Jeremi 32:20 - Sră Goh 2018

²⁰ Kơnràñ neh lơh bơta krơi tềl is tòm Ejiptơ mơ kư̆ pơnjat lơh sùm jơl tus di ngai do, tòm Israel kung be digùl jơh kòn mơnus tòm dunnia, mơ Kơnràñ neh geh tiơng pơnro jơl tus di ngai do.

Jeremi 32:20 Mawu Ofanana

II Samuel 7:23

Gơs làng bol lơi ndai be làng bol Yàng dê, be làng bol Israel sơl ơ? Gơs làng bol lơi ndai tòm plai ù mơ Yàng Tom Trồ neh lòt nàng tơwài be dô nơm làng bol mơ tơmoh mơ sơnđan să tòm Kơnràñ dê, lơh ală broă dờng mơ pal rngòt rngơt ngan bol khai in, hơ̆ la ting bơtrơh bơh di đap làng bol Kơnràñ dê ală làng bol mơ ală yàng bol khai dê.

I Yal Yau 17:21

Mơ ò gơs làng bol lơi ndai be làng bol Israel Kơnràñ dê, la dô nơm làng bol hơđang ù gơs Yàng Tom Trồ lik lòt nàng dong tơwài gơlik gơs làng bol Kơnràñ dê, mơ lơh să tòm Kơnràñ in dô sơnđan dờng mơ pal rngòt tòm bơta ting bơtrơh ală làng bol bơh di đap làng bol Kơnràñ dê la làng bol mơ Kơnràñ neh dong tơwài bơh Ejiptơ?

Nehemi 9:10

mơ neh lơh ală tềl is mơ ală bơta crih crài tòmdră mơ Pharaôn, ală cau duh broă khai, mơ jơh làng bol khai dê; bơh Kơnràñ git lah bol khai neh gơwèt mơ mò pàng bol hi dô bă pơnhừ să. Kơnràñ neh lơh sơnđan Kơnràñ gơs tiơng pơnro jơl tus ngai do.

Nehemi 9:11

Kơnràñ neh cah dàlềng di đap mò pàng bol hi, lòi bol hi tiă dàlềng hơđang ù rañ rsơh. Mơya Kơnràñ neh sơrbì ală cau ting jat bol khai tòm cìr jrô, kung be sơrbì dô nơm lŭ tòm dà dờng.

Đơs Crih 135:9

Kơnràñ lơh gơs tòm lơgar Ejiptơ ală bơta krơi tềl is, Lơh glài Pharaôn mơ jơh ală cau duh broă khai dê.

Lik Ejiptơ 10:2

tồ mê yal wơl ală kòn mơ sau mê in git mbe lơi Añ neh lơh bòl glar di cau Ejiptơ, mơ mbe lơi Añ neh lơh ală tềl is Añ jê digùl bol khai, nàng bol mê git lah Añ la Yàng Jehôwa.”

Lik Ejiptơ 3:20

Behơ̆ Añ rơp pò tê nàng pù lơh cau Ejiptơ tòm jơh ală bơta krơi Añ rơp lơh digùl bol khai. Tơnơ̆ mơ hơ̆, khai rơp ai bol mê in lik lòt.

Lik Ejiptơ 7:3

Mơya Añ rơp lơh kơldang nùs Pharaôn, mơ bulah Añ bơtơl oă bơta krơi tềl is Añ jê tòm lơgar Ejiptơ,

Lik Ejiptơ 9:16

Mơya tơnggume Añ lòi mê in gam kis, hơ̆ la nàng sơnio mê in gŏ gơnap gơnoar Añ jê, mơ bơh hơ̆ sơnđan Añ geh pơnro làm jơh plai ù.

Esai 63:12

La Bơtau neh lơh tơwòr tê gơklŏ Kơnràñ dê, cơnđòa lòt đah ma Môise dê. La Bơtau neh cah dàlềng di đap bol khai, Nàng lơh sơnđan Kơnràñ dê gam sùm sùm;

Esai 63:14

Kung be mpồl phan poan jơng mù tòm thòng, Hwềng Yàng Jehôwa dê neh ai bol khai in ơm rlô bòl. Hơ̆ la Kơnràñ neh tề lam làng bol Kơnràñ dê, nàng lơh gơklŏ sơnđan să tòm Kơnràñ in.

Jeremi 13:11

Yàng Jehôwa đơs: “Kung be dô nơm che but gơđềt di but cau, gen Añ lơh jơh hìu Israel mơ jơh hìu Juda gơđềt mơ Añ kung behơ̆, nàng bol khai lơh gơs dô làng bol Añ, dô sơnđan, dô bơta jòng ro, mơ dô bơta gơklŏ Añ in, mơya bol khai ò bài iat.

Daniel 6:28

Behơ̆ Daniel kư̆ geh bơtoah bơtoài sùm tòm rài at bồ bơtau Darius mơ bơtau Sirus la cau Persia.

Daniel 9:15

Mơ tŭ do, ơ Yàng la Yàng Tom Trồ bol hi dê, la Bơtau neh ai tê gơnoar pràn nàng cèng làng bol Kơnràñ dê lik bơh lơgar Ejiptơ mơ neh lơh pơnro sơnđan Kơnràñ dê jơl tus di ngai do; ai bol hi neh tìs glài, neh lơh bơta iơh bơsak.

Broă 7:36

Khai la cau neh lam bol khai lik bơh lơgar Ejiptơ mơ lơh ală bơta krơi tềl is tòm lơgar Ejiptơ, tòm Dàlềng Pơrhê, mơ tòm ƀlàng bràs ngềt ngơt tòm poan jơt nam.

Yal Wơl 11:3

ală tềl is mơ ală broă Kơnràñ neh lơh tòm Ejiptơ tòmdră mơ Pharaôn bơtau Ejiptơ mơ jơh lơgar khai dê;

Yal Wơl 4:34

Gơs yàng lơi ndai neh lòng tă tơlik khai in dô nơm làng bol bơh di dô nơm làng bol ndai kơnòm di bơta pơrlòng, ală bơta krơi tềl is, bơta tòmlơh, bơh dô nơm tê gơnoar pràn mơ tơwòr tê pò ơnàng, hala bơh ală broă dờng mơ pal rngòt rngơt, be jơh ală bơta Yàng Tom Trồ bol mê dê neh lơh bol mê in tòm Ejiptơ di đap mat tòm bol mê dê sơl ơ?

Yal Wơl 6:22

Yàng Jehôwa neh lơh gơs ală bơta krơi tềl is dờng mơ pal rngòt rngơt ngan hơđang Ejiptơ mơ Pharaôn mơ jơh hìu nhă khai dê.

Yal Wơl 7:19

Bol mê neh sền gŏ mơ mat tòm bol mê dê ală bơta pơrlòng dờng ngan, ală bơta krơi tềl is, tê gơnoar pràn pò dờng mơ Jehôwa Yàng Tom Trồ bol mê dê neh ngui nàng cèng bol mê lik lòt bơh hơ̆. Jehôwa Yàng Tom Trồ bol mê dê kung rơp lơh behơ̆ gơwèt mơ jơh ală làng bol mơ tŭ do bol mê rngòt.