Jeremi 32:18 - Sră Goh 2018

¹⁸ Kơnràñ ràng tơlik bơta kòñ gơboh kơ̆ dơn gơwèt hơ rbô rài, mơya lơh glài bơh bơta tồi glài ồng pàng dê hơđang kòn sau tòm rài tơnơ̆. Khoai Yàng Tom Trồ dờng mơ gơs gơnap gơnoar làm jơh, sơnđan Kơnràñ la Yàng Jehôwa Gơnap Gơnoar Dờng Làm Jơh.

Jeremi 32:18 Mawu Ofanana

Sơnròp Gơlik Gơs 49:24

Khai kơnòm di tê Bơtau Gơnap Gơnoar Làm Jơh Jakôp dê, Gen àtak khai gam kơ̆ sùm. Kơnòm di Bơtau Ê Belàt, la Pơnai Lŭ Israel dê. Mơ bàr nơm tê khai gam sơrbac sơrbang sùm.

II Ală Bơtau 9:26

‘Bơh mhàm Nabôt mơ bơh mhàm kòn sau khai mơ Añ neh gŏ ngai òr; Yàng Jehôwa đơs behơ̆, Añ srat să lah Añ kung rơp tơm wơl mê in di ƀlàng sre do.’ Tài behơ̆ tàng, cèng tĕ khai sơrbì tòm ƀlàng sre do, tòm toh be jơnau Yàng Jehôwa neh đơs.”

Nehemi 1:5

Añ hòi dan be do: “Ơ Jehôwa Yàng Tom Trồ hơđang trồ dê, Yàng Tom Trồ dờng mơ pal duh rngòt, Bơtau prap gàr bơta ho bal mơ gơs nùs kòñ gơboh kơ̆ dơn gơwèt mơ ală cau kòñ gơboh di Kơnràñ mơ prap gàr bơta sồr lam Kơnràñ dê,

Đơs Crih 50:1

Bơtau Gơnap Gơnoar la Yàng Tom Trồ, la Yàng Jehôwa đơs mơ hòi pơjum cau tòm dunnia, Bơh đah mattơngai lik jơl tus di đah mattơngai mut.

Đơs Crih 89:9

Yàng at bồ bơta gơrơndul lơnggac dàlềng dê; Tòm tŭ ryà dà gơguh, gen Yàng lơh gơ in ring ngềt.

Lik Ejiptơ 34:6

Mơ Kơnràñ lòt gan di đap Môise, mơ yal lah: “Jehôwa! Jehôwa! La Yàng Tom Trồ nđàc sơngit mơ kòñ nđàc, òbat gơhào gơjrañ, tơngkah tơngkañ nùs kòñ gơboh kơ̆ dơn mơ dòn song,

Lik Ejiptơ 34:7

prap gàr bơta kòñ gơboh kơ̆ dơn tus rbô rài, toh bơta tồi glài iơh bơsak, bơta gơtup tìs mơ tồi glài. Mơya Kơnràñ ò kòp cau tìs glài la ò gơs glài, tài bơh tồi glài ồng pàng gen Kơnràñ lơh glài kòn sau bol khai dê tus di pe poan rài tơnơ̆.”

Esai 10:21

Dô mpồl gam wơl rơp rê wơl, hơ̆ la dô mpồl gam wơl Jakôp dê rơp rê wơl hơ Yàng Tom Trồ Gơnap Gơnoar Dờng.

Esai 57:15

Bơh Bơtau hơđang jòng rlau jơh, la Bơtau ơm tòm tiah gam sùm sùm, Sơnđan Kơnràñ la Bơtau Sàng Goh, đơs be do: “Añ ơm tòm dô bă tiah jơnhoa mơ sàng goh, mơya kung ơm mơ cau gơs nùs jê sồt gơjrañ sang glài mơ pơndêt să, nàng lơh pa wơl hwềng nùs cau pơndêt să, mơ lơh pa wơl nùs cau gơjrañ sang glài.

Esai 9:6

Bơh gơs dô nă kòn dềt tơnggơs bol he in, hơ̆ la dô nă kòn klau ai bol he in, gơnoar at bồ rơp ơn hơđang pơnì Kơnràñ dê. Kơnràñ rơp geh sơnđan la Bơtau Jak Chài Crih Crài, la Yàng Tom Trồ Gơnap Gơnoar Dờng, la Bèp Gam Sùm Sùm, la Bơtau Ring Lơngai.

Jeremi 10:16

Ò di be Yàng Jehôwa la pơnah sre brê Jakôp dê, Tài bơh Kơnràñ neh crơng gơs jơh ală phan, mơ Israel la jơi bơtiàn sre brê Kơnràñ dê. Sơnđan Kơnràñ la Yàng Jehôwa Gơnap Gơnoar.”

Jeremi 10:6

“Ơ Yàng Jehôwa, ò gơs cau lơi ndròm bal mơ Kơnràñ! Kơnràñ la dờng, Sơnđan Kơnràñ gơs gơnoar pràn dờng ngan.

Jeremi 20:11

Mơya Yàng Jehôwa ơm bal mơ añ kung be dô nă cau ling jak pal rngòt; Gen tàng ală cau kup kơryan añ rơp gơtup pừ, mơ bol khai rơp ò geh pha lin. Bơh bol khai rơp kong ƀàssìl dờng ngan Bol khai rơp ò geh cồng nha, Bơta sền òsơp bol khai dê sùm sùm Ò gơs tŭ lơi hŭi.

Jeremi 31:35

Yàng Jehôwa, la Bơtau neh ai gơnoar sồr mattơngai lơh gơs bơta àng trồ ngai, Ai gơnoar sồr mat kơnhai mơ sơmañ lơh gơs bơta àng tòm trồ mang, Bơtau lơh lơnggac dàlềng, tian gơs ryà gơ nggồr ur ur, Yàng Jehôwa Gơnap Gơnoar la sơnđan Kơnràñ dê đơs lah:

Jeremi 33:2

“Yàng Jehôwa la Bơtau lơh gơs bơta do, Yàng Jehôwa la Bơtau bơt bơtào lơh gơ in kơ̆, Jehôwa la sơnđan Kơnràñ, đơs be do:

Jeremi 50:34

Bơtau Dong tơwài bol khai la pràn kơldang, sơnđan Kơnràñ la Yàng Jehôwa Gơnap Gơnoar. Nền ngan, Kơnràñ rơp dong tò bol khai, nàng Kơnràñ ai jơh lơgar in geh rlô, mơya lơh bòl glar làng bol Babilôn.”

Daniel 2:45

Hơ̆ la jơnau gơtha bơh pơnai lŭ neh phàt bơh mơnơm ò di bơh tê cau dê. Pơnai lŭ hơ̆ jan bơcah lòs, kòng, ù kơnàng, priă mơ màh. Yàng Tom Trồ dờng neh ai bơtau in git bơta rơp gơlik tus tòm ngai tơnơ̆. Bơta mpau la nền cê mơ jơnau gơtha gơ dê la pal dòn.”

Habakuk 1:12

Kơnràñ ò di neh gơs bơh rài yau la gam sùm sùm ò lồi sơl ơ? Ơ Jehôwa Yàng Tom Trồ añ jê, Bơtau sàng goh añ jê? Kơnràñ rơp ò chơt. Ơ Yàng Jehôwa, Kơnràñ neh lơh nền bol khai in nàng cahrña; Ơ Pơnai Lŭ Klềr añ jê! Kơnràñ neh bơtào bol khai nàng lơh glài.

Khà Làng Bol 14:18

‘Yàng Jehôwa la Bơtau òbat gơjrañ, bềng lìu bơta kòñ gơboh, toh glài mơ bơta tòmdră. Bulah Kơnràñ ò sang lòi bơta lơh glài cau tìs glài; Kơnràñ lơh glài ală kòn sau bơh tồi glài ală ồng pàng bol khai dê jơl tus di rài dơ̆ pe mơ dơ̆ poan.’

Mathiơ 27:25

Jơh làng bol ho lah: “Dan mhàm Khai tuh hơđang bol hi mơ kòn sau bol hi dê!”

Luka 6:38

Pà gòi tĕ, gen bol mê rơp geh cau pà wơl; bol khai rơp ai rnoas dờng, jeh, jơlềt rơnggô, bềng lìu, mơ tuh tòm ào jrùh bol mê dê. Bơh bol mê was cau in mơ rnoas lơi, gen cau kung rơp was wơl bol mê in mơ rnoas hơ̆ sơl.”

Yal Wơl 10:17

Bơh Jehôwa Yàng Tom Trồ bol mê dê la Yàng Tom Trồ dờng, gơs gơnoar pràn mơ pal rngòt, Kơnràñ ò cah is cau lơi, ò dòp phan loă.

Yal Wơl 7:21

Bañ rngòt rngơt di bol khai bơh Jehôwa Yàng Tom Trồ bol mê dê la Bơtau ơm digùl bol mê la dờng mơ pal rngòt ngan.