YESAYA 34:10 - Alkitab Singog In Mongondow Masa In Tanaa

¹⁰ Doḷom singgai dokot tatua in diá mopiong, bo poyok moidamonik nongkon inia modapot in mononoi. Butá tatua in taḷaan diádon in tombonunea bo moingkag modapot in adí bo ompu, bo diádon tobatúmai in intau in tumaḻib kon tua.

YESAYA 34:10 Mawu Ofanana

YESAYA 1:31

Naonda bo wawa nopokak tongá popisí in rosik in ḻigatu, natua doman in intau mita nongawasa in yopúon in oaid mita moraat monia tontaní, bo diábí in motaau mongampai kon korimumudan tatua.

YESAYA 13:20

Diá bidon tobatúmai intau in mogutun kon tua. Diá bidon in intau in Arab mododondaḷoi inta moposindog in ḷoḷaigannea kon tampat tatua, bo diá bidon in gombala inta modia kon bembé dombanea sin moranut kon bonok kon tua.

YESAYA 24:1

Ki Tuhan in moyompatbí kon dunia, modapot in mobaḻídon moḷogat bo moingongow. Baḻintuangon-Neabí in tudunea bo poyayiton in intaunea mita.

YESAYA 34:17

Ki Tuhanbí inta nosilai kon butá tatua kon sigad monia bo kon batúannea notarima kon silainea. Mosia in mogutunbí kon tua modapot in mononoi, bo butá tatua in mobaḻí tonsilai monia modapot in adí bo ompu.

YESAYA 66:24

Kon tungkuḷ in mobuat, mosia in mokoontongbí, kon mayat in intau mita inta ain nomarontak kon i-Nakó. Uḷod inta nokaan kon awak monia in diábí matoi, bo tuḷú inta nomokak kon i monia in diábí mopiong; kinoontongan tobatú inta mokokoningkim kon bayongan in intau.”

YEREMIA 49:18

Naonda bo Sodom bo Gomora iyompat takin ḻipú mita kon diugneamai, natua doman in Edom. Diá bidon tobatúmai in intau in mogutunpa kon tua, Akuoi, ki Tuhan, ain nosingog.

YEREMIA 7:20

Akuoi, ki Tuhan Inta Totok in moḷantud, in mopoumabí in torú-Ku inta motoyang kon baḷoi pooibadaan tanaa, kon intau bo kon mahaḷuk, bo kon pangkoi mita in kayu bo kon bungai mita in boyó. Torú-Ku in tumaga-tagab naonda bo tuḷú inta diá kopiongan.”

YEHEZKIEL 29:11

Diábí in intau andeka mahaḷuk in tumaḻib kon tua. Kon bonu in opat nopuḷú notaong diábí in intau in mogutun kon tua.

NAHUM 2:10

Niniwe in norimumudon, moingongow bo noḷogat. Gina in noḻia-ḻiawdon sin moondok. Duḷud in moḻemédon bo mourot. Pogot in bayongan in intau nongobilaidon totok.

WAHYU 18:18

Bo nomaḷú wakutu in mosia nokoontong kon poyok mobunod nongkon tuḷú inta nomokakak kon kotá tatua. Mosia in nomaḷú, “Diábí kon dodai in onda oyúon in kotá ibanea ná kotá inta moḷoben tanaa!”

WAHYU 19:3

Bo singog in intau mobayong tatua in nomaḷú bui, “Dayowdon in ki Allah! Poyok nongkon tuḷú inta nomokak kon kotá moḷoben tatua umuran moidamonik diá in goga-gogainea!”