YESAYA 13:19 - Alkitab Singog In Mongondow Masa In Tanaa

¹⁹ Nongkon bayongan in dodatuan, Babel tua in inta totok in mogaga bo mokoyunggagá kon intaunea mita. Táe Akuoi, ki Tuhan, in morimumudbí kon inia, ná inta inaidan-Ku kon Sodom bo Gomora.

YESAYA 13:19 Mawu Ofanana

KINOBAḺIAN 19:24

Indoianmai daḻídon in ki Tuhan nopoonag in uyan balerang inta kodoko-dokot. Tua mita in noḷabú kon Sodom bo Gomora.

KINOBAḺIAN 19:25

Kotá doyowa tatua pinokak, ná doman tua in bayongan ḷopá bo bayongan mobobiag takin bayongan intau inta nogutun kon tua.

YESAYA 13:1

Naa in koyow i Allah, inta sinarima i Yesaya adí i Amos soaḷ Babel:

YESAYA 21:9

Indoiaidon, tuata in mosia! Tontara inta sinumakoi kon kabaḷo inta namangoi tumododoyowa. Onda intua moḷoḷukad tatua nopotaau, “Babel ain noḷabú! Patong mita inta sumbaanmai monia norimumud positabud kon butá.”

YESAYA 47:5

Ki Tuhan in noguman kon Babel, “Kibio-biómaidon, bo tuotdon kon bonu in sindip. Iko in diá bidon bui tangoion ‘Bokí in dodatuan mita.’

YESAYA 48:14

Poyosipundon in moiko komintan bo indongogaidon! Kon sigad in dewa mita diábí in nonoḻindap kon intau inta piniḻí-Ku in monubu kon Babel; Sia in mopobayábí kon onu inta koibog-Ku.

YEREMIA 25:12

Mopaḷut mako kon tua Akuoi in mohukum kon bangusa in Babel bo datunea popisí in dosa monia. Butá in Babel in rumbunon-Ku bo bióon-Ku mako in morimumud modapot in mononoi.

YEREMIA 49:18

Naonda bo Sodom bo Gomora iyompat takin ḻipú mita kon diugneamai, natua doman in Edom. Diá bidon tobatúmai in intau in mogutunpa kon tua, Akuoi, ki Tuhan, ain nosingog.

YEREMIA 50:40

Naonda in pinoyoyompat-Ku kon Sodom bo Gomora takin ḻipú mita inta kon diugneamai, yo natua doman in poyoyompat-Ku kon Babel. Diá bidon tobatúmai in mogutun kon tua. Akuoi, ki Tuhan, ain nosingog.

YEREMIA 51:26

Diábí tobatúmai in batu nongkon kinorumbunanmu in pakéonpa bui mobaḷoi. Iko in mobaḻídon naonda bo padang gurun modapot in mononoi. Akuoi, ki Tuhan, ain nosingog.”

YEREMIA 51:29

Butá in moḷundan bo modandú popisí in Akuoi koyogot mopobayá in tomayá-Ku sin mopobaḻí kon Babel tampat moḷogat inta diádon inutunan in intau.

YEREMIA 51:41

Ki Tuhan in noguman, “Babel inta dinayow in sinangkub in dunia ain inagow bo iḻitúan! Totok in mokokoningkim in butá tatua kon bangusa mita.

YEREMIA 51:62

Mopaḷut mako kon tua posambayang nanaa, ‘Tuhan, Iko in nogumandon kon kotá tanaa in rimumudon-Mu dá pinomayá intau andeka mahaḷuk in moyopúdon komintan, bo tampat tanaa in mobaḻídon naonda bo padang gurun modapot in mononoi.’

DANIEL 4:30

akuoi in noguman, “Indoiai, totuu motoyang in kotá in Babel! Akuoibí in noposindog kon tua nobaḻí ki iná in negara sin moponiata kon kawasa bo ropotku, koḷoḷantud bo koḷoḷobenku!”

AMOS 4:11

Tongosilai nongkon i monimu yopúon-Ku ná pinoyoyopú-Ku kon Sodom bo Gomora. Inta nobiagpa kon sigad monimu in naonda bo ḷomput in kayu inta ginamá nongkon tuḷú. Umpaka natua, moiko in diábí doman nobui mangoi kon i-Nakó.

ZEPANYA 2:9

Podoyon kon i-Nakó inta nobiag, ki Allah in bangusa in Israel, Akuoi in moyompatbí kon bayongan in Moab bo Amon naonda bo Sodom bo Gomora. Butá mita tatua in mopuḻingbí in ḻimbuong mita in simuton bo apug mita inta mononoi inta kinobiagandon in bo bonganga. Kiagat in umat-Ku inta nokoḷagui in mogagowbí kon intau inta nogutun kon tua, bo mogagow kon butá monia.”

SURAT I PAULUS KON JAMAAT RUM 9:29

Ki Yesaya in noguman doman nanaa, “Aka kuma bo ki Allah inta Totok in Mokawasa diá nonaḷámai kon i naton in buí, yo notantú bidon kon kita komintan in nobaḻí bidon naonda bo Sodom bo Gomora.”

ULANGAN 29:23

Gobámu mita in mobaḻídon butá inta moingkag bo kokoḷoban in balerang bo simuton. Butánea in diádon motaau bunakan bo bonok in diádon mobiag kon tua. Butámu in mobaḻídon ná kotá mita in Sodom bo Gomora, Adma bo Zeboin inta iyompat i Tuhan kon dodai in noyaat totok in gina-Nea.

WAHYU 18:11

Mododagang mita kon dunia naa nongombaḷ doman bo noajar in gina popisí in bobay tatua, sin diádon in tobatúmai intau motaḷui kon onu inta pinotaḷui monia.

WAHYU 18:19

Dá mosia in nopoinggú in ḷobud saḷaku tanda nobaḷu. Bo mosia in nongombaḷ poḷat nogamui, “Adodoia kaasí in kobobogat in bodito in kotá moḷoben tanaa! Kaoyúonannea ain nokopobaḻí kon bayongan intau inta kokapaḷ in dagat nobiag doman nooyúon! Táe tongá kon bonu i wakutu tojam sia in kinobuḻiandon in bayongan yagi-yagi!”