YESAYA 13:6 - Alkitab Singog In Mongondow Masa In Tanaa

⁶ Pogamuidon, sin singgai i Tuhan in nodiugdon, tuata in singgai koyopúan inta pinoangoi i Tuhan Inta Totok in mokawasa.

YESAYA 13:6 Mawu Ofanana

AYUB 31:23

Diábí in akuoi mogaid kon natua, sin hukuman i Allah totok in nokoondok kon ginaku.

YESAYA 10:25

Kon bonu in wakutu motoyong torú-Ku kon inimu mogogaidon, bo mosia in yopúon-Ku.

YESAYA 10:3

Onu in pomiaan monimu kon singgai ki Allah mohukum kon i monimu? Onu in aidanmu kon dodai in Sia mopoangoi in anib nongkon ḻipú inta moyayú? Ki ine in pokituḷungan monimu? Kon onda in pobunian monimu kon kaoyúonanmu tatua?

YESAYA 13:9

Singgai i Tuhan in moiangoibí, bo kon singgai tatua ki Tuhan in mopoaid in torú-Nea bo rogi-Nea inta motoyang. Butá in mobaḻí butá inta moḷogat, bo bayongan in intau baradosa in moyopú.

YESAYA 14:23

Babel in baḻíon-Ku rawa mita inta pogutunan in monikuḷu. Babel in kaitan-Kubí kodariton. Akuoi, ki Tuhan Inta Totok in mokawasa ain nosingog.”

YESAYA 14:31

Pogamuidon bo pomaḷúdon mopoigum in totuḷung, ei kotá mita in Pilistin! Kodoḻiokdon in moiko komintan popisí in moondok! Goḷom in ḷobud mokompoḷ nongkon utuan nobaḻí tomponuot kon kinoangoian in tontara in musung; diábí in moondok in kon sigad monia.

YESAYA 2:12

Kon singgai tatua ki Tuhan Inta Totok in mokawasa in mopoompámai kon bayongan inta motosiḷantud bo mohukum kon bayongan inta moḷoḷatú bo inta mododia.

YESAYA 23:1

Naadon in koyow soaḷ Tirus. Ei ḷoḷumeag mita in Spanyol inta noḻibu kon baḷangon, pogamuidon! Kon dodai in iḷumeag nobui nongkon Siprus, moiko in pinopotaauan kon kotá in Tirus ain norimumud. Totubuan bo baḷoimu mita ain nobaḻí apat.

YESAYA 34:2

Ki Tuhan in tumorú kon bayongan in bangusa bo bayongan in tontara monia. Hukumon-Neabí bo yopúon in mosia.

YESAYA 34:8

Tuata in wakutu i Tuhan moduḷu kon Sion bo motuḻí kon musung-Nea mita.

YESAYA 47:11

Táe iko in koantuganbí in bodito, totaau in sihirmu diábí mokopoḷagui kon inia. Iko in angoionbí in bodito, bo diábí mokotongod in monayow. Koyopúan in daḻídon moiangoi, bo diábí muna kinoraianmu.

YESAYA 52:5

Tanaa onu in urusan-Ku kon naa? Intau in Babel nodakop kon i monimu natua mako. Mosia inta nondorot kon i monimu dinumodia bo tantú mopoompámai kon i-Nakó.

YESAYA 61:2

Sia in nopotabá kon inakó sin mopohabar kon naadon in wakutunea ki Tuhan moposaḷamat; sin moḻipoi kon bayongan inta kinopatoian, bo motuḻí kon musung mita monia;

YESAYA 63:4

Akuoi in nonomayádon kon singgai ponuḻían, bo wakutu popoḷuatan kon umat-Ku.

YESAYA 65:14

Totuubí, mosia in morogiow takin ḷunganga in gina, táe moiko in mongombaḷbí takin moajar in gina.

YEREMIA 25:34

Ei itoi mita, ei gombala mita in umat i Tuhan! Pongombaḷdon koropot! Ponangkuḻitodon kon ḷobud, sin noiangoidon in wakutunea ḻimodon in moiko, bo inta mokoḷagui in porariton. Moiko in nádon kuyon koboḻi inta noḷabú bo noḷosi.

YEREMIA 49:3

Ei intau in Hesybon, pongombaḷdon sin kotá in Ai in norimumudon! Ei bobay mita in kotá in Raba, pogamuidon! Pogidaingdon in daing karong tomponuot kon morobonoḷ in gina. Poribatukdon magí mako sin motoboḻingo. Milkom dewamu in akutonbí pobayá in poḷumbúan moyotakin in imang mita bo pojabat mita in pomarentanea!

YEREMIA 51:8

Táe daḻídon noḷabú in Babel bo noḷosi. Ombaḷaidon in sia, bo potayakaidon kon undam pongundam kon kekebnea mita, dika-dika bo mopiapabí in sia.

YEHEZKIEL 13:5

Mosia in diábí noḷukad kon tampat mita inta dinding mita in kotá ain noumpag, bo diá doman nonompia kon dinding mita tatua. Dá, Israel in diá bidon motaau tahangon aka mobaḻí in parang kon singgai Akuoi, ki Tuhan mamangoi mohukum.

YEHEZKIEL 21:12

Ei intau ilo-ilow, pogamuidon bo pomaḷú! Sin kedang tatua in nosadiadon monayow kon umat-Ku. Itoi mita in Israel takin bayongan in bangusa tumbukonbí in kedang tatua modapot in matoi. Dá tokapdon in dodobmu takin robonoḷ,

DANIEL 5:26

Bo naa in mangaḻenea: Iniap, sempo in pomarentaan i Tuangku ain iniap i Allah bo sinimpodandon;

DANIEL 5:9

Ki Datu Belsyazar inagíandon in ondok bo nobilaidon bui; bo intau moḷobennea doman mita totokdon in notoboḻingo.

YOËL 1:11

Ei monononggobá, pogamuidon! Ei monononggobá kon anggur, pongombaḷdon! Sin gandum, makoya bo bayongan in bungai in boyó nogoguyaatdon.

YOËL 1:13

Ei imang mita inta nogundoi kon mezbah, pakédon in kaeng karong, bo pongombaḷdon. Tuotdon kon bonu in Baḷoi Tuhan sin mogamui kinoouput in doḷom, sin diádon in kuruban anggur bo gandum kon i Allahmu.

YOËL 1:15

Singgai i Tuhan in nodiugdon, singgai inta mokokoningkim; wakutu ki Inta Totok in Mokawasa morimumud.

YOËL 1:5

Ei intau mita inta nongoḷoḷangu, pobangondon! Ei mongonginum mita, pongombaḷdon! Sin anggur inta mobagu inagowdon nongkon bibigmu.

YOËL 2:1

Irupdon in torompet, posingogdon in tomponuot in anib kon tombuḷud in Sion inta motusi, pinogutunan i Allah. Kourotdon, ei intau in Yohuda! Sin Singgai i Tuhan in nodiug bo ḷagidon moiangoi.

YOËL 2:11

Singog i Tuhan naonda bo gotup, nobogoi in tomponuot, kon tontaranea inta moparang. Totuu modamaḷ in tontaranea! Totuu moropot in tontara inta nopobayá in parenta-Nea! Totuu mokoondok bo motoyang in Singgai i Tuhan! Diá tobatúmai in intau in mokotongod kon koangoian in singgai i Tuhan tatua.

YOËL 2:31

Mata in singgai in simindipdon bo buḷan in mobaḻídon mopura naonda bo dugú. Tua komintan in mobaḻí kon dodai in diápa moiangoi in Singgai i Tuhan, singgai inta motoyang bo mokokoningkim!

AMOS 5:18

Totuu kon moboditobí in moiko inta mokotanob kon singgai i Tuhan! Onubí in mangaḻenea in singgai tatua kon inimu? Singgai tatua in tongábí nobaḻí singgai inta mosindip, deemanbí singgai inta mobayag kon inimu.

ZEPANYA 1:14

Singgai pohakiman i Tuhan in nodiugdon, oo totokdon in nodiug, sedang bo ḷagi bidon moiangoi. Singgai tatua in nopuḻing in robonoḷ in gina, nodapot in tontara mita inta totok in motorindogpa in kumokowbí totok popisí in kobuḻiandon in kamang!

ZEPANYA 1:7

Singgai i Tuhan in nodiugdon, kon singgai tatua oyúonbí in pomiaan i Allah; tuamai in kibio-biómaidon kon tayowon-Nea. Ki Tuhan in nosadiadon momatoi kon umat-Nea naonda bo kuruban sosumba bo Sia in nogoinídon kon musung mita in Yohuda.

ZAKHARIA 14:1

Singgai pohakiman i Tuhan in nodiugdon. Dá Yerusalem in pogagowanbí, bo onu in kinoagowan tatua silaionbí kon tayowonmu.

MALEAKHI 4:5

Táe kon dodai in deemanpa singgai inta motoyang bo mokoondok inta sinantú-Ku tatua moiangoi, yo potabá-Ku mamangoi kon i monimu in ki Nabi Elia.

YAKOBUS 5:1

Utat mita, intau inta nobiag nooyúon! Indongogaidon in tongginaku naa. Moiko in musti mongombaḷ bo mogamui sin moiko in koantuganbí in roriga!

WAHYU 18:10

Mosia in simindogbí mokopoyayú sin moondok in koantugan in roriga tatua. Mosia in moguman, “Ado, totokdon in mobodito in kotá moḷoben tanaa – kotá in Babel inta moropot! Tongá kon bonu in tojam pinopoaidan in hukuman kon inimu!”