YESAYA 26:5 - Alkitab Singog In Mongondow Masa In Tanaa

⁵ Ki Tuhan mopoonag kon intau inta moḷoḷatú; Sia in morimumud kon kotá monia inta dininding, bo potondodaion-Nea in butá.

YESAYA 26:5 Mawu Ofanana

MAZMUR 79:8

Dikabí mohukum kon inami popisí in dosa in mogoguyang nami. Ḷagidon kotabi in kami, sin nodaitdon in kamang nami.

YESAYA 13:11

Ki Tuhan in noguman, “Akuoi in mohukumbí kon dunia popisí in aidnea moraat, bo intau mita inta moraat popisí in dosa mita monia. Bayongan in inta moḷoḷatú in poompáan-Kubí, intau mododia bo moromú in hukumon-Ku.

YESAYA 14:13

Iko in moniat moponik kon ḷangit bo momia kon tampat pomomarentaanmu kon ḻimonik in tundi inta totok in moonik! Kainimukamai iko in motaaubí ḻimitú mobaḻí datu kon tudu in buḷud kon dotá in utuan, tampat pinoyosipunan in dewa mita.

YESAYA 2:12

Kon singgai tatua ki Tuhan Inta Totok in mokawasa in mopoompámai kon bayongan inta motosiḷantud bo mohukum kon bayongan inta moḷoḷatú bo inta mododia.

YESAYA 24:10

Sinangkub in kotá noropatoi; bayongan in ngara in ḷoḻingkop in baḷoi kinunsían sin kitogi baḷoi moondok.

YESAYA 25:2

Kotá tatua ain irimumud-Mu; kotá inta dininding tua dongkadon rumbunnea. Komaḻig inta pinosindog in intau ango-angoi ain noyompat, bo diá bidon pinosindog bui dapot in mononoi.

YESAYA 32:19

Totuu mosanang in moiko komintan sin tugat in tubig kon pinomuḷamu, bo bobiagonmu in kon ondakabí in bayáannea pongaanan takin diá in monuyayow. Táe musungmu in nádon onda bo kayuon inta inonag in uyan batu bo kotá monia in rumbunon.

YESAYA 47:1

Ki Tuhan in noguman, “Ei, Babel, poponagdon nongkon pomomarentaanmu, bo ḻitúdon kon tudu in ḷobud. Iko in diá bidon mosoing bo mopia ná dungkuḷmai.

YEREMIA 51:37

Butá tatua in mobaḻíbí bonturungan in goguyaatnea, pogogadopan in ungkú in kayuon. Mokoningkimbí in intau in moindoi kon inia, bo diábí tobatúmai in intau in moibog mogutun kon tua.

YEREMIA 51:64

poḷat moguman, ‘Nanaa in mobaḻí kon Babel. Butá tanaa in moitaḷomdon bo diá bidon momuká bui popisí in bodito inta pinopoantug i Tuhan kon inia.’ ” Tosingogon mita i Yeremia nopaḷut kon naa.

OMBAḶ 2:2

Bayongan in rawang in bonok kon butá in Yohuda, irimumud-Nea takin diá in tabi. Kon bonu in torú-Nea dinangatan-Nea nodapot in noumpag in dinding mita inta nogoḻingoi kon butá tatua. Dodatuan tatua takin itoinea mita iḷabú-Nea nodapot in mokooyádon.

YEHEZKIEL 26:11

Tontara mita inta sinumakoi kon kabaḷo tatua in monubu kon daḷanmu mita bo moḻimod kon intaumu momaké in kedang monia. Tugumu mita inta mogaga bo moropot in umpagonbí.

YEHEZKIEL 28:17

Batanganmu inta mogaga nokoḷoḷatú kon inimu bo kaoyúonanmu nokopopisí kon inimu notombodok. Tuamai pinomobak-Ku in iko kon butá bo binaḻí-Ku tompoingat kon datu mita ibanea.’ ”

WAHYU 18:2

Nanaa in pinobaḷúnea: “Ain noḷabú! Babel kotá moḷoben tua ain noḷabú! Tanaa sia in nobaḻídon tampat in dimbuḷó bo dimukud mita moraat. Bo kon bonunea in nobiagdon norupa-rupamai in ḷagapan inta nonajis bo inta kinodoí in intau.