YESAYA 52:1 - Alkitab Singog In Mongondow Masa In Tanaa

¹ Pobangondon, ei Yerusalem, pobangondon! Korigon in ginamu! Paké in ḷambung kahoromatanmu! Ei Yerusalem, kotá inta motusi, intau nonajis in diá bidon tumuot mongin bonawangmu.

YESAYA 52:1 Mawu Ofanana

TAWARIKH 1 16:29

Dayowdon in tangoi-Nea inta momulia, bo diádon in kuruban kon bonu in baḷoi-Nea. Sumbadon in ki Tuhan takin mogiḷambung in ḷambung ibada!

NEHEMIA 11:1

Itoi mita in nogutun notantú kon Yerusalem bo rayat in nopogonik in undi sin momiḻí kon motoḷuadí nongkon batúan in motoḷuadí mopuḷú inta musti mogutun kon kotá motusi, Yerusalem. Inta diá kinopiḻían in motaaubí mogutun kon kotá mita ibanea.

MAZMUR 110:3

Kon singgai iko mamangoi takin kawasa, kon buḷud inta motusi, rayatmu in mayá takin ibog tontaní. Naonda bo oḷú doḷo-doḷom, tayowmobiag mita mamangoi kon inimu.

IḶUAIAN 28:2

Pomiaaidon kon pakeang imang in ki Harun, sinbá sia in koontongan mokobangkaḷ.

IḶUAIAN 28:40

Ki adí mita i Harun in pomiaai domandon kon ḷambung, baan bo suruban sinbá mosia mokobangkaḷ in koontongan.

YESAYA 1:21

Kotá inta koḻipod motoindudui, tanaa mako in nádon onda bo sundaḷ tobatú! Dungkuḷmai bayongan in intaunea in moadil bo mojujur, táe tanaa in pinogutunandon in moḷoḻimod mita.

YESAYA 1:26

Moiko in bui-Ku ogoian in hakim mita bo monononggina ná dungkuḷmai. Dá Yerusalem in tangoiondon kotá inta moadil bo motoindudui.”

YESAYA 26:2

Bukádon in bonawang mita, sinbá tumuot in bangusa inta motoindudui, bangusa inta nogaid kon onu in kinoibog i Allahnea.

YESAYA 35:8

Kon tua in oyúondon in daḷan moḷoben, “Daḷan mokosaḷamat” in tangoinea. Intau binaradosa in diábí moitaḻib kon tua, Intau bodok in diábí mopoḷaḻe kon intau inta tumaḻib kon tua.

YESAYA 4:3

Bayongan in intau inta kinotaḷáan kon Yerusalem, intau mita inta piniḻí i Allah sin posaḷamaton, tangoidon motusi.

YESAYA 48:2

Umpaka natua, iko in mongaku doman takin pia in gina kon iko in intau in kotá motusi; bo iko in inumandoḷ kon i Allah in Israel inta sinangoi ki Tuhan inta Totok in mokawasa.

YESAYA 49:18

Indoiaidon bo bobuidon in kon ḻibumumai, rayatmu in nosipundon bo mamangoi kon inimu. Podoyon kon tangoi-Ku, Allah inta nobiag, Akuoi in moguman, Totuu, mopiabí in ginamu sin intau inta nogutun kon inimu, naonda bo nonikaan bobay mopia in ginanea popisí in ḷambánea.

YESAYA 51:17

Pobangondon ei Yerusalem, pobangondon! Hukuman inta pinoḷabú i Tuhan popisí in torú-Nea ain pinobayámu nodapot in nopaḷut.

YESAYA 51:9

Sindogdon o Tuhan, tuḷungaidon in kami, posaḷamatdon in kami in kawasa-Mu. Sindogdon ná kon tungkuḷ intua kon tungkuḷ in iko nomutuk kon i Rahab bo nonumbuk kon naga in dagat tatua nodapot in minatoi.

YESAYA 60:1

Sindogdon bo kobaḻídon bayag, ei Yerusalem, sin bayag in kasaḷamatanmu in noiangoidon; Ki Allah in monimbayagbí kon inimu takin kamuliaan-Nea.

YESAYA 60:21

Intau mita inta nogutun kon butámu in mogaidbí kon onu inta totuu, mosia in mobaḻíbí kitogi in butá tatua modapot in mononoi. Mosia in naonda bo pinomuḷa inta cinangkok inta pinomuḷa-Ku tontaní, sin moponiata kon kamuliaan-Ku.

YESAYA 61:10

Yerusalem in noguman, “Moḷunganga in ginaku popisí in ki Tuhan, ginaku in mosanang sin ki Allah. Naonda bo nonikaan ḷoḷaki bo bobay nopogiḷambá in inta mongogaga, natuata in pinopopaké i Tuhan kon inakó ḷambung kasaḷamatan bo kountungan.

YESAYA 61:3

sin mobogoi in pia in gina bo ḷunganga in gina kon intau inta morobonoḷ in gina bo nonogumatoi; sin momaḷui kon inta mokoajar kon gina monia mobaḻí dondong dodayow. Mosia in nádon pangkoi in kayu tobatú inta pinomuḷa tontaní i Tuhan. Mosia in mogaidbí kon onu inta mopia bo mobanar, dá ki Tuhan in poḷantudon.

YESAYA 64:10

Kotá mita motusi-Mu in nádon onda bo padang gurun, Yerusalem in nobaḻídon butá noingkag inta noingongow.

YEREMIA 31:23

Ki Tuhan Inta Totok in mokawasa, Allah in Israel in noguman, “Aka umat-Ku binaḻí-Kudon ponango-nangoian ná dungkuḷmai, dá kon butá in Yohuda bo kon ḻipúnea mita yo kodongogandon bui intau in moguman, ‘Igumon mako ki Tuhan in momarakat kon tombuḷud motusi kon Yerusalem tampat pogutunan inta ain sinantú kon i-Nia.’

YEHEZKIEL 44:9

Akuoi, ki Tuhan Inta Totok in moḷantud, mopotaau kon intau mita ango-angoi inta diá sinoit bo intau mita inta diá motoḷutui kon i-Nakó, diábí ogoi in tumuot kon Baḷoi-Ku. Tua in popoaid doman kon intau ango-angoi inta nogutun notantú kon yua-yuak in bangusa Israel.”

DANIEL 10:9

Kon dodai in dinongogku in singognea, noitambuḷoḷokdon in akuoi nodapot in noitongkob kon butá.

YOËL 3:17

“Ei Israel, tanaa in kotaauandon monimu, kon Akuoibí in ki Tuhan Allahmu. Akuoi in nogutun kon Sion, buḷud-Ku inta motusi, Dá Yerusalem in mobaḻí doman kotá inta motusi, intau ango-angoi in diá bidon mokopotuot bui.

NAHUM 1:15

Indoiaika, in totabá tobatú mamangoi mongin buḷud mita, modia kon habar mopia, habar kountungan. Ei bangusa in Yohuda, ramedon in singgai moḷobenmu bo uboḻiaidon in dandimu kon i Allah. Butámu in diá bidon tonggataan in intau moraat. Mosia in irimumudon komintan.

HAGAI 2:4

Tongá, donaaidon moinggamá in kamang, ei moiko komintan! Ingguputaidon in oaidan tatua, sin Akuoi in umuranbí motuḷung kon i monimu.

ZAKHARIA 3:4

Dá nogumandon in malaekat tatua kon mobobantung mita kon soroga, “Ḷumbúdon in ḷambung nokotor inta pinaké in intau tanaa.” Bo sia in noguman kon i Yosua, “Dosamu in iḷumbúkudon, iko in ogoiankudon in ḷambung mobagu.”

MATIUS 4:5

Onda intua ki Yesus in dinia Ibilis minayá in Yerusalem inta sinangoi kotá motusi tua bo sinimindog kon binubungan Baḷoi i Tuhan,

LUKAS 15:22

Táe ki amánea nogoiní kon simpaḷnea mita bo noguman, ‘Koḻikat! Podiaaipa mangoi kon ḷambung inta totok in nopira bo popopaké kon inia. Popopakéai doman in sising kon gongguyamúnea bo ḷutudai domandon in sapatu.

SURAT I PAULUS KON JAMAAT RUM 13:14

Pomayádon mako bá ki Tuhan Yesus Kristus in monantú kon onu in musti aidan monimu. Bo dika dumudui kon ibog in awak inta baradosa naa sin mopoorop in onu inta koibognea.

SURAT I PAULUS KON JAMAAT RUM 3:22

kon ki Allah in noibogbí noyopia bui takin intau, táe tua in nointotoibí kon pirisaya kon i Yesus Kristus. Tua inaidan i Allah kon bayongan intau inta mopirisaya kon i Kristus, sin Sia in diábí mopoyoposi kon intan:

EPESUS 4:24

Bo kobiagdon in moiko saḷaku intau mobagu inta pinomia podudui in ibog i Allah, inta moibog dinumudui kon tabiat moitutui, motuḻid bo motusi.

EPESUS 5:14

Tuamai singog in nanaa, “Pobangondon, moiko inta nosiug, bo pobangondon nongkon sigad in intau minatoi! Dá sambayanganbí i Kristus in moiko.”

EPESUS 6:10

Naa in singogku pangabisan, paké in ropot inta nouḻí monimu nongkon kawasa i Tuhan, sin moiko in notobatúdon takin-Nea.

WAHYU 11:2

Táe donaaidon ukuron in palas kon dotá in ḷuai Baḷoi i Allah tatua, sin tua in inogoi bidon kon intau mita inta diá nonotaau kon i Tuhan. Mosia in mamangoi morita-ritak mako kon kotá motusi tatua kon bonu in opat nopuḷú bodoyowá nobuḷan.

WAHYU 19:14

Bayongan tontara in soroga dinumudui kon i-Nia; mosia in sinumakoi kon kabaḷo mita nobudó, bo nomaké in ḷambung moaḷus inta totok in nobudó.

WAHYU 19:8

Pakeang moaḷus mobudó inta mopouḻi-uḻinag inogoidon kon i-Nia sin pakéon.” (Pakeang moaḷus tatua in oaidbí mita mopia inta pinomia in umat mita i Allah.)

WAHYU 21:2

Dá akuoi in nokoontong kon kotá motusi tatua, tuata in Yerusalem inta mobagu, noponag nongkon soroga i Allah. Kotá tatua in pinosadia naonda bo nonikaan bobay inta pinakeangan sin mokipodungkuḷdon kon nonikaan ḷoḷaki.

WAHYU 21:27

Táe intau mita inta nogaid kon soaḷ mita inta mokorongó, ande intau mita inta mongouboḷ, yo singogon mako mopoḷok, mosia inta nogaid kon mokotor, diábí moituot kon tua. Inta motaau tumuot in tongábí intau inta tangoinea in pinais kon bonu in Buk Intau Nobiag, buk i Adí in Domba tatua.