YESAYA 31:3 - Alkitab Singog In Mongondow Masa In Tanaa

³ Intau in Mesir tongábí intau, deemanbí Allah. Kabaḷo monia in biagbí biasa, deemanbí ná ki Allah. Aka ki Tuhan mopoaid in oaidan-Nea, bangusa inta mototuḷung tatua in moipintudbí bo bangusa inta sinuḷungannea in moḷabúbí. Dá taya dua tua in tumpaḷa moyopú.

YESAYA 31:3 Mawu Ofanana

TAWARIKH 2 32:8

Kon inia in ropot in intau, táe kon inaton in ropot i Tuhan Allah naton inta motuḷung bo moparang kon kopontingan naton.” Nokodongogmai kon tosingogon mita in datu monia tatua, rayat inangoian in barani.

MAZMUR 118:8

Mopia-piabí kon mosingayow kon i Tuhan, dika in mopongata kon intau.

MAZMUR 33:17

Kabaḷo in diábí motaau pongata kon mokountung, ropotnea inta moḷoben in diábí mokosaḷamat.

MAZMUR 9:20

Sindogdon, o Tuhan, sisigaidon in bangusa mita, dika pomayá mako in intau ḷumoḷatú.

YESAYA 10:3

Onu in pomiaan monimu kon singgai ki Allah mohukum kon i monimu? Onu in aidanmu kon dodai in Sia mopoangoi in anib nongkon ḻipú inta moyayú? Ki ine in pokituḷungan monimu? Kon onda in pobunian monimu kon kaoyúonanmu tatua?

YESAYA 20:4

Datu in Asyur in modakopbí kon intau mita nongkon ḻipú doyowa tatua bo mosia in diaanbí sipilang. Noguyang noguod, komintanbí mayá takin diá koḷambung bo aip in sioḷ bo imbuḻínea in koontongan, nobaḻí singkuḻe kon Mesir.

YESAYA 20:6

Kon tungkuḷ intua intau mita inta nogutun kon bingkí in dagat in mogumandon, ‘Indoiaika onu inta nobaḻí kon bangusa inta pinongata naton sin moḷukad kon i naton nongkon datu in Asyur. Umpaka yo mosaḷamat in kita?’ ”

YESAYA 30:16

Nodapotbí in moiko nomiabí kon tomayá sin moḷagui nongkon musung tumakoi kon kabaḷo inta moḻikat. Mopia! Totuu moiko in mustibí moḷagui! Kai monimu kamai dá kabaḷomu tua in tugatbí in koḻikatnea, bokaka mogogaḷumubí in moḻika-ḻikat nongkon i monimu.

YESAYA 30:5

bayongan in intau mooyábí popisí in nopongatadon in bangusa inta diá in mangaḻenea kon i monia. Inta nouḻí monia in deemanbí kauntungan andeka totuḷung, táe singkuḻebí.”

YESAYA 30:7

Totuḷung in Mesir diábí in mangaḻenea. Tuamai Mesir sinangoian-Ku, ‘Naga inta diá mokobahaya’.”

YESAYA 36:6

Totuu kon iko in umandoḷ mako kon totuḷung in Mesir, táe tua in notongkaibí in moponungkud in pangkoi in padang; – bá moputoḷ in tungkud tatua bo ḻimamu in moiturak. Natuata in aid in datu in Mesir kon bayongan intau inta umandoḷ mako kon inia.’ ”

YESAYA 36:9

Umpaka tongá monayow kon porwira in Asyur inta totok in moompá yo moiko nion in deemanbí ḷawangnea. Tongá moiko in moharap doman mako kon Mesir in mokidia in bantungan kereta in parang bo tontara mita inta tumakoi kon kabaḷo!

YESAYA 9:17

Kororaat in bangusa tatua in nonurub naonda bo tuḷú inta noḷeḷep kon dogami. Dokotnea in naonda bo kayuon noturub inta nopodamonik in poyok mobarong.

YEREMIA 15:6

Moiko in nondoídon bo nonaḷámai kon i-Nakó, tuamai in tonggóon-Ku in ḻima-Ku sin porimumud kon i monimu, sin mobúdon in Akuoi in momondam kon torú-Ku.

YEREMIA 17:5

Ki Tuhan in noguman, “Aka intau monaḷámai kon i-Nakó, ki Tuhannea, bo umandoḷ kon intau poḷat umandoḷ kon ropotnea, dá hukumon-Ku in sia.

YEHEZKIEL 28:2

“Ei intau ilo-ilow, potaaudon kon i datu in Tirus, onu inta poguman-Ku, Akuoi ki Tuhan Inta Totok in moḷantud kon inia, ‘Iḷumoḷatú totok in iko in nonganggap kon iko in dewa inta nomarenta kon yua-yuak in dagat. Motaaubí doman iko in tumon dewa, táe toropdon, iko in tongábí intau ilo-ilow.

YEHEZKIEL 28:9

Yo, aka moiangoidon in wakutunea tatua, mokopogumanpa degá in iko kon iko in ki Allah? Kon tayowon in moḷoḻimodmu mita, moniatadon kon iko in tongábí intau ilo-ilow.

AMOS 2:15

Momomiot in diábí mokotongod, mororibatuk moḻikat diábí mokoḷagui, bo inta sinumakoi kon kabaḷo in diábí mosaḷamat.

MATIUS 15:14

Pomayádon mako intau mita natua. Sin mosia tua in intau bilog inta motundú kon daḷan kon intau doman bilog. Sin aka intau bilog bo mokapit kon intau doman bilog, yo tumpaḷabí in taya dua moḷabú kon bubú.”