Daniel 9:4 - Sră Goh 2018

⁴ Behơ̆, añ hòi dan mơ Jehôwa Yàng Tom Trồ añ jê, yal glài mơ đơs lah: “Ơ Yàng la Yàng Tom Trồ dờng rlau jơh mơ pal rơm să rngòt, Kơnràñ prap gàr jơnau ho bal tòm bơta kòñ gơboh kơ̆ dơn gơwèt hơ ală cau kòñ gơboh dê Kơnràñ mơ lơh jat ală bơta sồr lam Kơnràñ dê.

Daniel 9:4 Mawu Ofanana

I Ală Bơtau 8:23

Khai đơs lah: “Ơ Jehôwa, Yàng Tom Trồ Israel dê! Ò gơs Yàng Tom Trồ lơi be Kơnràñ, bơh hơđang trồ jòng hala tòm ù hơđơm; Yàng prap gàr bơta ho bal mơ bơta kòñ gơboh kơ̆ dơn gơwèt mơ ală dĭ gơna Yàng, la ală cau lòt di đap Yàng dô bă jơh nùs,

II Yal Yau 7:14

dilah làng bol Añ jê la làng bol geh hòi mơ sơnđan Añ rơp tơnliah să bol khai dê mơ hòi dan jòi jat muh mat Añ mơ pơrlac sang gùng dà iơh bơsak bol khai dê, gen Añ rơp iat bơh hơđang trồ mơ rơp toh glài bol khai in mơ rơp sơmbòi lơgar bol khai dê.

Ejra 10:1

Tòm tŭ Ejra hòi dan mơ yal glài, ñìm rac mơ tơmbic să di đap hìu Yàng Tom Trồ dê, gơs dô mpồl gal ngan cau Israel, cau klau, cau ùr mơ cau kơnòm dềt, pơjum bal gùt dar khai, bol khai kung ñìm rac sràt bơtang ngan.

Nehemi 1:5

Añ hòi dan be do: “Ơ Jehôwa Yàng Tom Trồ hơđang trồ dê, Yàng Tom Trồ dờng mơ pal duh rngòt, Bơtau prap gàr bơta ho bal mơ gơs nùs kòñ gơboh kơ̆ dơn gơwèt mơ ală cau kòñ gơboh di Kơnràñ mơ prap gàr bơta sồr lam Kơnràñ dê,

Nehemi 9:32

Behơ̆ tŭ do, Ơ Yàng Tom Trồ bol hi dê, la Yàng Tom Trồ dờng ngan, gơnap gơnoar, mơ pal rngòt, Bơtau lơh jat bơta ho bal kòñ gơboh, dan Kơnràñ bañ sền nggòc ală bơta jê sồt bòl glar neh tus hơ bol hi, hơđang ală cau bơtau mơ ală kwang bàng, hơ ală cau gơnoar ơn phan duh khoai mơ ală cau gơnoar hwơr, hơ ală mò pàng bol hi, mơ jơh làng bol Kơnràñ dê, bơh rài ală bơtau Asiri tus tŭ do.

Đơs Crih 32:5

Añ neh yal tơlik glài añ jê Yàng in, ò pồn bơta tồi glài iơh bơsak añ jê; Añ đơs lah: “Añ rơp yal ală bơta tìs glài añ jê Yàng Jehôwa in,” Gen Yàng neh toh bơta tồi glài añ jê.

Lik Ejiptơ 20:6

mơya rơp yal tơlik bơta kòñ gơboh jơl tus rbô rài gơwèt hơ ală cau kòñ gơboh di Añ mơ prap gàr ală bơta sồr lam Añ jê.

Jeremi 3:13

‘Mìng mê pal dòp git tồi glài mê dê, Mê neh pơrlơ̆ dră mơ Jehôwa Yàng Tom Trồ mê dê; Mê neh lòt nrah nring digùl ală yàng ndai hơđơm kòp nơm chi tơlir, Mơ ò lơh jat jơnau Añ.’” Yàng Jehôwa đơs behơ̆.

Jeremi 32:23

Bol khai neh mut ai lơgar do lơh gơs sre brê, mơya bol khai ò dòn bơr Kơnràñ, ò lòt jat bơta boh lam Kơnràñ dê, ò lơh jat dô bơta lơi tòm ală bơta Kơnràñ neh nting sồr pal lơh jat. Tài behơ̆ tàng Kơnràñ neh dùh ală bơta rung rài do hơđang bol khai.

Daniel 6:10

Bulah Daniel neh kơno la jơnau bơkơ̆u hơ̆ cau bơtau neh lơh tềl sơnđan mat rau, khai kư̆ gam rê hơ hìu khai, tềng hơ̆ gơs ală mpồng dềt tòm ơdŭ jơnhoa hơđang, Daniel òs pò ală mpồng dềt wèt hơ đah Jerusalem, mơ cùn gơltang dô ngai pe dơ̆ hòi dan, mơ jòng ro Yàng Tom Trồ jat be khai neh òs lơh bơh lài.

Daniel 9:3

Behơ̆, añ wèt mat hơ Yàng la Yàng Tom Trồ, jòi jat Kơnràñ bơh bơta hòi dan, rac ròc bal mơ bơta ơt sa, soh ồi ào bài sơnò kiat mơ nggui tòm bùh.

Luka 1:72

Nàng yal tơlik bơta kòñ nđàc gơwèt mơ ồng pàng bol he, Mơ kah wơl bơta ho bal sàng goh Kơnràñ dê.

Rôma 8:28

Bol he git lah tòm jơh ală bơta, Yàng Tom Trồ lơh tồ gơs kwơ cau lơi in kòñ gơboh di Kơnràñ, hơ̆ la cau neh geh hòi sac jat bơta lơh nền Kơnràñ dê.

Yal Wơl 5:10

mơya ràng tơlik bơta kòñ gơboh rbô rài ală cau in kòñ gơboh di Añ mơ prap gàr ală bơta sồr lam Añ jê.

Yal Wơl 7:12

Dilah bol mê ơn nùs tồr dê ală bơta boh lam do mơ kơrhia lòt jat ală bơta hơ̆ gen Jehôwa Yàng Tom Trồ bol mê dê rơp prap gàr bơta ho bal bơh bơta kòñ gơboh mơ bol mê tòm toh jat be Kơnràñ neh srat să ho nền mơ ală ồng pàng bol mê dê.

Yal Wơl 7:21

Bañ rngòt rngơt di bol khai bơh Jehôwa Yàng Tom Trồ bol mê dê la Bơtau ơm digùl bol mê la dờng mơ pal rngòt ngan.

Yal Wơl 7:9

Gen tàng, dòp git tĕ Jehôwa Yàng Tom Trồ bol mê dê la Yàng Tom Trồ: Kơnràñ la Yàng Tom Trồ lơh jat jơnau ho Kơnràñ dê, prap gàr bơta ho bal kòñ gơboh Kơnràñ dê tus di rbô rài ală cau in kòñ gơboh di Kơnràñ mơ prap gàr ală bơta sồr lam Kơnràñ dê.

Jakơ 1:12

Lơngai cau in kong jai bơta gơlòng bòl glar, bơh tòm tŭ neh kong jai bơta lòng rau gen rơp dòp geh sơgơn bơtau bơta kis mơ Yàng neh ho pơgon ai cau in kòñ gơboh di Kơnràñ.

Jakơ 2:5

Ơ oh mi kòñ gơboh añ jê, iat tĕ do: Yàng Tom Trồ ò di neh sac cau rƀah tòm rài do nàng dòp geh bơta pas sơm tòm bơta dòn, mơ pơrdòn lơgar Kơnràñ neh ho pơgon mơ cau kòñ gơboh di Kơnràñ ò ơ?