YESAYA 61:1 - Alkitab Singog In Mongondow Masa In Tanaa

¹ Kawasa i Tuhan Inta Totok in Moḷantud oyúon kon inakó; Sia in nomiḻí bo nopotabá kon inakó sin modia kon habar mopia kon intau nobogá bo moḻipoi kon intau inta nokuyang in ginanea, sin mopotaau kon intau inta sinokodakop kon mosia in ḷagidon poḷuaton, bo kon intau mita kon bonu in ponjara kon mosia in ḷagidon poḷuaion.

YESAYA 61:1 Mawu Ofanana

MAZMUR 102:20

Ki Tuhan in nobobui nongkon tampat-Nea inta moḷantud, nongkon soroga iḷumongow in Sia kon butá

MAZMUR 147:3

Sia in mongundam kon intau inta kinobuḻian in kamang, bo mobakut kon kekeb mita monia.

MAZMUR 149:4

Ki Tuhan in moibog kon umat-Nea; pinountung-Nea in intau inta moompá in dodia.

MAZMUR 2:6

Kai-Nia, “Kon Sion buḷud-Ku inta motusi aindon dinuí-Ku datu inta piniḻí-Ku.”

MAZMUR 22:26

Kon yuak in poyodungkuḷan in umat akuoi in modayow kon ini-Mu, sin bayongan in inta ain inaidan-Mu. Kon tayowon in umat inta mopirisaya posumbaku in kuruban inta pinodandiku.

MAZMUR 25:9

Ki Tuhan in mokapit kon intau inta moompá in gina, bo motundú kon i monia onu in kinoibog-Nea.

MAZMUR 34:18

Aka intau motoḷutui mokuani, indongogan i Tuhan, bo poḷat moposaḷamat kon i monia nongkon bayongan in roriganea.

MAZMUR 45:7

Ki Allah in nobogoi in kawasa kon inimu momarenta, kawasa-Mu in modapotbí in mononoi; pinodoyon kon inta moadil iko in momarenta kon rayatmu.

MAZMUR 51:17

O Tuhan, tuḷungaipa in akuoi mosingog, dá akuoi in modayowdon kon ini-Mu.

MAZMUR 68:7

Ki Allah in nobogoi in pogutunan kon intau inta diádon koginaḷum; Sia in nopoḷuaidon kon intau kon ponjara dá nopiadon in gina monia. Táe intau mita inta moḷawang kon i Tuhan mustibí mogutun kon butá inta noḷogat.

MAZMUR 69:32

Tuabí in kinoibog i Tuhan nongkon kuruban sapi, kuruban sapi koḷakian inta moḷoben.

IḶUAIAN 28:41

Popoḷutudon in pakeang tatua kon i Harun ki utatmu bo kon i adínea mita. Toguḷuai in mosia in ḷana zaitun; tuata in pomiaan monimu sinbá mosia motaaudon mogaid kon oaidan-Ku mobaḻí imang.

IḶUAIAN 29:7

Bo gamádon in ḷana pakéon kon upacara, pobutak intua kon uḷunea bo ḷoḷubuai in ḷana in sia.

YESAYA 29:19

Intau mita bogá bo mokooyá in mokorasadon bui kon kobiagan mopia inta inogoi i Allah inta mokudus Allah in Israel.

YESAYA 30:19

Ei moiko inta nogutun kon Yerusalem, moiko in diábí tantú mongombaḷ. Ki Tuhan in monotabibí, bo ḷagidon motubag kon i monimu aka moiko mokuani mokituḷung kon i-Nia.

YESAYA 30:26

Buḷan in monindarbí ná kobayag in mata in singgai, bo mata in singgai in mobayagdon kopitu in kobayagnea ná biasamai, naonda bo bayag in pitu nosinggai sinipun nobaḻí tosinggai. Tua komintan in mobaḻíbí kon tungkuḷ in ki Tuhan mobakut bo mongundam kon kekeb mita in umat-Nea inta ain binibilnea.

YESAYA 32:7

Bo intau mouboḷ morai bo mogaid kon onu inta moraat. Sia in motayak kon daya sin mopobodito kon intau bogá pongin tosingogon mita inta uboḷ bo moḷamboi kon i monia mokouḻí kon haknea.

YESAYA 40:9

Potakodon kon tudu in buḷud inta moḷantud, bo pobaḷúdon in habar mopia kon Yerusalem! Pomaḷúdon koropot, bo pobaḷúdon in habar mopia kon Sion! Pogumandon kon kotá mita in Yohuda kon ki Allah monia in mamangoi!

YESAYA 42:1

Guman i Tuhan, “Naa in mogogundoi-Ku inta binaba-Ku, intau inta piniḻí-Ku inta mokosanang kon gina-Ku. Akuoi ain nobogoi in kawasa-Ku kon inia, sin modia kon koadilan kon batúan in bangusa.

YESAYA 42:7

Sin mobuká kon mata in intau bilog, bo mopoḷuat kon intau nongkon sindip in ponjara.

YESAYA 48:16

Angoidon diug kon i-Nakó bo indongogaidon, nongkon dungkuḷpabímai diábí bunion-Ku in tosingogon-Ku; onu in siningog-Ku umuranbí pototuu-Ku.” Tanaa in ki Tuhan Allah nopotabá kon inakó bo nobogoi kon inakó in kawasa-Nea tontaní.

YESAYA 49:9

Intau inta pinonjara pinoki poḷuaian-Ku; inta kon tampat mosindip diaan-Ku mayá in mobayag. Nodapot in inta kon tombuḷud inta noḷogat mosia in diábí kodaitan, kon kinoouput in daḷan oyúonbí in kaanon.

YESAYA 52:7

Totuu mosanang in mokoontong kon koangoian in totabá, Sia in mayá mongin buḷud bo modia kon habar mopia habar kobiagan mopia, habar kasaḷamatan kon Sion, kainia, “Allahmu in Datu!”

YESAYA 52:9

Porogiowdon, ei rumbun mita in Yerusalem, sin ki Tuhan in noḻipoi kon umat-Nea bo nopoḷuat kon Yerusalem.

YESAYA 57:15

Sin nanaa in guman i Allah, Inta Totok in moḷantud bo mokudus, inta nongawasa modapot in mononoi, “Akuoi in nogutun kon tampat inta moḷantud bo inta motusi, táe kon yua-yuakbí doman in intau mita inta moompá in dodia bo inta nomanasaḷ in nogaid kon dosanea mita, sin mopoguḻí bui kon ibog bo kamang monia.

YESAYA 57:18

Akuoi in nokoontongdon kon dodia monia, táe mosia in bui-Kubí tompiaan. Kapiton bo tuḷungan-Kubí in mosia bo moḻipoi kon intau inta moajar in gina.

YESAYA 59:21

Akuoi in momia kon dodandian takin i monimu: Moiko in ogoian-Ku in kawasa-Ku bo totundú-Ku modapot in mononoi. Tundúdon kon i adímu mita sinbá mosia in motaau doman motundú kon tua kon adí bo ompu tanaa mako modapot in mononoi.”

YESAYA 66:2

Dunia naa in ḻima-Ku tontaní in nomia, dá tua komintan in pinomia. Táe koibog-Ku in intau inta moompá in dodia, inta nomanasaḷ in nogaid kon dosanea mita, inta moondok bo inta motoindudui kon i-Nakó.

YEREMIA 34:8

Ki Datu Zedekia bo intau in Yerusalem nomia kon dodandian sin mopoḷuat

YEREMIA 52:33

Sia in inogoi nomaḷui kon ḷambung in ponjaranea bo nodapot kon singgai noiduduimai kon bonu in sia nobiagpa motaaubí in sia mongaan kon komaḻig, bo pomuḷoi in singgai inogoian in doit pakéonnea kon kobiagan.

DANIEL 9:24

Pitu pokali kon pitu nopuḷú notaong in sempo inta ain sinantú i Allah sin mopoḷuat kon bangusamu bo kotámu inta motusi tatua nongkon dosa bo aid moraat. Bayongan in dosa in ampunganbí bo kooadil inta mononoi in posindogonbí, dá oontongon bo toḻindap tatua in moniatadon, bo Baḷoi Tuhan inta motusi tatua in posumba bui kon i Tuhan.

HOSEA 6:1

Intau mita in Israel in noguman, “Igai mobuidon in kita kon i Tuhan. Siabí inta nopororiga kon i naton, táe Siabí doman inta monompia. Sia in nonongkekeb, táe Siabí doman in mobakut kon kekeb mita naton.

IMAMAT 7:35

Nongkon kaanon inta pinosumba kon i Tuhan, tuata in inogoinea kon i Harun bo kon i adínea mita kon singgai kon tungkuḷ in mosia baḻíondon imang.

MIKHA 3:8

Táe soaḷ akuoi naa, ki Tuhan in nopogonúdon in Roho bo kawasa-Nea. Akuoi in inogoian-Nea in pomomangaḻe soaḷ kooadil, bo kabaranian doman moponiata kon intau in Israel kon soaḷ dosa mita inta ain inaidannea.

MATIUS 11:5

Moiko ain nokoontong: intau bilog mokoindoi, intau ḻempeng mokobayá, intau pinanyaki kuḻit inta mokorongó nopia, intau bongoḷ mokodongog, intau minatoi in nobangon bo Habar Mopia pinoyaput kon intau mita bogá.

MATIUS 3:16

Naonda in nopaḷut binaptis, ki Yesus ḷagi nobatun nonaḷámai kon tubig tatua, bo kon dodai doman intua ḷangit nobukat bo inontong-Nea in Roho i Allah naonda bo ḷagapan paḷoma noponag kon i-Nia.

LUKAS 7:22

Dá ki Yesus in noguman kon dumodudui i Yohanes tatua, “Bayádon bui kon i Yohanes bo oumandon onu inta ain inontong bo dinongog monimu: intau bilog mokoontong, intau ḻempeng mokobayá, inta pinanyaki kuḻit mokorongó mopia, intau bongoḷ mokodongog, intau matoi mobiag, intau bogá pinopoyaputan in Habar Mopia.

YOHANES 1:41

Dá ki Andreas in ḷagi notayak kon i Simon ki utatnea bo noguman kon inia, “Kami ain noyodungkuḷ i Mesias!” (Mesias notongkai in Kristus: Datu Mopoposaḷamat.)

YOHANES 3:34

Sin ki ine in pinotabá i Allah, dá siabí tua in mopoyaput in pirman i Allah, sin sia in kinawasa bidon in Roho i Allah.

OUMAN IN RASUL MITA 10:38

Bo kinotaauanbí domandon monimu kon ki Allah ain nomiḻí kon i Yesus intau in Nazaret tua bo nobogoi kon i-Nia in Roho i Allah bo kawasa. Kinotaauan domandon monimu kon ki Yesus tuata inta minayá in ḻipu-ḻipúannea bo nogaid kon inta mopia poḷat nongundam kon bayongan in intau inta kinawasa in Ibilis, sin ki Allah in umuran kotaki-takin-Nea.

OUMAN IN RASUL MITA 26:18

mobuká kon mata monia, sinbá mobuká in mata monia bo mokoontong kon inta mobayag; bo diádon kopongaruan in Ibilis táe tongádon tantú kon bonu in kawasa i Allah. Sin aka mopirisaya kon i-Nakó, yo dosa mita monia in tokoampunganbí bo mobaḻíbí umat mita inta piniḻí i Allah in mosia.’ ”

OUMAN IN RASUL MITA 4:27

Sin totuubí kon ki Herodes bo ki Pontius Pilatus aindon noyosipun kon kotá tanaa takin intau mita inta diá nonotaau kon i Tuhan bo intau mita in Israel sin moḷawang kon i Yesus, simpaḷ-Mu inta ain piniḻí-Mu bo inta kinoibog-Mu.

KORINTUS 2 3:17

Sin ki Tuhan tua in Rohobí; bo kon onda oyúon in Roho i Tuhan, yo kon tua oyúon in kabebasan.

KORINTUS 2 7:6

Tongá sukur mako, sin ki Allah in tantú nobogoi in gina moropot kon intau inta moompá in dodia; bo pinopoangoi-Nea in ki Kristus, sinbá mosanang totok in gina nami.

IBRANI 1:9

Inta moadil in koibog-Mu bo inta motombogá in kodoí-Mu; Manangka intua ki Allah, Allah-Mu in nomiḻí kon ini-Mu; bo nobogoi in kahoromatan inta mokopoangoi kon ḷunganga in gina inta moiḻiu kon yobayat-Mu mita.”