YESAYA 10:6 - Alkitab Singog In Mongondow Masa In Tanaa

⁶ Akuoi in nopotabá mangoi kon Asyur sin monubu kon bangusa-Ku inta nonaḷámai kon i-Nakó bo nopomuká kon torú-Ku. Akuoi in nopotabá in Asyur sin mogagow bo monakow bo moritak kon bangusa-Ku naonda bo ḷobud kon daḷan.”

YESAYA 10:6 Mawu Ofanana

SAMUEL 2 22:43

Mosia in irimumudku naonda bo ḷobud inta noitabud, bo sinimpatanku naonda bo yoná kon daḷan.

DATU MITA 2 18:25

Kai monimu kamai kami naa in monubu bo monaḷow kon butámu in diábí in totuḷung i Tuhan? Ki Tuhanbí tontaní in nopotabá kon inami monubu bo morimumud kon tua!”

YESAYA 19:17

Butá in Yohuda in mobaḻí kodoḻiokan kon intau in Mesir pomuḷoi in mosia popotoropan kon inta sinantú i Tuhan Inta Totok in mokawasa soaḷ mosia.

YESAYA 22:5

Totuu, ki Tuhan Inta Totok in moḷantud, bo Inta Totok in mokawasa ain nonantú kon singgai naa nobaḻí singgai kodoḻiokan, kodowawáan bo yogenggeng kon Ḷopá in Oontongon. Dinding mita in kotá ain inumpag. Kuani mokituḷung kodongogandon nodapot kon tombuḷud mita.

YESAYA 24:5

Butá mobaḻí mokotor popisí in intaunea iḻimimpat kon parenta mita i Allah, nomaḷui kon inta ain sinantú-Nea mita bo nonoḻikud kon dodandian inta pinomia-Nea noyotakin monia modapot in mononoi.

YESAYA 29:13

Ki Tuhan in noguman, “Intau mita tatua in tongábí mosumba kon i-Nakó pongin tosingogon, táe gina monia in moyayúbí kon i-Nakó. Agama monia in tongábí atorang in intau inta ihapal.

YESAYA 32:6

Intau bodok mosingog kon tosingogon inta mobodok bo monomayá kon inta moraat. Onukabí in aidan andeka inta singogonnea in nobaḻí bidon singkuḻe kon i Allah. Diábí kon dodai in onda in sia mobogoi in kaanon kon intau inta gogoyon andeka oinumon kon intau inta morogang.

YESAYA 33:1

Moboditodon in musung mita naton! Mosia in mogagow umpaka diá pinogagowan, bo nomaḻidawan umpaka diá Pinomaḻidawan. Táe naonda in mopaḷut mako mogagow bo momaḻidawan, mosia tontaní in mobaḻí bidon kuruban in pogagowan bo Pinomaḻidawan.

YESAYA 33:14

Intau mita binaradosa kon Sion mourot popisí in moondok. Guman monia, “Bontow in tosingogon i Allah in naonda bo tuḷú inta nodokot modapot in mononoi. Degá oyúon in mokotahang kon bonu in tuḷú inta moyopú tatua?”

YESAYA 41:25

Akuoi in nopotabádon kon intau tobatú nongkon dotá pomukaan: Inoiní-Ku in sia sin monubu nongkon dotá in utuan. Mongongawasa mita in ritakannea mangoi naonda bo yoná, naonda bo momomia kon kuyon moritak kon butá ḷamentong.

YESAYA 49:17

Intau mita inta moposindog kon inimu in ḷagidon mamangoi, bo inta ain norimumud kon inimu in mayádon.

YESAYA 49:25

Ki Tuhan in notubag, “Tuata in mobaḻí. Intau mita inta dinakop in pahlawan mita in agowonbí bui. Inta inagow in intau moraat in agowonbí bui. Sin Akuoibí tontaní in monayow kon musungmu; Akuoi in moposaḷamatbí kon i adímu mita.

YESAYA 5:25

Ki Tuhan in sinumorú kon bangusa-Nea. Sia in nosadiadon kon mohukum kon i monia. Buḷud mita in modandú, mayat mita posiyayit naonda bo apat kon daḷan. Táe ki Tuhan in sinumorúpabí bo tantúbí mohukum.

YESAYA 5:29

Tontaranea mita in moganggor naonda bo singa inta bagu nodomok kon kokaanonnea, bo nodia kon tua pinoḷagui, bo diábí in mokopoḷuat kon tua.

YESAYA 5:5

Nanaa in aidan-Ku kon gobá in anggur-Ku tatua: Tondok inta pinoḻibu in rabuton-Ku, dinding inta pinogoḻingoi kon inia in umpagon-Ku, bo pinomayá-Ku mako in mahaḷuk moraat momoguyaat bo moritak-ritak mako kon inia.

YESAYA 63:3

“Tongá Aku-Akuoi mita in sinumuot kon pomomugutan kon anggur kon sigad in umat-Ku diá in notuḷung kon i-Nakó. Bangusa mita irita-ritakan-Ku kon bonu in torú-Ku, naonda bo noritak kon bungai in anggur. Dugú monia in noitoput nomuntad kon ḷambung-Ku, nokokotor kon bayongan in pakeang-Ku.

YESAYA 63:6

Kon bonu in torú-Ku inta dumoko-dokot, irita-ritakan-Ku in bangusa mita; Iyopú-Ku in mosia, bo dugú monia in pinobutak-Ku kon butá.”

YESAYA 7:17

Ki Tuhan in mopoangoibí in datu in Asyur, bo iko takin motoḷuadímu takin rayatmu in mokorasa kon singgai mita inta nopuḻing in roriga inta motoyang totok nongkon onu inta ain nokoimontan kinorasaan monimu pinangkoi kon kinobotakan in dodatuan in Israel bo Yohuda.

YESAYA 8:4

Sin kon dodai in adí tatua diápa motaau moguman ‘Amá’ bo ‘Iná’, bayongan in kaoyúonan in Damsyik bo bayongan in pakakat inta inagow in Samaria in akutondon pobayá kon i datu in Asyur.”

YESAYA 8:8

Mosia in momuntag kon Yohuda naonda bo ḷunud modapot in sigogow bo monaḷom kon bayongan in yagi-yagi.” Ki Allah in kotaki-takin naton! Koḻikip-Nea inta nobuká moḷukad kon butá naton.

YESAYA 9:17

Kororaat in bangusa tatua in nonurub naonda bo tuḷú inta noḷeḷep kon dogami. Dokotnea in naonda bo kayuon noturub inta nopodamonik in poyok mobarong.

YESAYA 9:19

Kon sinangkub in butá tatua mosia mogagow bo mokaan kon onukabí in motaau kaanon, táe diábí in mosia mokorasa kon mobotug. Nodapotbí in mosia mokaan kon topotakin mita monia tontaní!

YEREMIA 25:9

‘Akuoi in mogoiníbí kon bayongan in bangusa nongkon utuan, bo mogogundoi-Ku doman, ki Nebukadnezar datu in Babel. Mosia in potabá-Ku moparang monayow kon Yohuda bo intau inta nogutun kon bonunea takin bayongan in bangusa kon diugneamai. Bangusa in Yohuda takin bangusa mita topodiugneamai in yopúon-Ku bo bióon-Ku mako in morimumud modapot in mononoi. Intau mita inta mokoontong kon inia in moitaḻikokogbí bo mokoningkim. Akuoi, ki Tuhan, ain nosingog.

YEREMIA 3:10

Naonda in nogaid kon tua mita, Yohuda inta diá mosatia tua nobui kon i-Nakó táe tongá ki ubo-uboḷmai, sin ginanea in diábí notuḻid. Akuoi, ki Tuhan, ain nosingog.”

YEREMIA 34:22

Parentaan-Kubí in mosia sinbá mobuidon mangoi kon kotá tanaa, poḷat monubu, mogagow, bo monurub. Kotá mita in Yohuda in baḻíon-Ku naonda bo padang gurun inta diá inutunan in intau. Akuoi, ki Tuhan, ain nosingog.”

YEREMIA 4:14

Yerusalem, ḷumbúdon in inta moraat nongkon ginamu sinbá posaḷamaton in iko. Modapot in toonu in raian mita moraat tatua in tagúonmu kon bonu in ginamu?

YEHEZKIEL 29:20

Butá in Mesir in ogoi-Ku kon inia mobaḻí toguboḻi in bayongan oaidnea, popisí in tontaranea in nogaidon kon oaidan-Ku. Akuoi ki Tuhan Inta Totok in moḷantud ain nosingog.

YEHEZKIEL 38:12

Iko in mogagowbí bo mogamá poḷat modia kon pakakat mita in intau mita inta nogutun kon kotá inta koḻipod nobaḻídon apug tua. Intaunea inta sinipun nongkon noyagi-yagimai in bangusa, tanaa in kokapunyaandon nobayong takin bobiagon bo mosia in nogutun kon putod in dunia.

YEHEZKIEL 38:13

Intau mita in Syeba bo Dedan takin mododagang mita kon kotá mita kon butá in Spanyol in moḻibóbí nanaa kon inimu, ‘Degá tongganutanmu in tontaramu tongá makusud mogagow bo mogamá poḷat modia kon buḷawan, saḷaka, bobiagon bo kapunyaan mita, poḷat mogakut kon tua komintan?’ ”

MIKHA 7:10

Dungkuḷmai musung in moningkuḻe kon i naton takin mosingog, “Kon onda degá in ki Tuhan, Allahmu tatua?” Táe tanaa mosia in mokoontongbí kon onu in aidan i Tuhan kon i naton, bo mobaḻíbí mooyá in mosia. Kita in moindoibí kon musung mita naton tatua in taḷowon bo rita-ritakan mako naonda bo yoná kon daḷan.

HABAKUK 1:12

Tuhan, nongkon koḻipodpabímai Ikobí in ki Allah. Iko in ki Allahku inta motusi bo mononoi. Tuhan, Allahku bo moḷoḷukadku, bangusa in Babel tatua in piniḻí-Mu bo binaḻí-Mu noropot sin mohukum kon inami.

ZAKHARIA 10:5

Intau mita in Yohuda in mountungbí naonda bo pojuang mita inta moruntai kon musung naonda bo yoná kon daḷan. Mosia in totokbí in moḷongasi popisí in Akuoi, ki Tuhan in moduḷu kon i monia, bo tontara in musung inta sinumakoi kon kabaḷo in taḷowonbí monia komintan.

MATIUS 15:7

Ei intau inta mongomunapik! Totuudon onu inta pinoguman muna i Nabi Yesaya soaḷ moiko,