Jeremi 15:4 - Sră Goh 2018

⁴ Tài bơh Manase, kòn klau Ejekia, bơtau Juda, mơ bơh ală broă khai neh lơh tòm Jerusalem, Añ rơp lơh bol khai in gơlik bơta rngòt rngơt tòm ală lơgar dunnia dê.

Jeremi 15:4 Mawu Ofanana

II Ală Bơtau 21:1

Manase neh jơt bàr sơnam tòm tŭ khai sơntòm at bồ; khai at bồ pram jơt pram sơnam tòm Jerusalem. Mè khai sơnđan la Hepjiba.

II Ală Bơtau 21:15

bơh bol khai lơh ală bơta iơh di đap Añ, bơrcek bơta gơjrañ Añ, bơh ngai ồng pàng bol khai lik bơh lơgar Ejiptơ jơl tus ngai do.’”

II Ală Bơtau 21:2

Khai lơh bơta iơh di đap Yàng Jehôwa mơ lòt jat bơta cù kìr ală làng bol mơ Yàng Jehôwa neh bơtrơh tơlik di đap làng bol Israel.

II Yal Yau 33:1

Manase tơl jơt bàr nam tòm tŭ khai gơs bơtau at bồ mơ khai at bồ pram jơt pram nam tòm Jerusalem.

II Yal Yau 33:2

Khai lơh bơta iơh bơsak di đap mat Yàng Jehôwa, lơh jat ală broă cù kìr ală làng bol mơ Yàng Jehôwa neh bơtrơh tơlik di đap cau Israel.

Jeremi 24:9

Añ rơp lơh bol khai in gơlik dô bơta rngòt rngơt, dô bơta iơh rmơh ală lơgar tòm plai ù in, dô bơta dơñŏ tơnhial, jơnau đơs kơnhơl, lah sơrpah, srat sơntơm, tòm ală lơgar mơ Añ rơp bơtrơh bol khai.

Jeremi 29:18

Añ rơp ai pềs tà, jơgloh rung mơ pluh plàng ting jat bol khai, rơp lơh bol khai in gơlik dô bơta rngòt rngơt digùl ală lơgar tòm dunnia, lơh gơs bơta srat sơntơm, cù kìr, dơñŏ tơnhial, ƀàssìl ƀàsso digùl ală làng bol mơ Añ neh bơtrơh bol khai tus.”

Jeremi 34:17

Behơ̆ gen, Yàng Jehôwa đơs be do: ‘Bol mê neh ò iat Añ, kòp nă yal oh mi he in, cau gơp ƀòn he geh khat gơboh.’ Yàng Jehôwa đơs: ‘Do, Añ yal bơta khat gơboh bol mê in, hơ̆ la lòi bol mê in khat gơboh tòm pềs tà, pluh plàng, jơgloh rung, lòi bol mê kong rngòt rngơt digùl ală lơgar tòm dunnia.

Jeremi 9:16

Añ rơp rsìh bol khai digùl ală làng bol mơ bol khai mơ ồng pàng bol khai dê òhềt git; Añ rơp sồr đào ting jat, jơl tus di tŭ neh tơnroh jơh bol khai.”

Ñìm Rac 1:8

Jerusalem neh tìs glài dờng ngan, behơ̆ tàng khai gơlik gơs dô bơta dơñŏ tơnhial. Jơh ală cau sền dờng màng di khai sền òsơp khai wơl, bơh bol khai neh sền gŏ bơta ơm kuh lòi rồ khai dê. Ai să tòm khai gen rơnđơh mơ wèt muh mat khai dê hơ tiah ngài.

Ejekiel 18:19

Bulah behơ̆ bol mê gam lùp lah: ‘Ñchi bơh tài cau kòn ò kong bơta lơh glài bal mơ bèp khai dê taih?’ Tài bơh cau kòn neh lơh jat bơta song mơ dimơ neh kơrhia prap gàr jơh ală jơnau sồr Añ jê: ngan la khai rơp kis.

Ejekiel 23:46

Jehôwa Yàng Tom Trồ đơs be do: ‘Cèng tĕ dô mpồl cau oă tòmsò mơ bol khai, mơ jào phi tĕ bol khai tòm bơta rngòt rngơt mơ tòmpìt tòmhà.

Lebi 26:33

Añ rơp rsìh bol mê tòm gùl ală làng bol mơ Añ rơp tă đào ting jat bol mê. Lơgar bol mê dê rơp gơkòl sang lòi srau gòi, mơ ală ƀòn dờng bol mê dê rơp kong tơnroh.

Yal Wơl 28:25

Yàng Jehôwa rơp lòi bol mê kong alah di đap ală cau sò tơm bol mê dê. Bol mê rơp bơh dô đah brồ lơh bol khai mơya rơp ntoat dô tòm poh đah, mơ bol mê rơp gơlik gơs dô nơm phan cù kìr di đap jơh ală lơgar hơđang ù.

Yal Wơl 28:64

Gen Yàng Jehôwa rơp rsìh bol mê digùl jơh ală làng bol, bơh jơng trồ do tus hơ jơng trồ ne. Tềng hơ̆ bol mê rơp duh khoai ală yàng ndai, la ală yàng mơ chi mơ lŭ mơ bol mê hala ală ồng pàng bol mê dê kung ò tŭ lơi git.