1 TIMOTHI 1:5 - KA BAIBL

⁵ Hynrei, ka jingthmu ka jong kata ka hukum ka long ka jingieit na ka dohnud bakhuid bad ka jingïatiplem babha bad ka jingngeit bakhlem arsap:

Khasi CL Bible (BSI)

⁵ Ka jingthmu jong kane ka hukum ka long ban pynkhih ïa kata ka jingieit kaba wan na ka dohnud kaba sngur, ka jingïatiplem bakhuid, bad ka jingngeit bashisha.

1 TIMOTHI 1:5 Mawu Ofanana

SALM 24:4

Uta u bakhuid ki kti, bad u bakhuid ka dohnud; u bym shym la kyntiew ïa la ka mynsiem sha ka jingthala, bad u bym shym la smai shukor.

SALM 51:10

To pynlong ka dohnud ka bathymmai hapoh jong nga, A U Blei: bad to pynthymmai ïa ka mynsiem kaba beit hapoh jong nga.

JEREMAÏAH 4:14

A Jerusalem, to sait ïa la ka dohnud na ka jingbymman, ba yn pynim ïa pha. Slem katno ki jingmut basniew jong pha kin shong hapoh jong pha?

SEPHANAÏAH 3:7

Nga la ong, ‘Shisha phan sheptieng ïa nga, phan pdiang ïa ka jingsneng; ba kumta ïa ka jaka shong jong ka yn ym ot noh, katba kum ïa kiei kiei baroh ba nga la buh shaphang jong ka:’ pynban, ki la khie dang step bad ki la pynpyut ïa la ki jingleh baroh.

MATHAÏOS 12:35

U briew u babha u sei noh ïa kiei kiei ki babha na ka jingkynshew ka babha ka dohnud jong u: u briew babymman ruh u sei noh ïa kiei kiei babymman na ka jingkynshew babymman jong u.

MATHAÏOS 5:8

“Suk ki bakhuid ha ka dohnud: naba kin ïohi ïa U Blei.

KI KAM 15:9

te um shym la pynïapher ei ei ruh hapdeng jong ngi bad jong ki, ba u da pynkhuid ïa ki dohnud jong ki da ka jingngeit.

KI KAM 23:1

Te u Paul haba u la khmih shaiñ ha kata ka dorbar u la ong, “Ko ki para, nga la ïaid beit ha ka jingïatiplem babha baroh ha khmat U Blei haduh kane ka sngi.”

KI KAM 24:16

Ha kane, nga hi ruh nga pynmlien ïa lade, ban ïoh khlem da pud ka jingïatiplem ba khlem pynthut sha U Blei bad sha ki briew.

Ka Shithi U Paul Sha Ki Nong Rom 10:4

Namar U Khrist u long ka jingkut ka hukum ïa ka ban long ka hok ïa uwei pa uwei uba ngeit.

Ka Shithi U Paul Sha Ki Nong Rom 12:9

To ka jingieit kan long kaba khlem arsap. To kiar noh sngewtriem na kata ka basniew, to snoh ha kata ka babha.

Ka Shithi U Paul Sha Ki Nong Rom 14:15

Hynrei, lada la pynsngewsih ïa uta u parabangeit jong me na ka bynta i jingbam, mem ïaid shuh katba kum ka jingïa-ieit. Wat pynjot noh da ita i jingbam jong me ïa uta uba na ka bynta jong u, U Khrist u la ïap noh.

Ka Shithi U Paul Sha Ki Nong Rom 9:1

Nga kren ïa kaba shisha ha U Khrist, ngam lamler keiñ, ka jingïatiplem jong nga ka da ïaphla shai ryngkat bad nga ha U Mynsiem Bakhuid,

1 KORINTH 13:1

La nga kren da ki thylliej ki briew bad ki angel, haba ngam don ka jingieit, nga la jia long kum ka wiang rnong basawa, ne kum ka shakuriaw bariew shaw shaw.

2 KORINTH 1:12

Namar ka jingkmen jong ngi ka long kane keiñ, ka jingphla ka jingïatiplem jong ngi, ba ha ka jingkhuid bad ha ka jingsngur bariewblei, ym ha ka jingstad bakynja doh, hynrei, ha ka jingaiei U Blei, ngi la pynïaid ïa lade ha ka pyrthei, bad kham bun eh sha phi.

GALATIA 5:22

Hynrei, u soh jong U Mynsiem u long ka jingieit, ka jingkmen, ka jingsuk, ka jingshahslem, ka jinglehsbun, ka jingbha, ka jingïaineh, ka jingjemnud, ka bor halor lade:

GALATIA 5:6

Namar ha U Khrist Jisu, ka jingotsher kam lah leh ei ei ruh, lymne ka jingbym-otsher, hynrei, ka jingngeit kaba trei da ka jingieit.

DEUTERONOMI 10:12

“Mynta te, ko Israel, U Trai uba U Blei jong me u kwah aïu na me, tang ba men sheptieng ïa U Trai uba U Blei jong me, bad men ïaid ha ki lynti jong u baroh, bad men ieit ïa u, bad men shakri ïa U Trai uba U Blei jong me da la ka dohnud baroh, bad da la ka mynsiem baroh,

1 TIMOTHI 1:18

Ïa kane ka hukum nga aiti ha me, ko Timothi u khun jong nga, katba kum kita ki jingïathuhlypa kiba la long mynshuwa shaphang jong me, ba da ki, men ïoh ïaleh thma ïa kata ka jingïaleh thma babha;

1 TIMOTHI 1:19

da kaba bat ïa ka jingngeit bad ïa ka jingïatiplem babha; ïa kaba don kiba haba ki la bred noh ïa ka, ki la paitlieng shaphang kata ka jingngeit:

1 TIMOTHI 3:9

kiba bat ïa ka jingmaïan ka jingngeit ha ka jingïatiplem bakhuid.

2 TIMOTHI 1:3

Nga ainguh ïa U Blei, ïa uba nga shakri na la ki kpa tymmen da ka jingïatiplem bakhuid, ba nga don ka jingkynmaw kaba khlem da pud keiñ shaphang jong me ha ki jingduwai jong nga mynmiet bad mynsngi,

2 TIMOTHI 1:5

haba nga la kynmaw ïa kata ka jingngeit bakhlem arsap kaba ha me, kaba la shong nyngkong ha ka kiaw jong me ka Lois, bad ka kmie jong me ka Ïuniki; bad nga ngeit skhem, ha me ruh.

2 TIMOTHI 2:22

Hynrei, to phet ïap noh na ki jingkwah brai ka jinglong samla; bad to beh brai ïa ka hok, ïa ka jingngeit, ïa ka jingieit, ïa ka jingsuk, lem bad kita kiba khot kyrpad ïa U Trai na ka dohnud bakhuid.

TITOS 1:15

Kiei kiei baroh ki long khuid ha kita ki bakhuid: hynrei, ha kita ïa kiba la pyntngit bad ki bymngeit, kaei kaei ruh em kam long khuid; hynrei, la pyntngit ïa ka jingmut bad ïa ka jingïatiplem jong ki.

HEBRU 10:22

to ngin ïawan hajan da ka dohnud bashisha ha ka jingsngewskhem bha ka jingngeit, ba la synreit ïa ki dohnud jong ngi na ka jingïatiplem basniew, bad ba la sait ïa ki met jong ngi da ka um bakhuid:

HEBRU 13:18

To ïaduwai na ka bynta jong ngi, namar ngi ngeit ba ngi don ka jingïatiplem babha; ba ngi da kwah ban im hok ha kiei kiei baroh.

HEBRU 9:14

da katno tam ka snam U Khrist, uba da U Mynsiem bymjukut u la ainguh ïa lade ba khlem jingduna ha U Blei, kan pynkhuid ïa ka jingïatiplem jong phi na ki jingleh baïap, ïa ka ban shakri ïa U Blei ba-im?

JAKOB 4:8

To wan hajan ïa U Blei, te un wan hajan ïa phi. To thet noh ïa la ki kti, ko phi ki bapop, bad to pynkhuid noh ïa la ki dohnud, ko phi kiba synrop mynsiem.

1 PETROS 1:22

Haba phi la pynkhuid ïa ki mynsiem jong phi ha kaba kohnguh ïa ka jingshisha da U Mynsiem, ïa ka ban ïa-ieit parabangeit khlem arsap, to phin da ïa-ieit shitrhem paralok hi naduh ka dohnud:

1 PETROS 3:16

da kaba phi ïaibat ïa ka jingïatiplem babha, ba, ha kata kaba ki ïakrenbeiñ ïa phi, yn ïoh pynsngewlehrain ïa kita kiba kren wad daw eh ïa kata ka jinglong jingim babha jong phi ha U Khrist.

1 PETROS 3:21

Kaba ha ka jingpynshisha jong ka, kata ka jingpynbaptis, ka pynim ïa ngi mynta ruh (ym kaba buh noh ïa ka jingtngit ka doh, hynrei, ka jingwad ka jingïatiplem babha sha U Blei), da ka jingpynmihpat ïa U Jisu Khrist,

1 PETROS 4:8

Hynrei, nyngkong eh ïa kiei kiei baroh phin ïaibat ïa kata ka jingïa-ieit bashitrhem paralok hi; naba ka jingïa-ieit ka tap noh ïa bun byllien ki pop.

2 PETROS 1:7

te ha kata ka jingriewblei, ïa ka jingïa-ieit parabangeit; te ha kata ka jingïa-ieit parabangeit, ïa ka jingieit.

1 ÏOANNIS 3:10

Ha kane keiñ, ki la paw kita ki khun U Blei, bad kita ki khun u Soitan. Uwei pa uwei baroh u bym ju leh ïa ka hok um long na U Blei, lymne uta u bymieit ïa la u para.

1 ÏOANNIS 3:23

Te kane ka long ka hukum jong u, ba ngin ngeit ha ka kyrteng U Khun jong u, U Jisu Khrist, bad ba ngin ïa-ieit paralok hi, kumba u la ai ïa ka hukum ha ngi.

1 ÏOANNIS 3:3

Te uwei pa uwei baroh uba don kane ka jingkyrmen ha u, u pynkhuid ïa lade, kat kumba ma u, u long u bakhuid.