YESAYA 42:10 - Alkitab Singog In Mongondow Masa In Tanaa

¹⁰ Podondong in dondong mobagu kon i Tuhan, dayowdon in Sia ei sinangkub in dunia! Ponggonugurdon, ei dagat bo bayongan in tombonunea, ḻipú mita inta moyayú bo bayongan in intau inta nogutun kon tua!

YESAYA 42:10 Mawu Ofanana

TAWARIKH 1 16:32

Pobokoḷdon ei dagat bo bayongan in tombonunea! Pokoḷungangadon ei bayongan in rawang bo bayongan in pinomuḷanea!

MAZMUR 150:6

Biódon mako in bayongan in mahaḷuk inta nobiag modayow kon i Tuhan. Dayowdon in ki Tuhan!

MAZMUR 33:3

Podondongdon in dondong mobagu kon i Tuhan, kutidon kopia in kecapi bo porogiowdon takin sanang!

MAZMUR 40:3

Inugut-Nea in akuoi nongkon bubú inta mokoanib, nongkon yoná in dampaḷ. Inukat-Nea in akuoi kon tudu in tombuḷud batu, dá ḷampangku in mopia.

MAZMUR 65:5

Pia in kamang in intau inta piniḻí-Mu, bo inoiní-Mu mogutun kon Baḷoi-Mu. Kami in pooroponbí in bayongan inta mopia kon Baḷoi-Mu, pogogutunan-Mu inta motusi.

MAZMUR 72:10

Datu mita in Tarsis bo ḻibuton mita in modiabí kon sosumba kon inia. Datu mita in Arab bo in Etiopia in mamangoi modia kon iba.

MAZMUR 96:11

Koḷungangadon, ei ḷangit bo butá! Ponggonuaḷdon ei dagat bo bayongan in tombonunea!

MAZMUR 97:1

Ki Tuhan in Datu! Biódon mako in butá mokoposanang, bo ḻibuton mita in moḷunganga.

IḶUAIAN 15:1

Bo ki Musa takin intau mita in Israel nopodondong in dondong tanaa sin modayow kon i Tuhan, “Akuoi in moibog modondong kon i Tuhan, sin moḷobenbí in kawasa-Nea. Bayongan in kabaḷo bo intau inta sinumakoi pinogambat-Nea kon bonu in dagat.

IḶUAIAN 20:11

Onom nosinggai, Akuoi, ki Tuhan, nomaḻí kon butá, ḷangit, dagat bo bayongan inta kon bonunea, táe kon singgai inta nogimpitu Akuoi in nogogai. Tuamai Akuoi, ki Tuhan, momarakat kon singgai in Sabat bo baḻíon-Ku singgai-Ku intua.

YESAYA 11:11

Kon singgai tatua ki Tuhan in buipa doman momaké kon kawasa-Nea bo modia mobui kon umat-Nea inta kinotaḷáan kon Asyur bo kon Mesir, kon butá mita in Patros, Sudan bo Elam, kon Babel, Hamat bo ḻibuton mita inta mongoyayú.

YESAYA 12:5

Podondongdon kon i Tuhan, sin Sia in nomiadon kon nobayong in inta mokoherang. Pomayádon mako in sinangkub in dunia mokodongog kon onu inta inaidan-Nea.

YESAYA 42:4

Diá in gagawang andeka kobuḻian in kamang, modapot in inta moadil in posindogon kon dunia. Ḻipú mita inta moyayú mokotanob kon totundúnea.”

YESAYA 44:23

Porogiowdon moḷunganga, ei ḷangit, porogiowdon, ei bonu in butá! Porogiowdon takin ḷunganga in gina, ei buḷud mita! Natua doman in kayuon bo bayongan in pangkoi in kayu kon bonunea! Sin ki Tuhan in nopoontongdon in kamuliaan-Nea pinongin notobut kon Israel umat-Nea.

YESAYA 48:20

Bayádon bo poḷaguidon nongkon Babel, Potaaudon magí-mako in habar tanaa. Potaaudon takin yogiow sanang in gina: “Ki Tuhan in noposaḷamatdon kon Israel, mogogundoi-Nea!

YESAYA 49:13

Podondongdon ei ḷangit, porogiowdon ei butá, ei buḷud mita. Porogiowdon takin pia in gina! Sin ki Tuhan in mamangoi moḻipoi kon umat-Nea, Sia in monotabi kon umat-Nea inta dinorot.

YESAYA 49:6

Ki Tuhan in noguman kon inakó, “Oaidan inta moḷobe-ḷoben in mogoḷat mako kon inimu, ei mogogundoi-Ku; iko in diábí tongá mopobui in ki agat in buí i Yakub bo mopoguḻit kon koḷoḷoben in suku mita in Israel, táe baḻíon-Ku doman bayag in bangusa mita, sinbá sinangkub in dunia posaḷamaton.”

YESAYA 51:5

Kasaḷamatan inta ogoi-Ku in nodiugdon; wakutu kountungan-Ku motoyongdon moiangoi. Akuoi tontaní in momarenta kon bangusa mita. Butá mita inta moyayú mogoḷat mako kon i-Nakó bo moharap mako kon oaidan-Ku inta motorindog.

YESAYA 60:6

Butámu in posipunandon in unta mobayong, mosia in mamangoi nongkon Midian bo Epa. Nongkon Syeba intau modia kon buḷawan bo kamania, sindaḷan modayow kon aid i Tuhan.

YESAYA 60:9

Tuata in kapaḷ mita inta namangoi sinumubu nodia kon umat i Allah nobui nongkon butá moyayú. Saḷaka bo buḷawan dinianea noyotakin sin modayow kon i Tuhan Allahmu; kon i Allah in Israel Inta Totok in motusi, inta nomaḻí kon umat-Nea ihoromat.

YESAYA 62:11

Ki Tuhan in nobogoi in koyow tanaa kon sinangkub in dunia, “Poguman kon intau inta nogutun kon Sion, ‘Indoiai, ki Tuhan Mopoposaḷamat namangoi! Sia in sinakinan in intau mita inta ain pinoḷuat-Nea.’ ”

YESAYA 65:14

Totuubí, mosia in morogiow takin ḷunganga in gina, táe moiko in mongombaḷbí takin moajar in gina.

ZEPANYA 2:11

Baḻíonbí i Tuhan moondok in mosia. Sia in morimumudbí kon dewa mita kon butá. Bo bayongan in bangusa in moibadabí kon i Tuhan, kon batúannea kon butá monia tontaní.

WAHYU 14:3

Mosia tua in nopodondong in dondong inta mobagu kon tayowon tampat pomomarentaan bo kon tayowon in mahaḷuk opat bo itoi mita. Diábí in tobatúmai intau mokobalajar kon dondong tatua, koḻikudbí in intau inta 144.000 inta ain pinobebas nongkon dunia naa.

WAHYU 5:9

Mosia nopodondong in tobatú dondong mobagu, nanaa: “Iko in patus mogamá kon buk tatua bo moḷosi kon meterainea mita. Sin Iko ain iḻimod, bo dugú-Mu tatua, in pinoguboḻi-Mu kon intau nongkon bayongan suku, bahasa, negara bo bangusa sin ogoi kon i Allah.