YESAYA 24:23 - Alkitab Singog In Mongondow Masa In Tanaa

²³ Buḷan in simindip bo mata in singgai in diá bidon monindar, sin ki Tuhan Inta Totok in mokawasa in momarentabí mobaḻí datu. Sia in momarentabí kon Yerusalem, kon tudu in Buḷud in Sion, bo mopoontong in koagung-Nea kon itoi mita in umat-Nea.

YESAYA 24:23 Mawu Ofanana

MAZMUR 97:1

Ki Tuhan in Datu! Biódon mako in butá mokoposanang, bo ḻibuton mita in moḷunganga.

IḶUAIAN 15:21

Ki Miryam nonongganut kon i monia nodondong, “Podondongdon kon i Tuhan, sin Sia in mokawasa totok. Bayongan in kabaḷo bo mododianea pinogarab-Nea kon bonu in dagat tatua.”

YESAYA 12:6

Ponggoḷokapdon ei intau mita in Sion, podondongdon takin sanang in gina. Ki Allah mokudus in israel totuu kon momulia, Sia in nogutun kon yua-yuak monimu.”

YESAYA 13:10

Batúan in tundi bo pinosipunan in tundi mogogai in monindar; mata in singgai in simindip kon dodai in sia momuká, bo buḷan in diá bidon monindar bui.

YESAYA 30:26

Buḷan in monindarbí ná kobayag in mata in singgai, bo mata in singgai in mobayagdon kopitu in kobayagnea ná biasamai, naonda bo bayag in pitu nosinggai sinipun nobaḻí tosinggai. Tua komintan in mobaḻíbí kon tungkuḷ in ki Tuhan mobakut bo mongundam kon kekeb mita in umat-Nea inta ain binibilnea.

YESAYA 33:17

Moiangoi in wakutunea moiko in mokoontong kon datu tobatú inta momarenta takin kamuliaan kon sinangkub in butá kon bayongan in tampat.

YESAYA 33:22

Bayongan in touḷut kon kapaḷ monia diá in mangaḻenea; ḻeagnea mita diá motaau songkaan! Bayongan in kaoyúonan in musung in agowon naton, bo mobayong totok, modapot in intau ḻempeng in mokouḻíbí doman kon tonsilai. Ki Tuhan tontaní in mobaḻí datu naton; Sia in momarenta, moposindog in hukum bo moposaḷamat kon i naton nongkon musung.

YESAYA 52:7

Totuu mosanang in mokoontong kon koangoian in totabá, Sia in mayá mongin buḷud bo modia kon habar mopia habar kobiagan mopia, habar kasaḷamatan kon Sion, kainia, “Allahmu in Datu!”

YESAYA 60:1

Sindogdon bo kobaḻídon bayag, ei Yerusalem, sin bayag in kasaḷamatanmu in noiangoidon; Ki Allah in monimbayagbí kon inimu takin kamuliaan-Nea.

YESAYA 60:19

Iko in diábí paraḷu sindaran mata in singgai kon dodai in singgai, bo diábí paraḷu simbayagan in buḷan kon dodai in doḷom. Sin Akuoi ki Tuhan in nobaḻí mononimbayag mononoi kon inimu, Akuoi in monindar kon inimu pongin kamuliaan-Ku.

YESAYA 60:20

Kon inimu in oyúonbí in mata in singgai inta diádon tumoyo-toyop, bo buḷan inta diá kon dodai in onda in tumoyop. Sin Akuoi ki Tuhan in nobaḻí mononimbayag mononoi kon inimu wakutumu mononogumatoi in mopaḷutdon.

YEHEZKIEL 48:35

Bayongan in dinding tatua kobanatnea in siow nopuḷú noribu nometer. Bo pinangkoi kon tanaa intau monangoi kon kotá tatua: “Ki Tuhan IN OYÚON IN KON TUA!”

DANIEL 7:18

Táe umat i Allah Inta Totok in moḷantud in motarimabí kon hak momarenta bo pomarentaannea in modapotbí in mononoi.”

DANIEL 7:27

Kawasa bo koḷoḷoben in bayongan in dodatuan kon dunia in ogoi kon umat i Allah Inta Totok in moḷantud. Kawasa monia momarenta in diábí in imbuitnea bo bayongan in mongongawasa kon dunia naa in mobantungbí kon i monia takin toindudui.”

YOËL 2:31

Mata in singgai in simindipdon bo buḷan in mobaḻídon mopura naonda bo dugú. Tua komintan in mobaḻí kon dodai in diápa moiangoi in Singgai i Tuhan, singgai inta motoyang bo mokokoningkim!

YOËL 3:15

Mata in singgai bo buḷan in simindipdon, bo tundi mita in diádon monindar bui.”

OBAJA 1:21

Intau in Yerusalem inta nountung in monubu kon Edom poḷat mopotungkud. Dá Akuoi ki Tuhan in momarenta mobaḻí datu.”

MIKHA 4:7

Mosia in pinotungkudon bo noyayúdon nongkon ḻipúnea tontaní. Táe, nongkon intau mita inta kiagatnea tatua baḻíon-Kudon in buí inta mobagu. Mosia in mobaḻídon bangusa inta moḷoben bo moropot. Akuoi in momarentabí kon i monia kon Tombuḷud in Sion modapot in mononoi.”

ZAKHARIA 14:6

Aka singgai tatua moiangoi, yo diá bidon in tompot motumping andeka eis.

ZAKHARIA 14:7

Kon singgai tatua diá bidon in mosindip. Singgai in umuran bidon mobayag, natuabí doman kon dodai in doḷom. Táe tongábí ki Tuhan in nonotaau mongo toonu in koangoian in singgai tatua.

ZAKHARIA 9:9

Ei intau in Sion, pokoḷungangadon! Ei intau in Yerusalem, ponggoḷokapdon! Indoiaika! Datumu in mamangoi takin nountung! Sia in datu moadil inta nodia kon kasaḷamatan. Táe moompá totok in dodia sia in noiyaput sinumakoi kon keledai, keledai batánea.

MATIUS 24:29

“Naonda in mopaḷutdon roriga wakutu intua, yo mata in singgai mosindip, bo buḷan diádon monindar. Bo tundi mita in mongoḷabú nongkon ḷangit, bo kawasa mita kon baḷangon moirangkap.

MATIUS 6:10

Ikobí in Datu nami. Igumon mako Iko in momarenta kon dunia naa, bo inta koibog-Mu in duduian naonda bo kon soroga.

MATIUS 6:13

Donaaidon pomayá mako in kami kobuḻian in pirisaya kon dodai in kami koantugan in totungkuḷ, táe pilataidon in kami nongkon kawasa i inta Moraat! [Sin Ikobí in Datu inta mokawasa bo momulia dapot in mononoi. Amin.]’

IBRANI 12:22

Tongá aka moiko namangoidon in Buḷud Sion bo kotá i Allah inta nobiag, tuata in Yerusalem inta kon soroga takin ribuan malaekat-Nea.

WAHYU 11:15

Bo malaekat impitunea in nogirup kon torompetnea, dá kinodongogandon in singog mita inta mongoḷangon totok nongkon soroga noguman, “Kawasa momarenta kon dunia naa, masai naa kinadaiandon i Tuhan naton, bo i Datu mopoposaḷamat inta pinodandi-Nea. Sia bidon in momarenta modapot in mononoi!”

WAHYU 14:1

Noidudui kon tua inontongku in ki Adí in Domba sinimindog kon tudu in Buḷud Sion. Kotaki-takinnea oyúon in 144.000 intau inta kon pogot monia ain pinaisan in tangoi-Nea bo tangoi i Amá-Nea.

WAHYU 19:4

Dá doyowa nopuḷú boopat in itoi mita tatua bo mahaḷuk opat inta iḻimibu kon tampat pomomarentaan tatua sinumungkud bo nosumba kon i Allah inta iḻimitú kon tampat pomomarentaan tatua. Mosia in noguman doman, “Amin! Dayowdon in ki Allah!”

WAHYU 19:6

Onda intua akuoi in nokodongog kon ná giow in intau mobayong inta noyosipun; kotombánea in naonda bo singog in bokoḷ kon dagat bo gotup inta moyo-moyodudui. Dinongogku mosia in noguman, “Dayowdon in ki Allah! Sin ki Tuhan, ki Allah naton Inta Mokawasa tua, nomarentadon in tanaa!

WAHYU 21:23

Kotá tatua diá bidon paraḷu simbayagan mata in singgai ande buḷan, sin kamuliaan i Allah aindon nokosimbayag kon tua, bo ki Adí in Domba in nobaḻí togánea.

WAHYU 22:5

Mosia in diá bidon moparaḷu kon togá andeka bayag mata in singgai, sin diá bidon modoḷo-doḷom in kon tua, bo ki Tuhan Allahbí tontaní in monimbayag kon i monia. Bo mosia in momarentabí saḷaku datu modapot in kopaḷutannea.