YESAYA 21:9 - Alkitab Singog In Mongondow Masa In Tanaa

⁹ Indoiaidon, tuata in mosia! Tontara inta sinumakoi kon kabaḷo inta namangoi tumododoyowa. Onda intua moḷoḷukad tatua nopotaau, “Babel ain noḷabú! Patong mita inta sumbaanmai monia norimumud positabud kon butá.”

YESAYA 21:9 Mawu Ofanana

YESAYA 13:19

Nongkon bayongan in dodatuan, Babel tua in inta totok in mogaga bo mokoyunggagá kon intaunea mita. Táe Akuoi, ki Tuhan, in morimumudbí kon inia, ná inta inaidan-Ku kon Sodom bo Gomora.

YESAYA 14:4

Aka ki Tuhan mopoaidon in tua yo mosia in mopoḷoḻekebí kon datu in Babel nanaa, “Datu inta moromú ain noḷabú! Sia in diá bidon motaau mondorot.

YESAYA 2:18

Berhala mita in moinggamádon komintan.

YESAYA 21:7

Aka sia in mokoontong kon tontara mita inta sinumakoi kon kabaḷo mamangoi tumododoyawa, tontara inta sinumakoi kon keledai bo unta, yo mustibí taridiannea kopiaan.”

YESAYA 47:5

Ki Tuhan in noguman kon Babel, “Kibio-biómaidon, bo tuotdon kon bonu in sindip. Iko in diá bidon bui tangoion ‘Bokí in dodatuan mita.’

YESAYA 47:9

Táe tongábí tokokiap monag, tongo singgai, doyowa tua in mobaḻí moyododai. Umpaka iko mopomaké in sihir bo sinotaau, yo ki buḷoimu bo ki adímu in gamáanbí doman.

YESAYA 48:14

Poyosipundon in moiko komintan bo indongogaidon! Kon sigad in dewa mita diábí in nonoḻindap kon intau inta piniḻí-Ku in monubu kon Babel; Sia in mopobayábí kon onu inta koibog-Ku.

YEREMIA 50:29

Ki Tuhan in noguman, “Potabádon in momomiot monubu kon Babel. Pokipiotaidon in intau mita inta mongotaná momiot. Kopungdon in kotá tatua bo dikadon pomayá mako in intau tobatúmai in mokoḷagui. Tuḻíaidon in bayongan oaidnea bo popoaidon kon inia podudui in aidnea, sin sia in nopoaidon in inta mokotor kon i-Nakó, Inta Totok in motusi, Allah in Israel.

YEREMIA 50:38

Ingkagai in bayongan in ongkag bo gobánea! Sin, Babel in nopuḻingdon in berhala mita inta mokorongó, inta nokopopisí kon intau mita mososumbanea nobaḻí nobundai.

YEREMIA 50:42

Mosia in nodia kon piot bo pandong; mosia in morongut bo diábí kotaauan monia in ampung. Nádon gonugur in bokoḷ kon dagat natuata in singog in sioḷ in kabaḷo monia inta moribatuk sin mamangoi monubu kon Babel.

YEREMIA 50:9

Potabá-Kubí in tongonumai in bangusa inta mongoropot nongkon utuan sinbá monubu kon Babel. Tompiaanbí monia in pipidan sin moparang monayow kon Babel bo monaḷow kon i monia. Mosia in momomiot mita inta mongotoyang inta diábí nokoimontanmai in moitabat.

YEREMIA 51:27

“Ei datu nongkon utuan! Ogoiaidon in tomponuot monubu! Irup in torompet sinbá bangusa mita in mokodongog! Potabá in bangusa mita moparang monayow kon Babel! Potabá in dodatuan Ararat, Mini bo Askenas monubu. Duí in panglima tobatú sin mobaḻí itoi kon ponubuan tatua. Oinídon in kabaḷo ná kobayong in paanan in pangkoḷá.

YEREMIA 51:44

Bel, dewa in butá in Babel, in hukumon-Kubí. Baḻíon-Ku in sia mopobui kon onu inta ain inagownea. Bangusa mita in diá bidon mosumba kon inia. Dinding mita in Babel in norumbundon.

YEREMIA 51:47

Popirisayadon, moiangoibí in wakutunea Akuoi in mohukum kon berhala mita in Babel. Sinangkub in butá tatua in singkuḻeonbí, bo bayongan in intau kon bonunea in ḻimodon.

YEREMIA 51:52

Yo, taridiai in tosingogon-Ku tanaa. Moiangoibí in wakutunea Akuoi mohukum kon berhala mita in Babel. Kon sinangkub in butá tatua in kodongoganbí in amui in intau popisí in kinekeban modaḷom.

YEREMIA 51:64

poḷat moguman, ‘Nanaa in mobaḻí kon Babel. Butá tanaa in moitaḷomdon bo diá bidon momuká bui popisí in bodito inta pinopoantug i Tuhan kon inia.’ ” Tosingogon mita i Yeremia nopaḷut kon naa.

YEREMIA 51:8

Táe daḻídon noḷabú in Babel bo noḷosi. Ombaḷaidon in sia, bo potayakaidon kon undam pongundam kon kekebnea mita, dika-dika bo mopiapabí in sia.

WAHYU 14:8

Malaekat induanea in dinumudui kon malaekat inta muna bo sindaḷan mopobaḷú, “Ain noḷabú! Kotá in Babel inta moḷoben tatua ain noḷabú! Sia inta ain nopoḷoḷangu kon bayongan in bangusa takin tubig in anggur – tuata in anggur nongkon ibognea inta mokotor!”

WAHYU 18:2

Nanaa in pinobaḷúnea: “Ain noḷabú! Babel kotá moḷoben tua ain noḷabú! Tanaa sia in nobaḻídon tampat in dimbuḷó bo dimukud mita moraat. Bo kon bonunea in nobiagdon norupa-rupamai in ḷagapan inta nonajis bo inta kinodoí in intau.

WAHYU 18:21

Onda intua, tobatú malaekat inta moropot, nobingkat kon tobatú batu inta ná koḷoben in giḻingan, bo pinogambatnea kon bonu in dagat bo poḷat noguman, “Pomiaan natua in kotá in Babel inta moḷoben tua, pogambat koropoton sahingga in diádon bui ontongon.