YESAYA 61:10 - Alkitab Singog In Mongondow Masa In Tanaa

¹⁰ Yerusalem in noguman, “Moḷunganga in ginaku popisí in ki Tuhan, ginaku in mosanang sin ki Allah. Naonda bo nonikaan ḷoḷaki bo bobay nopogiḷambá in inta mongogaga, natuata in pinopopaké i Tuhan kon inakó ḷambung kasaḷamatan bo kountungan.

YESAYA 61:10 Mawu Ofanana

KINOBAḺIAN 24:53

Bo sia nopoḷuai in pakeang, ḷambá saḷaka bo buḷawan, bo inogoi in tua komintan kon i Ribka. Ki guya-guyangnea bo ki inánea inogoiannea doman in tombuinag inta mongomahaḷ.

TAWARIKH 2 6:41

Sindogpa kaasí in tanaa mako, o Tuhan Allah! Bo moyotakin in Poti Dodandian inta nobaḻí tomponuot kon kawasa-Mu intua dá igumon mako tumuotdon in Iko kon Baḷoi-Mu tanaa bo mogutun kon naa moidapot in mononoi. Barakataipa in bayongan in oaidan in imang-Mu mita, bo poigumon mako bayongan in umat-Mu moḷunganga in gina popisí in Iko in mopia kon i monia.

NEHEMIA 8:10

Pobuidon in tanaa; pongaan bo ponginumdon takin ḷunganga in gina. Ogoidon in tongosilai in kaanon bo anggurmu kon i monia inta diá in kaanon bo inumon. Singgai in naa in singgai inta mokudus kon i Tuhan naton, dá dikadon mokoposusa. Ḷunganga inta inogoi i Tuhan kon i monimu in moginropotbí kon i monimu.”

AYUB 29:14

Motuḻid in aidku diábí in noitaḷá; pinosindogku onu inta moadil.

MAZMUR 132:16

Imangnea mita in mopoontongbí in kasaḷamatan nongkon i-Nakó; umatnea in modondongbí bo monggiow pia in gina.

MAZMUR 132:9

Igumon mako in umat-Mu monggiow pia in gina, bo imang-Mu mita in umuran mobiag podudui in ibog-Mu.

MAZMUR 28:7

Ki Tuhan in mogogoḻiung bo mododuḷuku, akuoi in mopirisaya kon i-Nia. Sia in notuḷung bo nopoḷunganga in ginaku, akuoi in nodayow kon i-Nia pinongin dondong sukur.

MAZMUR 35:9

Dá moḷunganga in ginaku popisí in ki Tuhan, mopia in ginaku sin Sia in noposaḷamat kon inakó.

DONDONG MOḶANTUD 1:10

Putongimu totuu moḷunat kon sigad in ḷambá, sigogowmu in moḷunat pinakéan in boboḷ permata.

YESAYA 12:1

Moiangoibí in wakutunea moiko in modondong: “Tuhan, akuoi mopoyaput in sukur kon ini-Mu, Sin Iko in noḻipoi kon inakó. Koḻipod Iko in sinumorú kon inakó, táe tanaa in noinggamádon in torú-Mu.

YESAYA 12:2

Totuu, ki Allah tua in mopoposaḷamatku, akuoi in mopirisaya kon i-Nia. Akuoi in diábí moondok, sin Sia in moginropot kon inakó. Mopoposaḷamatku in ki Allah, Kon i-Nia in popoyaputanku in dondong.

YESAYA 17:10

Israel, iko in nokoḻiongdon kon i Allah inta noposaḷamat bo noḷukad kon inimu naonda bo buḷud batu inta moroton. Noyoḻiu kon tua, iko in nomuḷadon kon gobá mita sin ogoi kon dewa mita.

YESAYA 25:1

Tuhan, Ikobí in ki Allahku, poḷantudonku in Iko bo dayowonku in tangoi-Mu. Sin oaidan-Mu mita totok in mokoherang; Nongkon dungkuḷmai Iko in nonomayá, bo umuran mosatia in Iko in nogaid kon tua.

YESAYA 25:9

Kon dodai intua intau in mogumanbí, “Totuubí, Siabí in ki Allah naton; Siabí inta inoḷat mako naton, sinbá kita in posaḷamaton. Totuu, naabí in ki Tuhan; Siabí inta inoḷat mako naton. Tanaaya kita in morogiow mopia in gina, sin Sia in noposaḷamatdon kon inaton.”

YESAYA 35:10

Intau mita inta pinoḷuat i Tuhan in mobuibí; mosia in tumuot kon kotá in Yerusalem takin giow, pogot monia in moḷumbá popisí in ḷunganga in gina inta mononoi. Mosia in moḷunganga in gina bo morame; robonoḷ in gina bo amui moinggamádon komintan.

YESAYA 41:16

Uabanmubí in mosia, bo mosia in poḷayugondon in tompot bo potabudon in deḷang. Moḷungangabí in ginamu popisí in Akuoi, ki Tuhan, bo yumunggagá popisí in Akuoi, Allah in Israel.

YESAYA 48:18

Aka kuma bo iko noindoimai kon parenta-Ku mita, dá kobiaganmu motompia in naonda bo ongkag inta diá moingka-ingkag, bo kamujuranmu in naonda bo bokoḷ kon dagat inta diá mogoga-gogai.

YESAYA 49:18

Indoiaidon bo bobuidon in kon ḻibumumai, rayatmu in nosipundon bo mamangoi kon inimu. Podoyon kon tangoi-Ku, Allah inta nobiag, Akuoi in moguman, Totuu, mopiabí in ginamu sin intau inta nogutun kon inimu, naonda bo nonikaan bobay mopia in ginanea popisí in ḷambánea.

YESAYA 49:4

Táe akuoi in noguman, “Ḷopíku in diábí in baragunanea, kinodaitku in ropotku takin diá in mangaḻenea!” Tongá noyakinbí in akuoi kon ki Tuhan in mobelabí kon hakku, ki Allah in motuḻíbí kon inakó podudui in aidku.

YESAYA 51:11

Dá intau mita inta pinoḷuat i Tuhan in mobuidon mosia in tumuot kon Yerusalem takin rogiow pogot monia in motarimbuka popisí in ḷunganga inta mononoi. Mosia in mobarasanang bo morogiow, kinopatoian bo amui noinggamádon.

YESAYA 51:3

Yerusalem, ḻipoion-Ku in iko, bo bayongan inta nogutun kon kino rumbunanmu. Rawangmu mita inta noḷogat binaḻí-Kudon taman, naonda bo Eden, taman-Ku inta noḷumbá. Kon tua intau in morogiow bo mopia in gina bo mosukur pongin dondong mita.

YESAYA 52:1

Pobangondon, ei Yerusalem, pobangondon! Korigon in ginamu! Paké in ḷambung kahoromatanmu! Ei Yerusalem, kotá inta motusi, intau nonajis in diá bidon tumuot mongin bonawangmu.

YESAYA 56:7

“Moiko in diaan-Kubí mayá in Sion, mayá in tombuḷud-Ku inta motusi, bo ogoian-Ku in ḷunganga in gina kon Baḷoi pooibadaan-Ku. Kuruban mita inta pinosumba monimu kon mezbah-Ku in tarimaan-Kubí. Baḷoi-Ku in tangoionbí baḷoi pososambayangan in bayongan bangusa.”

YESAYA 58:14

Dá, mopiabí in gina monimu sin mogundoi kon i-Nakó. Baḻíon-Ku in moiko horomaton kon sinangkub in dunia. Moiko in mobiagbí mosanang takin bungai in butá tonsilai i Yakub, mogoguyangmu. Akuoi, ki Tuhan ain nosingog.”

YESAYA 61:3

sin mobogoi in pia in gina bo ḷunganga in gina kon intau inta morobonoḷ in gina bo nonogumatoi; sin momaḷui kon inta mokoajar kon gina monia mobaḻí dondong dodayow. Mosia in nádon pangkoi in kayu tobatú inta pinomuḷa tontaní i Tuhan. Mosia in mogaidbí kon onu inta mopia bo mobanar, dá ki Tuhan in poḷantudon.

YESAYA 65:18

Pokosanangdon bo pokoḷungangadon modapot in mononoi sin onu inta binaḻí-Ku. Akuoi in nomaḻí kon Yerusalem mobagu nopuḻing in ḷunganga, bo intaunea mita in morogiow.

YEREMIA 2:32

Oyúon degá in mongodeaga inta mokoḻiong kon ḷambánea, andeka nonikaan bobay inta mokoḻiong kon ḷambung nonikaannea? Táe moiko in noonggotdon totok in nokoḻiong kon i-Nakó – nongkon tungkuḷpabí inta diádon koiapan in koonggotnea.

YEHEZKIEL 42:14

Aka imang mita mopaḷutdon mopobayá in oaidan kon Baḷoi Tuhan, bo moibog mayá in dangkuḷon kon dotá in ḷuai, dá pakeang inta ain sinantú pakéon kon dodai in mogundoi yo musti taḷaan monia kon gopot mita tatua. Mosia in mustibí momaké in ḷambung ibanea, bain tua bo motaau in mosia mayá in tampat inta pinoyosipunan in rayat.”

HABAKUK 3:18

ginaku in umuranbí moḷunganga, sin Iko in ki Tuhan mopoposaḷamatku.

ZAKHARIA 10:7

Umat in Israel in naonda bo pahlawan inta moropot, naonda bo intau inta nonginum kon anggur, mopiabí in gina monia. Buí monia nongkon zaman mopobayá in zaman diábí koḻiongan in kauntungan tanaa inta inogoi-Ku. Mosia in moḷungangabí popisí in aid-Ku kon i monia.

ZAKHARIA 3:5

Sia in ḷagidon nopotabá kon mobobantungnea mita mopoḷutud serban inta nodarit kon uḷu i Yosua. Mosia in dinumudui bo onda intua pinopoḷutudon monia in ḷambung mobagu tatua kon inia koḷuka-ḷukad in malaekat i Tuhan.

LUKAS 15:22

Táe ki amánea nogoiní kon simpaḷnea mita bo noguman, ‘Koḻikat! Podiaaipa mangoi kon ḷambung inta totok in nopira bo popopaké kon inia. Popopakéai doman in sising kon gongguyamúnea bo ḷutudai domandon in sapatu.

SURAT I PAULUS KON JAMAAT RUM 13:14

Pomayádon mako bá ki Tuhan Yesus Kristus in monantú kon onu in musti aidan monimu. Bo dika dumudui kon ibog in awak inta baradosa naa sin mopoorop in onu inta koibognea.

SURAT I PAULUS KON JAMAAT RUM 14:17

Sin aka ki Allah in momarenta kon kobiagan intau, yo soaḷ onu in motaau kaanon ande inumonnea, tua in diábí moponting. Inta moponting in soaḷbí intau inta dumudui kon onu in kinoibog i Allah in mokorasabí kon moonow in gina bo motarima kon kasanangan gina inta inogoi in Roho i Allah, tua in moponting.

SURAT I PAULUS KON JAMAAT RUM 3:22

kon ki Allah in noibogbí noyopia bui takin intau, táe tua in nointotoibí kon pirisaya kon i Yesus Kristus. Tua inaidan i Allah kon bayongan intau inta mopirisaya kon i Kristus, sin Sia in diábí mopoyoposi kon intan:

SURAT I PAULUS KON JAMAAT RUM 5:11

Bo deemanbí tongá tua, táe moḷungangadon totok in gina naton kon kopopia in gina i Allah inta pinopotonsigad kon i Yesus Kristus ki Tuhan naton. Sin pinongin i Kristus tuata, dá tanaa mako kita mokoalami kon hubungan naton inta mopia takin i Allah.

GALATIA 3:27

Moiko komintan aindon binaptis pinodoyon kon tangoi i Kristus, dá sipat mita i Kristus oyúon bidon kon i monimu.

PILIPI 3:9

bo akuoi in totu-totuudon notobatú takin-Nea. Hubungan mopia takin i Allah in diábí nouḻíku sin popisí in dinumudui kon hukum in agama, táe tua in nouḻíkubí sin akuoi in nopirisayadon kon i Kristus. Dá tuamai hubungan mopia tua in namangoibí nongkon i Allah sin pinodoyon kon pirisaya kon i Kristus Yesus.

PILIPI 4:4

Kosanangdon in gina monimu sin ain nopirisaya bo nobiag notobatú takin i Tuhan. Buipa doman pogumanku: kosanangdon in ginamu!

PETRUS 1 1:8

Bo umpakabí moiko in diápa dodai onda nokoontong kon inia, táe moiko in motabibí bo umuran mopirisaya kon i-Nia. Manangka intua moḷungangabí totok in gina monimu, ḷunganga in gina inta diábí in poporupaan.

WAHYU 21:2

Dá akuoi in nokoontong kon kotá motusi tatua, tuata in Yerusalem inta mobagu, noponag nongkon soroga i Allah. Kotá tatua in pinosadia naonda bo nonikaan bobay inta pinakeangan sin mokipodungkuḷdon kon nonikaan ḷoḷaki.

WAHYU 21:9

Noiduduimai kon tua noiangoidon in tobatú malaekat inta nongkon sigad in malaekat taya pitu inta nokadai kon palo mita inta nopuḻing in roriga pangabisan tatua. Sia in noguman kon inakó, “Igai! Poontong-Ku kon inimu in Nonikaan, tuata in ki buḷoi i Adí in Domba.”

WAHYU 4:4

Noiḻibu kon tampat pomomarentaan tatua, oyúon doman doyowa nopuḷú bo opat in tampat pomomarentaan ibanea. Kon tampat mita tatua doyowa doman nopuḷú bo opat in itoi iḻimitú. Mosia in nogiḷambung nobudó bo nomaké in mahkota buḷawan.

SAMUEL 1 2:1

Bo nosambayang in ki Hana, kainia, “Ki Tuhan in nopoḷungangadon kon ginaku; oaidan-Nea in nokosanangdon kon ginaku. Takin pia in gina singkuḻeonku in musungku, sin totu-totuudon kon ki Allah in notuḷungdon kon inakó.