Cau Bơto 8:17 - Sră Goh 2018

¹⁷ gen añ kung gŏ jơh ală broă lơh Yàng Tom Trồ dê, mơ ò gơs dô nă cau lơi rgơi jòi bàn ală bơta gơlik gơs hơđơm mattơngai, bulah bol khai kong bòl glar kàr lơi nàng jòi, kung ò rgơi jòi geh; mơ bulah cau jak chài dan nàng git, bol khai kung ò rgơi jòi bàn.

Cau Bơto 8:17 Mawu Ofanana

Sră Jop 5:9

Kơnràñ lơh ală broă dờng ò rgơi jòi bàn, Lơh ală bơta crih crài ò rgơi kòp.

Đơs Crih 104:24

Ơ Yàng Jehôwa, ală broă Kơnràñ dê la oă ngan ò git lơh! Kơnràñ neh lơh jơh ală bơta dô bă jak chài ngan; Plai ù bềng lìu ală phan kis mơ Kơnràñ neh crơng gơs.

Đơs Crih 40:5

Ơ Jehôwa Yàng Tom Trồ añ jê, ală broă crih crài Yàng neh lơh, Mơ ală bơta kơlôi sơnơng Kơnràñ dê gơwèt mơ bol hi la oă ngan, Ò gơs cau lơi rgơi pơndròm mơ Yàng! Dilah añ kòñ yal tơlik đơs bơh ală broă hơ̆, Gen gơ la oă ngan, ò jai kòp.

Đơs Crih 73:16

Mơya tòm tŭ añ kơlôi mbe lơi nàng wă ală bơta hơ̆, sền gơlơh be bòl glar kalke ngan añ in,

Cau Bơto 1:13

Ơn nùs nàng jòi mơ bàn bơta jak chài jơh ală broă lơh gơs hơđơm trồ do; hơ̆ la dô nơm broă bòl glar mơ Yàng Tom Trồ neh jào kòn mơnus in nàng giga mơ gơ.

Cau Bơto 11:5

Kung be mê ò git mbe lơi gơs nhơm tă, mơ gơlik ntìng tòm kơndul mè, behơ̆ mê ò git broă lơh Yàng Tom Trồ dê, Bơtau crơng gơs jơh ală jơi phan.

Cau Bơto 3:11

Bơh Kơnràñ neh lơh gơs jơh ală bơta tòm toh di tŭ gơ dê. Mơ bơh hơ̆ Kơnràñ neh ơn bơta jak chài tòm tŭ neh rlau mơ tŭ rơp tus tòm dơngoh kòn mơnus; bulah behơ̆, bol khai ò rgơi jòi bàn ală broă Yàng Tom Trồ neh lơh bơh sơnròp jơl tus lồi dut.

Cau Bơto 7:13

Sền sơwì tĕ broă lơh Yàng Tom Trồ dê; ñcau rgơi lơh song wơl ală phan Yàng neh lơh kwe taih?

Esai 40:28

Mê ò git sơl ơ? Mê òhềt kơno sơl ơ? Yàng Jehôwa la Yàng Tom Trồ kis gam sùm sùm, la Bơtau Crơng Gơs ală tiah lồi dut plai ù dê. Kơnràñ ò bòl ò glar, bơta git wă Kơnràñ dê ò gơs cau lơi rgơi jòi bàn.

Rôma 11:33

Ô! Jrô ndơp ngan ală bơta pas gơs, bơta jak chài mơ bơta git jak Yàng Tom Trồ dê! Ală bơta lơh nền Kơnràñ dê ñcau rgơi ràng tơlik! Gùng dà Kơnràñ dê ñcau rgơi git wă!