Jeremi 19:13 - Sră Goh 2018

¹³ Ală hìu Jerusalem dê mơ hìu gơlang ală cau bơtau Juda neh gơlik gơs ƀơ̆ iơh, kung be tiah Tôphet; ngan, hơ̆ la hơđang rkàng ală hìu hơ̆ cau neh chu kơlhô ală sơmañ đang trồ, mơ ơn phan ơn ñô ală yàng ndai in.’”

Jeremi 19:13 Mawu Ofanana

II Ală Bơtau 17:16

Bol khai pơndang sang jơh ală bơta boh lam Jehôwa Yàng Tom Trồ bol khai dê mơ lơh bol khai in rùp pac sềr bàr nơm kòn kơnrồ, bol khai bơtào ală jrong duh khoai Asera, duh khoai jơh ală sơmañ đang trồ, mơ duh broă Baal.

II Ală Bơtau 23:10

Khai kung lơh ƀơ̆ ƀơl Tôphet tòm thòng Ben Hinôm, nàng ò gơs cau lơi chu kòn klau hala kòn ùr he tòm ồs, be dô nơm phan ơn rùp ràk Molok in tai.

II Ală Bơtau 23:12

Ală cơnòng duh khoai hơđang rkàng ơdŭ Ahas dê mơ ală bơtau Juda neh bơt; mơ ală cơnòng duh khoai mơ Manase neh bơtào gơs tòm bàr đah ơdŭ mpang hìu duh khoai Yàng Jehôwa dê, gen khai tă tơmù bơh tềng hơ̆ mơ jan bơcah lề lac, mơ rsìh thul gơtòm Croh Kidrôn.

II Ală Bơtau 23:14

Khai pòng bơcah rpot rpet ală jrong duh khoai, sòr tơrlah ală rùp ràk Asera, mơ rsìh ală ntìng ƀồc bềng hơđang hơ̆.

Đơs Crih 74:7

Bol khai neh chu tiah sàng goh Kơnràñ dê, Lơh roh bơta sàng goh tiah ơm sơnđan Yàng dê tơmù tus di ù.

Đơs Crih 79:1

Ơ Yàng Tom Trồ, ală làng bol bơdìh neh mut tòm sre brê Yàng dê, Lơh ƀơ̆ ƀơl Hìu Duh Khoai Sàng Goh Yàng dê, Mơ lòi Jerusalem in gơlik gơs lề lac.

Esai 22:1

Jơnau đơs hwơr bơh thòng bơta gơtơnggŏ: Bơta lơi neh lơh mê in dơrcul, jơh tơl nă bol mê neh hào hơđang rkàng hìu taih?

Jeremi 19:12

Yàng Jehôwa đơs: ‘Añ rơp lơh tiah do bal mơ làng bol gơ; mơ Añ rơp lơh ƀòn dờng do gơlik gơs kung be Tôphet.

Jeremi 32:29

Ală cau Kalde tòmlơh mơ ƀòn do rơp tus, ơn ồs mơ chu gơ, chu tơn ală hìu mơ cau neh ơn kơlhô Baal in hơđang rkàng hìu, mơ ơn phan pơdơng ñô ală yàng ndai, nàng bơrcek Añ gơjrañ.

Jeremi 44:18

Mơya, bơh tŭ bol hi ơm ò chu kơlhô mơ ơn phan ơn ưnngài yàng ùr hơđang trồ, gen bol hi siơ̆u siar ală bơta, mơ kong tơnroh bơh pềs tà jơgloh rung.

Jeremi 52:13

Khai chu hìu Yàng Jehôwa, gơlang bơtau, mơ jơh ală hìu ơm tòm Jerusalem. Ală hìu dờng cau màng ryŭ dê khai chu jơh.

Jeremi 7:18

Kòn dòñ lòng, bèp sing ồs, mơ ală cau ùr bơcă kơmbuh, nàng lơh ƀañ ơn bơtau ùr hơđang trồ, mơ bol khai tuh phan ơn pơdơng ñô ală yàng ndai in, nàng bơrcek Añ gơjrañ.”

Jeremi 8:2

Cau rơp pràng ală ntìng ƀồc hơ̆ hơđơm mattơngai, mat kơnhai, mơ ală sơmañ hơđang trồ, hơ̆ la ală phan mơ bol khai kòñ gơboh, duh broă; la phan bol khai lòt jat, jòi jat mơ duh khoai. Gơ rơp ò geh tơrgòm wơl hala tơp bồr, gơ rơp kung be è hơđang ù.

Ejekiel 20:28

Tòm tŭ Añ neh cèng bol khai mut tòm lơgar mơ Añ neh srat să ho ai bol khai in, mơ bol khai neh gŏ dòr lơi jơnhoa hala tòm chi dờng lơi gơs oă nha, gen tềng hơ̆ bol khai ơn phan ơn duh khoai bol khai dê, ơn ală phan ơn lơh Añ in gơjrañ mañ, chu kơlhô ƀô bơlhu, mơ tuh tơlik phan ơn pơdơng hùc bol khai dê.

Sôphôni 1:5

Mơ ală cau kun bồ hơđang rkàng hìu mơ duh khoai ală mpồl ling hơđang trồ, ală cau kun bồ ai sơnđan Yàng Jehôwa mơ srat să mơ kung ai sơnđan Milkom mơ srat să;

Broă 10:9

Ngai tơnơ̆, tòm tŭ pe nă bol hơ̆ gam lòt rò gùng mơ neh mòr tus ƀòn dờng, pơgap di di jơ prau, Pier guh hơđang rkàng hìu nàng hòi dan.

Broă 7:42

Yàng Tom Trồ đìu ngkòi di bol khai mơ phi bol khai duh khoai ală mpồl ling hơđang trồ, be neh cih tòm sră ală cau gơnoar hwơr lah: ‘Ơ hìu Israel, bol mê neh ơn phan pơdơng mơ phan ơn duh khoai Añ in, Tòm poan jơt nam tòm ƀlàng bràs sơl?

Yal Wơl 4:19

Mơ tòm tŭ bol mê tơnggòr sền hơđang trồ mơ gŏ mattơngai, mat kơnhai mơ ală sơmañ, jơh ală gơnap gơnoar hơđang trồ, gen bañ gơkòl ơniai mơ kun bồ duh khoai ală phan mơ Jehôwa Yàng Tom Trồ bol mê dê neh tòmpà jơh ală làng bol in ơm hơđang ù.