YESAYA 32:10 - Alkitab Singog In Mongondow Masa In Tanaa

¹⁰ Tanaa moiko mokorasa kon moaman, táe degá totaongpamai moiko in kobuḻiandon in kamang, sin bungai mita in anggur mogoguyaat, bo bungai in boyó ibanea in diá domandon.

YESAYA 32:10 Mawu Ofanana

YESAYA 16:10

Diá tobatúmai in noḷunganga in gina kon gobá mita inta noḷumbá tatua. Diá in nomaḷú nopia-pia in gina andeka nodondong kon gobá in anggur. Diá in nomugut kon anggur sin pomiaan tubig in anggur. Akuoi in nopogogaidon kon goḷokap pia-pia in gina monia.

YESAYA 7:23

Kon tungkuḷ intua gobá mita in anggur inta kon batúannea pinomuḷaan kon pangkoi in anggur toribu bo inta boḻinea in toribu in doit saḷaka, in kobiagan in bo bonganga.

YEREMIA 8:13

Moibog totok in Akuoi mosipun kon umat-Ku naonda bo intau mosipun kon bungai in boyónea. Táe, umat-Ku in naonda bo pangkoi in anggur bo pangkoi in ara inta diá nomungai, nodapot in daunnea mita in noḷaot domandon. Tuamai Akuoi in nobogoidon kon intau ango-angoi in namangoi bo nongawasa kon butá monia. Akuoi, ki Tuhan, ain nosingog.”

HOSEA 2:12

Daiton-Kubí yompaton in pangkoi mita in anggur bo pangkoi mita in ara inta podudui kon inia nobaḻí tondan in pinobatuangannea kon intau mita inta nosiug takinnea. Baḷuian-Kubí in gobá mita in anggur bo gobá mita in aranea mobaḻí kayuon; mahaḷuk mita ḻindong in nomoguyaatbí kon tua.

HOSEA 3:4

Natuabí doman in bangusa in Israel; noonggotdon totok in mosia in musti mobiag takin diá in datu andeka itoi, takin diá in kuruban andeka tugu mita mokaramat, takin diádon in berhala mita andeka ajimat mita inta mopotaau in onu inta noibunipa kon singgai moidudui.

YOËL 1:12

Pangkoi mita in pinomuḷa kon rawang noingkagdon komintan: pangkoi in anggur, apel, ara, kurma bo delima. Dá rayat in diádon in ḷunganga in gina.

YOËL 1:5

Ei intau mita inta nongoḷoḷangu, pobangondon! Ei mongonginum mita, pongombaḷdon! Sin anggur inta mobagu inagowdon nongkon bibigmu.

YOËL 1:7

Mosia in noyompat kon pangkoi in anggur naton, bo pangkoi in ara naton, dongkadon tuodnea. Pangkoinea mita iningkuḻitandon monia, nodapot in tanganea mita nobudódon.

HABAKUK 3:17

Umpaka pangkoi in ara diá in bungainea bo pangkoi in anggur diá in anggurnea, umpaka bungai in zaitun diá in notuoi bo bungai in gandum kon gobá mokokudai kon gina, umpakabí domba mita minatoidon komintan bo kobang in bobiagon diá in bonunea,

ZEPANYA 1:13

Kapunyaan monia in agowonbí bo baḷoi mita monia in rimumudon. Mosia in mobaḷoibí, táe diábí koutunannea. Mosia in momuḷabí kon anggur táe diábí moiinum kon tubignea.”