rùp ràk, hơ̆ la dô nơm phan cù kìr di đap Yàng Jehôwa, la broă tê cau pac sềr lơh gơs mơ bơtào gơtòm tiah ndơp ndơr.’ Gen jơh làng bol rơp đơs lah: ‘Amen!’

Yal Wơl 4:30

Tòm tŭ bol mê gơs bơta bòl glar kalke mơ jơh ală bơta do gơlik gơs di bol mê, gen tòm ală ngai lồi dut bol mê rơp rê wơl hơ Jehôwa Yàng Tom Trồ bol mê dê mơ dòn bơr Kơnràñ.

Jôsue 24:14

Behơ̆ gen tàng duh rngòt tĕ dê Yàng Jehôwa, mơ duh broă tĕ Kơnràñ dô bă jơh nùs dòn song, sang tĕ ngài bơh di bol mê ală yàng mơ ală ồng pàng bol mê neh duh broă đah ne hiòng mơ tòm lơgar Ejiptơ; duh broă tĕ Yàng Jehôwa.

Ală Kwang Cahrña 10:16

Gen bol khai tă sang ală yàng lơgar bơdìh bơh digùl bol khai mơ duh broă Yàng Jehôwa. Kơnràñ ò jai kong tai sền bơta bòl glar Israel dê.

I Samuel 7:3

Samuel đơs mơ jơh hìu Israel lah: “Dilah ală bol mê jơh nùs rê wơl hơ Yàng Jehôwa, gen sang tĕ ală yàng lơgar bơdìh mơ Astarte bơh digùl bol mê, ơn tĕ song nùs bol mê dê Yàng Jehôwa in, mơ mìng duh broă Kơnràñ lơm, gen Kơnràñ rơp dong tă bol mê bơh di tê cau Philistin.”