YESAYA 10:17 - Alkitab Singog In Mongondow Masa In Tanaa

¹⁷ Ki Allah inta motusi, sindar in Israel, in mobaḻíbí naonda bo dokot in tuḷú inta kon bonu in tosinggai momokak kon bayongan in yagi-yagi, nodapot in dogami mita.

YESAYA 10:17 Mawu Ofanana

MAZMUR 18:8

Bo nodandú in dunia bo noḷundan, apad mita in buḷud nodandú bo mogugur popisí in torú i Allah.

MAZMUR 21:9

Sia in modakopbí kon bayongan in musungnea, bo nodomok kon bayongan in intau inta nondoí kon i-Nia.

MAZMUR 27:1

Mazmur i Daud. Ki Tuhan in sindarku bo kasaḷamatanku, diábí in koondokku. Ki Tuhan in nobaḻí benteng pogogadopanku, diábí in akuoi mourot.

MAZMUR 50:3

Ki Allah naton in namangoi bo tongá kibio-biómai, Sia in inunaan in tuḷú inta modilá, bo iḻibu in deḷang inta motoyang.

MAZMUR 84:11

Mopia-piabí kon tosinggai in kon Baḷoi-Mu dika in toribu nosinggai kon tampat ibanea. Piniḻíku in mobaḻí moḷoḷukad kon ngara in Baḷoi i Allahku dika in mogutun kon baḷoi in intau moraat.

MAZMUR 97:3

Tuḷú in iḷumekep kon tayowon-Nea, nomokak kon musung kon ḻibu-Neamai.

YESAYA 26:11

Tuhan, Iko in nogoḷatdon mohukum kon musung-Mu mita, táe diábí kinotaauan monia. Pomayádon mako mosia in mooyá in mokoontong kon tabi-Mu kon umat-Mu. Pomayádon mako modait in mosia moyopú pongin hukuman inta ain pinopooḷat-Mu mako kon i monia.

YESAYA 27:4

Diá bidon in porasaan-Ku tumorú. Aka kuma bo oyúon in bonok andeka bo bonganga, yo putúan-Kubí intua, bo momokak kon tua komintan.

YESAYA 27:7

Ki Tuhan in mohukum kon umat-Nea diábí ná kobogat in pohohukum-Nea kon bangusa mita inta nosaturu kon i monia. Sia in diábí moḻimod kon umat-Nea ná pinoḷoḻimod-Nea kon musung-Nea.

YESAYA 30:33

Nongkon koḻipodpabímai ain sinadia in tampat potubáan kon i datu in Asyur. Tampat tatua modaḷom bo mooḷad, binonuan in kayu pondungú inta noyoguntuḷdon. Ki Tuhan in mopoyongkitdon intua pongin mopoirup in poginaan-Nea ná ongkag in balerang.

YESAYA 31:1

Moboditodon in intau inta mayá in Mesir sin mokituḷung! Mosia in mopongatabí in ropot in tontara in Mesir inta tumakoi kon kabaḷo bo kabaḷonea inta mongoropot bo keretanea inta mobayong. Táe mosia in diábí mopirisaya kon i Tuhan, Allah mokudus in Israel bo diá mokituḷung kon i-Nia.

YESAYA 31:9

Datu monia in moḷagui takin ondok, bo itoi in tontaranea mita in totokdon in moitaḻikokog, dá taḷaandon monia in bandera mita in parang.” Ki Tuhan ain nosingog, ki Tuhan inta sinumba bo ihoromat pinongin nobogoi in kuruban payongon kon Yerusalem.

YESAYA 33:12

Moiko in naonda bo batu karang inta sinubá sin pomiaan silon; naonda bo bonganga inta pinupuḷ bo sinubá kon bonu in tuḷú.

YESAYA 33:14

Intau mita binaradosa kon Sion mourot popisí in moondok. Guman monia, “Bontow in tosingogon i Allah in naonda bo tuḷú inta nodokot modapot in mononoi. Degá oyúon in mokotahang kon bonu in tuḷú inta moyopú tatua?”

YESAYA 37:23

Kinotaauanmu degá mongo ki ine in sinibáan bo siningkuḻemu tua? Akuoi, ki Allah in Israel, Allah inta motusi.

YESAYA 37:36

Doḷom doman tua malaekat i Tuhan namangoi kon pinononḷoḷaigan in intau in Asyur bo noḻimod kon 185.000 in tontara. Nobangon monik doḷo-doḷom mayat mita monia noiukat magí mako.

YESAYA 47:14

Indoiai, mosia in naonda bo wawa inta kinaan in tuḷú; diábí in mosia mokoposaḷamat kon awak monia tontaní! Dokot in tuḷú tatua totuubí mopatú kon i monia, deemanbí tuḷú mointok inta mopia ponayangan.

YESAYA 60:19

Iko in diábí paraḷu sindaran mata in singgai kon dodai in singgai, bo diábí paraḷu simbayagan in buḷan kon dodai in doḷom. Sin Akuoi ki Tuhan in nobaḻí mononimbayag mononoi kon inimu, Akuoi in monindar kon inimu pongin kamuliaan-Ku.

YESAYA 66:24

Kon tungkuḷ in mobuat, mosia in mokoontongbí, kon mayat in intau mita inta ain nomarontak kon i-Nakó. Uḷod inta nokaan kon awak monia in diábí matoi, bo tuḷú inta nomokak kon i monia in diábí mopiong; kinoontongan tobatú inta mokokoningkim kon bayongan in intau.”

YESAYA 9:18

Ki Tuhan Inta Totok in mokawasa sinumorú totok, bo hukuman-Nea in naonda bo tuḷú inta moborambang bo bangusa tatua in kayu inta pinondudub inta nodaitnea kinaan. Diábí tobatúmai in intau in motabi kon i utatnea.

YEREMIA 4:4

Kadaiai in dandimu kon i-Nakó, Tuhanmu, bo awakmu in tongádon ogoi kon i-Nakó, ei intau mita in Yohuda bo Yerusalem. Aka diá, yo torú-Ku in tumagabdon bo momokak naonda bo tuḷú inta diábí kopiongan i inekabí. Tua komintan in moiumabí kon inimu popisí in aidmu mita inta moraat.”

YEREMIA 7:20

Akuoi, ki Tuhan Inta Totok in moḷantud, in mopoumabí in torú-Ku inta motoyang kon baḷoi pooibadaan tanaa, kon intau bo kon mahaḷuk, bo kon pangkoi mita in kayu bo kon bungai mita in boyó. Torú-Ku in tumaga-tagab naonda bo tuḷú inta diá kopiongan.”

NAHUM 1:10

Iko in tubáanbí naonda bo wawa inta noingkag naonda bo bonganga inta moyo-moyoguntuḷ.

ZEPANYA 1:18

Kon singgai inta motoyang tatua ki Tuhan in mopoontongbí in torú-Nea, dá bayongan in buḷawan bo saḷaka monia in diábí mokoposaḷamat kon i monia. Sinangkub in dunia in morimumudbí moḷoḷayat tubáan in tuḷú in torú-Nea. Bo daḻi-daḻíbí rabuton-Nea in bayongan nyawa kon butá tanaa.

ZAKHARIA 12:6

Kon singgai tatua motoḷuadí mita in Yohuda in baḻíon-Ku naonda bo tuḷú kon bonu in bonturungan kayu pondungú andeka poḷombow nodokot kon ḻimonag in pangkoi mita in gandum, mosia in moyopúbí kon bangusa mita topodiugneamai. Táe intau in Yerusalem in umuranbí mogutun kon bonu in kotá takin moodom.

PINOGIAPAN 16:35

Bo ki Tuhan nopoangoi in tuḷú inta nomokak kon doyowa nogatut bo ḻima nopuḷú in intau inta noposumba in dupa tatua.

MATIUS 3:12

Digu ain kokada-kadai-Nea mako. Tampat posipunan kon gandum toko daritan-Neadon, gandum sipunon-Nea bo uaban, inta mopia tagúonnea kon tampatnea, táe bayongan pangkoinea in tubáan-Nea kon tuḷu inta diá mopio-piong.”

ULANGAN 4:24

sin ki Tuhan Allahmu naonda bo tuḷú inta mokopokak. Sia in doíbí potongkaion in onukadon.

IBRANI 12:29

Sin ki Allah naton in naonda bo tuḷu inta mokopokak.

WAHYU 21:23

Kotá tatua diá bidon paraḷu simbayagan mata in singgai ande buḷan, sin kamuliaan i Allah aindon nokosimbayag kon tua, bo ki Adí in Domba in nobaḻí togánea.

WAHYU 22:5

Mosia in diá bidon moparaḷu kon togá andeka bayag mata in singgai, sin diá bidon modoḷo-doḷom in kon tua, bo ki Tuhan Allahbí tontaní in monimbayag kon i monia. Bo mosia in momarentabí saḷaku datu modapot in kopaḷutannea.