Ki Tuhan in noguman, “Akuoi in mohukumbí kon dunia popisí in aidnea moraat, bo intau mita inta moraat popisí in dosa mita monia. Bayongan in inta moḷoḷatú in poompáan-Kubí, intau mododia bo moromú in hukumon-Ku.
Táe bayongan in intau mokokiangoi inta moromú tua in mobuḻibí naonda bo ḷobud andeka baḻeká inta inirup in tompot. Moidaḻidon mamangoi bo diábí sinangka mako.
Mosia in kumuábí kon butá naonda bo uḷag. Takin ondok bo urot mosia in ḷumuaidon nongkon poḷoḷukadan monia, bodongka mamangoi kon ini-Mu, o Tuhan Allah nami.
Onda intua bayongan in intau inta nobiagpa kon sigad in bangusa mita inta nonubu kon Yerusalem, in mayádon in kotá sin mosumba kon i Datu, ki Tuhan Inta Totok in mokawasa, bo morame kon singgai Moḷoben Ḷuḷung Daun.
Dá ki Tuhan in momarenta saḷaku datu kon sinangkub in butá; pomuḷoi in intau in mosumbabí kon i-Nia saḷaku ki Allah bo monotaau kon i-Nia takin tangoi inta notongkai intua.
Dá dodai intua nobaḻídon in ḻinug inta totok in moropot. Bo sepersepulú nongkon kotá tatua norimumud. Pitu noribu intau minatoi wakutu in ḻinug tatua. Intau mita ibanea in totokdon in noondok, dá nodayowdon in mosia kon koḷoḷoben in kawasa i Allah inta kon soroga.