YOSUA 24:33 - Alkitab Singog In Mongondow Masa In Tanaa

³³ Onda intua ki Eleazar adí i Harun minatoi domandon, bo iḷobong kon Gibea, kotá inta noiukat kon buḷud i Epraim. Kotá tatua ain inogoi kon i Pinehas, adí i Eleazar.

YOSUA 24:33 Mawu Ofanana

SAMUEL 2 20:21

Tua in deemanbí tomayá nami. Táe intau tobatú inta tangoinea in ki Seba adí i Bikri, inta nongkon buḷud in Epraim, ain nomarontak kon i Datu Daud. Ogoidon in sia, bá mayádon in kami nongkon kotá tanaa.” Guman in bobay tatua, “Uḷu in intau tatua in pogambatdon nami kon i Tuang nongkon dinding tanaa.”

DATU MITA IMITÁNEA 4:8

Bupati mopuḷú bodoyowá tatua tongguḷu monia in gubernur tobatú. Naa in tangoi in bupati mita tatua bo butá kawasa monia: Ki Ben-Hur: kon butá inta kon buḷud in Epraim Ki Ben-Deker: kon kotá in Makas, Saalbim, Bet-Semes, Elon, Bet-Hanan Ki Ben-Hesed: kotá in Arubot, Sokho, bo bayongan butá in Heper Ki Ben-Abinadab, ki buḷoi i Tapat adí bobay i Salomo: bayongan butá in Dor. Ki Baana adí Ahilud: kotá in Taanakh, Megido, bo bayongan butá kon diug in Bet-Sean, kon diug in kotá in Sartan kon dotá in toḷatan kotá in Yizreel nodapot in kinoyoyayú in kotá in Abel-Mehola bo kotá in Yokmeam. Ki Ben-Geber: kotá in Ramot kon Gilead, ḻipú mita kon Gilead kapunyaan in inanakan i Yair buí i Manasye, butá in Argob kon Basan; tua komintan 60 in kotá moḷoben inta iniropotan in benteng bonoboi mita bitú kon ngaranea mita, Ki Ahinadab adí i Ido: butá in Mahanaim Ki Ahimaas, ki buḷoi i Basmat adí bobay i Salomo: butá in Naptali Ki Baana adí i Husai: butá in Asyer, kotá in Alot Ki Yosapat adí i Paruah: butá i Isakhar Ki Simei adí i Ela: butá in Benyamin Ki Geber adí i Uri: butá in Gilead, inta koḻipod kinawasa i Sihon datu in Amori, bo i Og datu in Basan.

DATU MITA 2 5:22

Ki Gehazi in notubag, “Ampung Tuang, akuoi in pinotabá mopotaau kon i Tuang kon bagupabí in nabi inta nobagupa namangoi nongkon Buḷud in Epraim. Ki Tuangku in moigum sinbá ki Tuang in mobogoidon in doit saḷaka 3.000 bo doyowa no par in ḷambung inta mongopia sin ogoi kon nabi doyowa tatua.”

EZRA 7:5

Ki Abisua Ki Pinehas Ki Eleazar Ki Imang Moḷoben ki Harun

AYUB 30:23

Kinotaauanku, dinia-Mu in akuoi kon bonu in dunia in intau minatoi, tampat pinosipunan kon bayongan inta nobiag.

MAZMUR 49:10

sinbá moisimparut in sia kon popatoi bo mobiag modapot in mononoi.

IḶUAIAN 6:23

Ki Korah kogadí kon adí ḷoḷaki toḷu: ki Asir, ki Elkana bo ki Abiasap. Mosia tua in mogoguyang nai Korah.

IḶUAIAN 6:25

Ki Harun bo ki Musa tuata inta pinarentaan i Tuhan modia kon intau mita Israel ḷumuai nongkon butá in Mesir.

ZAKHARIA 1:5

Kon onda in mogoguyangmu bo nabi mita tatua in tanaa? Mosia in diádon onda.

PINOGIAPAN 3:32

Nobaḻí tongguḷu kon suku Lewi in ki Eleazar, adí i Harun. Sia in moindoi kon intau mita inta mogaid kon Yuang Motusi.

OUMAN IN RASUL MITA 13:36

Naonda in nogaid mako kon onu inta kinoibog i Allah in ki Daud kon wakutu in nobiagpa, sia in minatoi domandon bo iḷobong kon diug i mogoguyangnea. Dá noyoyangbí domandon komintan in awaknea.

IBRANI 7:24

Táe lantaran ki Yesus in diábí mato-matoi, dá oaidan-Nea saḷaku Imang in diábí mopamping kon intau ibanea.

YOSUA 14:1

Noiduduimai naa in ouman kon naonda in butá in Kanaan kon dotá in toyopan kon Ongkag in Yordan sinilai-silai kon umat in Israel. Inta nosilai kon butá tatua kon umat in Israel in ki Imang Eleazar, ki Yosua adí i Nun, bo tongguḷu mita in motoḷuadí kon bonu in suku mita in bangusa Israel.

YOSUA 22:13

Bo ki Pinehas, ki adí i Imang Eleazar, pinotabá in umat in Israel minayá nokipodungkuḷ kon suku i Ruben, i Gad, bo i Manasye inta kon butá in Gilead kon Yordan kon pomukaan.

HAKIM MITA 17:8

Táe tanaa in nonaḷámaidon in sia kon kotá tatua bo minayá notayak kon pogutunan ibanea. Kon binayáannea tatua nodapotdon in sia kon baḷoi i Mikha kon buḷud kon butá i Epraim.

HAKIM MITA 18:13

Nongkon tua minayá in mosia ná buḷud in Epraim nodapot kon baḷoi i Mikha.

SAMUEL 1 1:1

Oyúon ḷoḷaki tobatú, tangoinea in ki Elkana, nongkon suku Epraim. Sia in nogutun kon kotá in Rama, kon butá inta kon buḷud in Epraim. Ki Elkana naa in ki adí i Yeroham bo ki ompu i Elihu. Sia in noituot kon motoḷuadí i Tohu, uputpa in inanakan i Zup.

SAMUEL 1 9:4

Bo ki Saul takin bobantungnea noḻibu kon buḷud in Epraim bo butá in Salisa, táe diá nouḻí monia in bobiagon mita tatua. Onda intua minayá in mosia kon butá Sahalim, táe diábí doman in keledai mita tatua in kon tua. Mosia in minayá doman notayak kon butá in Benyamin, táe diábí doman in mangaḻenea.