I Samuel 17:26 - Sră Goh 2018

²⁶ Gen Dabit lùp ală cau ơm rềp mơ khai lah: “Ñchi rơp lơh di cau rgơi tơnchơt cau Philistin do mơ tă sang bơta ƀàssìl bơh Israel? Cau Philistin ò siat gơltau do la ñcau mơ khin đơs pơrlòng ală mpồl ling Yàng Tom Trồ kis sùm sùm dê taih?”

I Samuel 17:26 Mawu Ofanana

II Ală Bơtau 19:4

Digơlan Jehôwa Yàng Tom Trồ ồng neh kơno ală jơnau Rapsake, mơ bơtau Asiri, cau tòm khai, neh sồr khai tus srat rma Yàng Tom Trồ kis gam sùm sùm, mơ Jehôwa Yàng Tom Trồ ồng rơp lơh glài ală jơnau Kơnràñ neh kơno. Behơ̆, dan hòi dan tĕ ala ală cau gam kis in.’”

II Yal Yau 32:17

Cau bơtau kung cih ală sră pơyoa srat sơntơm Jehôwa Yàng Tom Trồ Israel dê mơ đơs ală jơnau do tòmdră mơ Kơnràñ: “Kung be ală yàng ală làng bol ală lơgar ndai dê ò dong tă làng bol bol khai dê klàs bơh di tê añ, gen kung behơ̆ sơl Yàng Tom Trồ Ejekia dê rơp ò dong tă làng bol khai dê klàs bơh di tê añ.”

Nehemi 5:9

“Bơta bol mê lơh la ò niam. Bol mê pal lơh lòt dô bă duh rngòt di Yàng Tom Trồ he, nàng kơryan jơnau dơñŏ tơnhial ală làng bol la cau sò tơm bol he dê ơ?

Đơs Crih 44:13

Yàng lơh bol hi in be phan cau gơp ƀòn hi dơñŏ tơnhial, Be phan bơtat bơtròh mơ bơrsèl tơnhial gùt dar bol hi.

Đơs Crih 74:18

Ơ Yàng Jehôwa, dan kah mbe cau sò tơm đơs bơtat bơtròh, Mơ dô nơm làng bol tùl gơla đơs tràl sơrbil di sơnđan Kơnràñ.

Đơs Crih 79:12

Ơ Yàng Jehôwa bơta bơtat bơtròh mơ cau ơm rềp di bol hi neh bơtat bơtròh di Yàng, Dan tơm bơta hơ̆ poh dơ̆ di ntơh cau gơp ƀòn bol hi dê.

Esai 37:23

Mê neh lah sơrpah mơ đơs tràl sơrbil di ñcau taih? Mê neh dờng bơr tòmdră mơ pò mat jòng să mơ ñcau taih? Hơ̆ la tòmdră mơ Bơtau Sàng Goh Israel dê?

Jeremi 10:10

Mơya Yàng Jehôwa la Yàng Tom Trồ song ngan; Kơnràñ la Yàng Tom Trồ kis sùm, la Bơtau gam sùm sùm. Bơh bơta gơjrañ Kơnràñ dê ù gơlơnggơr, Ală làng bol ò jai kong bơta gơjrañ Kơnràñ dê.

Jeremi 9:25

Yàng Jehôwa đơs: “Nền cê ngan, ngai rơp tus, tòm tŭ Añ rơp lơh glài kòp nă cau geh siat gơltau đah bơdìh:

Jeremi 9:26

hơ̆ la Ejiptơ, Juda, Edôm, kòn sau Ammôn, Môap, mơ jơh ală cau koah sŏ di gah tồr mơ ơm tòm ƀlàng bràs. Bơh jơh ală làng bol do ò kong siat gơltau, mơ jơh hìu Israel neh ò siat gơltau tòm nùs.”

Ejekiel 28:10

Mê rơp chơt bơh tê cau lơgar bơdìh, be bơta chơt cau ò geh siat gơltau. Jehôwa Yàng Tom Trồ đơs lah: Añ neh đơs behơ̆.’”

Daniel 5:23

Gơsơlơ̆u wơl, bơtau neh pơnhừ să tòmdră mơ Yàng hơđang trồ, mơ sồr cèng di đap bơtau ală phan ngui tòm hìu duh khoai Kơnràñ dê mơ ngui nàng ñô tơrnòm bal mơ ală cau kwang dờng, ală bau ùr mơ ală bau cồng bơtau dê. Bơtau kung neh jòng ro ală yàng mơ priă, mơ màh, mơ kòng, mơ lòs, mơ chi, mơ lŭ, la ală yàng ò gŏ, ò kơno, mơ ò git wă bơta lơi. Bơtau ò jòng ro Yàng Tom Trồ la Bơtau at tòm tê Kơnràñ dê nhơm tă mơ jơh ală gùng dà bơtau dê.

Daniel 6:27

Kơnràñ dong tă mơ dong klàs, lơh ală tềl is bơta krơi hơđang trồ mơ tòm ù, Kơnràñ neh dong tă Daniel bơh di gơnoar pràn ală klìu triă dê.”

Daniel 9:16

Ơ Yàng, añ hòi dan mơ Yàng jat jơh ală bơta sồr lam song ring Kơnràñ dê, dan Yàng pơrlac sang bơta gơjrañ dờng Kơnràñ dê bơh dê Jerusalem la ƀòn dờng mơ la mơnơm sàng goh Kơnràñ dê. Tài bơh tồi glài bol hi dê mơ bơta iơh bơsak ồng pàng bol hi dê tàng Jerusalem mơ làng bol Kơnràñ dê pal kong bơta bơtat bơtròh bơh dê ală làng bol ơm gùt dar bol hi.

Jôel 2:19

Yàng Jehôwa rơp ho wơl mơ bol khai lah: “Do, Añ rơp ai bol mê in: kòi mbo, tơrnòm pa, mơ mơñà, tơl nàng bol mê in geh hòm lai wil tơl; mơ Añ ò tai lơh bol mê in gơlik gơs dô jơnau cau dơñŏ tơnhial digùl ală làng bol.

Yal Wơl 5:26

Bơh tŭ lơi gơs kòn mơnus lơi neh kơno sap đơs Yàng Tom Trồ kis gam sùm sùm đơs bơh tòm ồs kung be bol hi neh kơno mơ gam kis taih?

I Tesalônika 1:9

Bơh să tòm bol khai yal wơl mbe lơi bol hi tus digùl oh mi, mơ mbe lơi oh mi neh sang rùp ràk mơ rê wơl hơ Yàng Tom Trồ, nàng duh broă Yàng Tom Trồ gam kis sùm mơ song ngan,

Jôsue 3:10

Bơh bơta do bol mê rơp git Yàng Tom Trồ la Bơtau kis gam sùm sùm ơm digùl bol mê, mơ ngan la Kơnràñ rơp ting bơtrơh bơh di đap bol mê làng bol Kanaan, làng bol Hetit, làng bol Hebit, làng bol Pherijit, làng bol Girgasit, làng bol Amôrit mơ làng bol Jebusit:

I Jang 5:20

Bol he git lah Kòn Yàng Tom Trồ dê neh lòt tus, Kơnràñ neh ai bơta git wă bol he in nàng bol he in dòp git Bơtau song ngan, mơ bol he ơm tòm Bơtau song ngan, la ơm tòm Yàng Jesu Krist, Kòn Kơnràñ dê. Hơ̆ la Yàng Tom Trồ Bơtau song ngan mơ la bơta kis gam sùm sùm.

I Samuel 11:2

Mơya Nahas cau Ammôn ho lah: “Tòm bơta pal càng do gen añ rơp lơh dô bơta ho bal mơ bol mê, tŭ lơi bol hi klĕ mat đah ma kòp nă bol mê dê nàng lơh ƀàssìl hơđang jơh Israel.”

I Samuel 14:6

Jônathan đơs mơ cau ling àñ phan tòmlơh khai dê lah: “Tus tĕ, bol he lòt hơ tiah ơm kơp gàr ală cau ò siat gơltau hơ̆ dê mơ lòi bol khai sền gŏ he. Digơlan Yàng Jehôwa rơp lơh broă ala bol he in. Ò gơs bơta lơi rgơi kơryan Yàng Jehôwa tòm bơta dong tă, bơh oă cau hala bơh dô êt cau.”

I Samuel 17:10

Cau Philistin đơs tai lah: “Ngai do añ đơs pơrlòng mơ ală mpồl ling Israel dê; sồr tĕ dô nă cau tus mơ añ nàng bol hi tòmlơh bal.”

I Samuel 17:30

Gen khai wơlke lòt tus hơ ală cau ndai mơ lùp kung be lài; mơ cau ho wơl khai in kung be lài sơl.

I Samuel 17:36

Cau duh broă bơtau dê neh tơnchơt klìu triă mơ jơgơu, gen cau Philistin ò siat gơltau do rơp gơlik gơs kung be dô nơm tòm bol gơ, bơh khai neh đơs jơnau pơrlòng ală mpồl ling Yàng Tom Trồ gam kis sùm sùm dê.

I Samuel 31:4

Sol đơs mơ cau àñ phan tòmlơh khai dê lah: “Tă tĕ đào mê mơ srơp añ, rngòt ală cau ò siat gơltau ne rơp tus srơp añ mơ lơh ƀàssìl di añ mòn!” Mơya cau àñ phan tòmlơh khai dê rngòt ngan mơ ò bài lơh behơ̆; behơ̆ Sol ai đào khai dê mơ tòmpừ is să khai di cồng gơ.