YESAYA 45:1 - Alkitab Singog In Mongondow Masa In Tanaa

¹ Ki Tuhan in nomiḻídon kon i Kores nobaḻí datu; sia in sinundú sin monaḷow kon bangusa mita bo momutoḷ kon kawasa in datu mita. Ki Tuhan in momukatbí kon bonawang mita in kotá tuotannea, diábí tobatúmai in pomayá mako moiḻingkop. Ki Tuhan in moguman kon inia,

YESAYA 45:1 Mawu Ofanana

DATU MITA IMITÁNEA 19:15

Ki Tuhan in noguman, “Pobuidon kon padang gurun kon diug in Damsyik! Bo bayádon in kotá bo popobutakdon in ḷana kon uḷu i Hazael nobaḻí tomponuot kon pinoduían kon inia nobaḻí datu in Siria.

EZRA 1:1

Kon taong imitánea kon pinomarentaan i Kores, datu in Persia, Ki Tuhan nogaid kon onu inta ain siningog-Nea pinongin i Nabi Yeremia. Ki Tuhan in nopogonú kon gina i Kores sinbá mopoḷuaidon in parenta tobatú inta binaca kon sinangkup in dodatuan nea. Nanaa in tombonunea:

EZRA 1:2

“Naa in parenta i Kores, datu in Persia. Ki Tuhan, Allah inta nongawasa kon soroga ain nomaḻí kon inakó datu kon sinangkup in dunia, bo nopotabá kon inakó moposindog in baḷoi kon i-Nia kon Yerusalem kon butá in Yohuda.

AYUB 12:21

Pinokopo oyá-Neamai in intau inta ihoromatmai; ginamá-Nea in hak monia mongawasa.

MAZMUR 73:23

Táe akuoi in umuranbí kon diug-Mu, kinadaian-Mu in ḻimaku koḷanan.

YESAYA 13:2

Pokerabdon in bandera mita in parang kon tudu in buḷud inta noḷogat! Pokuanidon kon tontara mita, bo tonggódon in kokaḷmu sinbá mosia in monubu kon bonawang mita in kotá inta moḷoḷatú tua.

YESAYA 13:3

Ki Tuhan ain nogoiní kon intau mita inta ain sinokopiḻí-Nea. Mosia in motorindog, mopirisaya kon ropot monia bo motaau pongata. Ki Tuhan in nopotabá kon i monia mohukum kon intau mita inta kinotugatan in torú-Nea.

YESAYA 41:13

Sin Akuoi ki Tuhan, Allahmu, in mokadai kon ḻimamu koḷanan; Guman-Ku, ‘Dika moondok, Akuoi in motuḷungbí kon inimu.’ ”

YESAYA 41:2

Ki ine in nopotabá kon pongawasa nongkon dotá pomukaan, bo nobogoi kon inia in kauntungan noyo-noyodudui? Ki ine in nomaḻí kon inia nonaḷow kon bangusa mita, bo nopotungkud in datu mita kon inia? Pitownea nomaḻí kon i monia noirarit naonda bo ḷobud, piotnea nopotabud kon i monia naonda bo wawa inirup in tompot.

YESAYA 41:25

Akuoi in nopotabádon kon intau tobatú nongkon dotá pomukaan: Inoiní-Ku in sia sin monubu nongkon dotá in utuan. Mongongawasa mita in ritakannea mangoi naonda bo yoná, naonda bo momomia kon kuyon moritak kon butá ḷamentong.

YESAYA 42:6

“Akuoi, ki Tuhan, in mogoiní bo mopotabá kon inimu sin mopobayá in inta moadil iko in kapiton-Ku bo ḷukadan-Ku sin mobaḻí dodandian kon umat intau, bo sindar kon bayongan in bangusa.

YESAYA 44:28

Akuoibí inta noguman kon i Kores, ‘Ikobí inta momarenta sin kopontingan-Ku, bo mogaid kon bayongan inta kinoibog-Ku. Parentadon sinbá Yerusalem posindogon bui, bo Baḷoi Tuhan aidandon in kinodoyonannea.’ ”

YESAYA 45:5

Akuoibí naa in Tuhan, diábí in ibanea mako, Akuoi in Allah inta diá in toḻinduanea. Iko in ain sinon pakakatan-Ku, umpakabí diá kinotaauanmu in Akuoi.

YESAYA 48:15

Akuoibí in inta noguman kon tua bo inta nogoiní kon inia, inta nokapit kon inia nodapot in sia nokodapot kon inta pinoki aid.

YEREMIA 27:6

Akuoibí inta ain nobogoi kon bayongan in bangusa tanaa kon bonu in kawasa in mogogundoi-ku, ki Nebukadnezar datu in Babel. Nodapot in mahaḷuk yo inogoi-Ku doman kon inia sin kawasaan.

YEREMIA 43:10

Bo pogumandon kon i monia kon Akuoi, ki Tuhan Inta Totok in mokawasa, Allah in Israel, in mopoangoibí in mogogundoi-Ku ki Nebukadnezar datu in Babel, kon tampat tatua. Bo kon tudu in batu mita inta iḷobongmu kon butá tatua, posindogonneabí in tampat pomomarentaannea bo mosongká kon ḷoḷaigan in dodatuannea.

YEREMIA 50:3

Bangusa tobatú nongkon utuan in mamangoibí monubu kon Babel bo mopobaḻí kon butá tatua moḷogat moingkag. Intau bo mahaḷuk in moroḷagui, bo diá bidon in moibog mogutun kon tua.”

YEREMIA 50:35

Ki Tuhan in noguman, “Moyopúdon in Babel takin rayat bo pojabat in pomarenta takin intau mita mongopandoi monia!

YEREMIA 51:11

Ki Tuhan in nopotabádon kon datu mita in Media, sin moibog in Sia morimumud kon Babel. Natuata in pototuḻínea kon aid in intau mita inta norimumud kon baḷoi-Nea. Porwira mita in tontara in parang nomarenta, “Iḷanitai in piot! Podia kon kaḻeaw!

YEREMIA 51:30

Tontara in Babel in nogogaidon in noparang bo nogutun kon benteng mita. Mosia in noinggamádon in barani bo diádon kodaya. Bonawang mita in kotá dinangatandon, bo baḷoi mita in sinurub.

YEREMIA 51:58

Dinding in Babel inta mongoropot mita in rimumudon-Kubí modapot in motondodaidon in butá. Bonawangnea inta mongoḷantud in turubon-Kubí komintan. Diábí in mangaḻenea in inta ḷongasi in bangusa mita, sin komintan bungai in aid monia in kaanonbí in tuḷú. Akuoi, ki Tuhan Inta Totok in mokawasa, ain nosingog.”

YEHEZKIEL 29:20

Butá in Mesir in ogoi-Ku kon inia mobaḻí toguboḻi in bayongan oaidnea, popisí in tontaranea in nogaidon kon oaidan-Ku. Akuoi ki Tuhan Inta Totok in moḷantud ain nosingog.

DANIEL 5:6

Nobilaidon totok in sia bo nádomai tua in ondoknea nodapot in nourotdon totok in duḷudnea.

DANIEL 7:5

Mahaḷuk inta nogindua batangannea in naonda bo beruang. Sia in sinimindog kon sioḷnea tumi, bo notangaḷ kon tuḷan gutuk toḷu. Dinongogku in singog in noguman kon inia, “Yo, kaandon in ponoyá kinooibogmubí!”

DANIEL 8:3

bo kon bingkí in ongkag tatua inontong in domba koḷakian tobatú inta tungoinea in doyowa mongobanat, tobatú in mobana-banat bo mobagu-bagu kon inta ibanea.

DANIEL 8:4

Inontongku in domba koḷakian tatua nonungoi ná dotá in toyopan, utuan bo toḷatan. Diá tobatúmai in mahaḷuk in mokotahang tumayow kon inia andeka mokoḷagui nongkon kawasanea. Sia in mogaid kon onukabí in koibognea bo nobaḻí moḷoḷatú.

NAHUM 2:6

Dimpot in ongkag mita nodaitdon binukatan, dá nodoḻiokdon in sinangkub in komaḻig!

NAHUM 3:13

Tontaramu mita in mongoyangkó naonda bo bobay bo ḻipúmu in diábí mokopongonu in monayow kon musung. Tuḷú in momagongbí kon bonoboi mita in bonawangmu.