YESAYA 1:23 - Alkitab Singog In Mongondow Masa In Tanaa

²³ Itoimu mita momomarontak bo nobaḻí ki ata in mononakow; mosia in moibog motarima kon tombuinag bo doit posogó. Mosia in doíbí moduḷu kon uno-unon kon pongadilan; doí mokidongog kon popongaduan in boba-bobay mita.

YESAYA 1:23 Mawu Ofanana

TAWARIKH 2 36:14

Koḻikud intua, Baḷoi Tuhan inta ain sinantú i Tuhan tontaní kon i-Nia, pinonajisdon in itoi mita in Yohuda, in imang mita bo in rayat, sin mosia in dinumudui nosumba kon berhala bo dinumudui kon kobobiag inta binaradosa nongkon bangusa mita inta kon diugmai monia.

IḶUAIAN 23:8

Dika motarima kon doit inta poguboḻi monia sinbá mountung in sia kon pelekara, sin doit tatua in mokopopisí kon mata intau mosindipdon moindoi kon onu in totuu bo mokorugidon kon intau mita inta diá kotaḷá.

AMSAL 17:23

Hakim inta diá moadil, in umuni-uni motarima kon doit posogó bo diábí in sia mopobayá in onu inta moadil.

AMSAL 29:24

Intau inta moyopopog in mononakow, notongkaibí in doí kon awaknea tontaní. Aka sia moguman kon tutuu kon pongadilan, sia in popoḷabúanbí in hukuman. Táe aka sia tongá kibio-biómai, yo sia in kotugatan in kutuk i Allah.

YESAYA 1:17

pobalajardon mogaid kon inta mopia. Posindogdon in inta moadil bo ḷumbúdon in aid mondorot; ogoidon kon uno-unon in hak monia bo duḷuai in pelekara in boba-bobay mita.”

YESAYA 1:18

Ki Tuhan in noguman, “Igai toḻisíon naton in pelekara tanaa. Umpaka moiko mopura bayan popisí in dosamu mita, yo moiko in daritan-Kubí modapot in mobudó naonda bo kapot. Umpaka dosamu mita mobarong bo mobogat, moiko in ampungan-Kubí komintan.

YESAYA 1:22

Yerusalem, dungkuḷmai iko in naonda bo saḷaka, táe tanaa iko in diádon koboḻi. Dungkuḷmai iko naonda bo anggur inta moromimit, táe tanaa in nádon tubig inta noḻiau.

YESAYA 28:14

Indongogaidon onu inta pinoguman i Tuhan, ei mononingkuḻe mita inta nomarenta kon rayat kon Yerusalem!

YESAYA 3:14

Ki Tuhan in mobaḻí hakim kon itoi mita in umat-Nea. Naa in ponapud i Tuhan kon i monia: “Moiko inta nogagow kon bungai in anggur kon gobá mita; baḷoimu nopuḻing in pakakat inta inagow monimu kon intau bogá.

YESAYA 30:1

Ki Tuhan noguman, “Mobodito in intoi mita in Yohuda, sin mosia in momarontak kon i-Nakó. Mosia in dinumudui kon tomayá mita inta deeman tomayá-Ku. Mosia in notekeng kon dodandian inta noyoposi in ibog-Ku. Dá moguntu-guntuḷdon in dosa monia.

YESAYA 33:15

Moiko in mokotahangbí aka moiko in mosingog bo mogaid kon inta totuu. Dika motayak kon untung pongin momakisa mogamá kon intau bogá, bo dika motarima kon doit tondan in pelekara. Dika dumudui kon intau inta monomayá kon poḻimodan andeka aid moraat ibanea.

YESAYA 5:23

Táe tongá bá mokouḻí kon doit posogó, dá moiko in mopoḷuat kon intau kotaḷá, bo moḷamboi kon intau diá kotaḷá mokouḻí kon inta moadil.

YESAYA 65:2

Akuoi in umuranbí mogoḷat mako in motomu kon umat-Ku, táe mosia in moibog momarontak. Bangusa tatua in mogaid kon inta moraat bo dumudui kon tomayánea tontaní.

YEREMIA 22:17

Táe iko, Yoyakim, in toposibí. Iko in tongábí motayak kon kauntungan tontaní. Iko in moḻimod kon intau inta diá kotaḷá, bo mondorot kon rayatmu takin aid moḻingá.

YEREMIA 32:32

popisí in bayongan aid moraat in intau in Yohuda bo Yerusalem takin datu mita, pojabat in pomarenta, imang, bo nabi mita monia.

YEREMIA 4:17

bo moḻipung kon Yerusalem ná intau inta moḷukad kon gobá. Tua komintan in nobaḻí popisí in bangusa in Yohuda ain nomarontak kon i Tuhan. Ki Tuhan ain nosingog.

YEREMIA 5:5

Biódon Akuoi in mayá kon intau mita moḷoben, bo moyosingog monia. Notantúbí kon kinotaauan monia onu inta kinoibog bo inta sinuntut i Tuhan Allah kon i monia.” Táe, mosia komintan doí parentaan i Tuhan, mosia in doí motoindudui kon i-Nia.

YEREMIA 5:6

Tuamai mosia in ḻimodon in singa nongkon kayuon, bo bera-berakon in serigala nongkon padang gurun. Macan tutul in maya-mayábí mako motayak kon kaanonnea kon diug in kotá mita monia, bo pomuḷoi in intau inta ḷumuai in domokonbí. Tua komintan in mobaḻí popisí in mosia umurandon mogaid kon dosa, bo mopobui-buimaidon in monoḻikud kon i Allah.

YEHEZKIEL 12:2

“Ei intau inta ilo-ilow, iko in nogutun kon yua-yuak in intau momomarontak. Mosia tua in komata, táe diá moindoi; kobongoḷan, táe diá mokidongog, popisí in moibog in mosia momarontak.

YEHEZKIEL 22:27

Pojabat mita in pomarentanea naonda bo serigala inta noyingki-yingkit kon kokaanonnea. Mosia in moḻimod tongábí makusud motayak kon kauntungan.

HOSEA 4:18

Naonda in moḷoḷangu popisí in nonginum kon anggur nobayong, mosia in sumundaḷ takin pia in gina. Mosia in moibo-ibogbí singkuḻeon dika in horomaton.

HOSEA 5:10

Ki Tuhan in noguman, “Akuoi in sinumorú popisí in itoi mita in Yohuda ain nonubu kon Israel bo nogagow kon butánea. Tuamai in popouma-Kubí in hukuman kon i monia naonda bo ḷunud.

HOSEA 9:15

Ki Tuhan in noguman, “Bayongan in aid moraat monia pinangkoi kon Gilgal. Kon tuata nomangkoidon noyaat in gina-Ku kon i monia. Popisí in aid monia inta moraat, poguntunon-Kubí in mosia nongkon butá-Ku tanaa. Akuoi in diábí motabi bui kon i monia; bayongan in itoi monia ain noḷawang kon i-Nakó.

AMOS 5:12

Kinotaauan-Ku kon totuudon moḷoben in aidmu moraat bo totuu mobayong in dosamu. Moiko in mondorot kon intau mopia; moiko in motarima kon sogó inta mopomayá mako kon intau bogá inta pinopoaidan in intau diá moadil kon pongadilan.

MIKHA 3:11

Mongongawasa mita in kotá momarenta mokiigum in doit pomompon kon bibig, imang mita in motundú kon hukum i Tuhan sin motayak kon tondan pogaidan, bo nabi mita mopoigum in topotundú nongkon i Allah sinbá mokouḻí kon doit – bo kai monia kamai dá ki Allah in dinumotábí kon i monia. Mosia in moguman, “Ki Tuhan in oyúon kon yua-yuak naton; kita in diábí koantugan in anib.”

MIKHA 3:9

Indongogaidon in singogku mita tanaa, ei moiko pongawasa in Israel inta mondoí kon kooadil bo monuui kon inta mobanar.

MIKHA 6:12

Intau mita inta nooyúon kon kotámu in mondorot kon intau nobogá, bo moiko komintan in mongopopak.

MIKHA 7:3

Komintandon mopandoi in mogaid kon inta moraat. Pojabat bo hakim moigum kon doit pompon in bibig, bo tongguḷu in intau mobayong in momakisadon kon koibognea, natuata in yopopog monia moyotakin.

ZAKHARIA 7:10

Dikabí mondorot kon intau boba-bobay, adí uno-unon, intau mita ango-angoi inta nogutun kon yua-yuak monimu, andeka ki ineka in nobiag noyempeng. Bo dika doman monomayá kon moraat kon tumpaḷa intau.’

MALEAKHI 3:5

Guman i Tuhan Inta Totok in mokawasa, “Akuoi in mamangoibí kon inimu sin mohakim. Akuoi in ḷagidon mobaḻí sakusi kon mososihir mita, kon intau mita inta mototuaḻingan, inta noguman kon uboḷ, inta notombogá kon dodai in nobogoi in gaji kon intau inta sinondanan, inta nondorot kon intau boba-bobay, uno-unon, bo intau ango-angoi, bo kon intau mita inta diá mohoromat kon i-Nakó.”

PINOGIAPAN 22:7

Dá minayádon in itoi mita in intau Moab bo Midian tua takin kodia-dia in tondan poguboḻi kon i Bileam sinbá moibog in sia mongutuk kon intau in Israel. Naonda in noiyaput kon i Bileam, mosia nopotaaudon in koyow i Datu Balak.

MATIUS 21:13

Bo Sia in noguman kon i monia nanaa, “Aindon pinais kon Buk Motusi, ‘Baḷoi-Ku in tangoionbí Baḷoi Pososambayangan.’ Táe inaidanbí monimu pugad in mogogagow!”

MARKUS 11:17

Noiduduimai kon tua ki Yesus nobogoi in totundú kon intau mita kon tua. Sia in noguman, “Kon bonu in Buk Motusi ain pinais: Ki Allah in noguman, ‘Baḷoi-Ku in tangoionbí Baḷoi Pososambayangan in bayongan bangusa.’ Táe tanaa in binaḻí bidon monimu pugad in mogogagow!”

LUKAS 19:46

Sia in noguman kon i monia nanaa, “Oyúon in pinais nanaa: Ki Allah in noguman, ‘Baḷoi-Ku in mobaḻíbí Baḷoi Pososambayangan.’ Táe naa in binaḻí bidon monimu pugad in mogogagow!”

LUKAS 24:27

Onda intua nodait-Nea ininsilangan kon i monia in bayongan onu inta pinais kon Buk Motusi soaḷ Sia. Pinangkoi kon inta pinais i Musa nodapot in buk in nabi mita.

ULANGAN 16:19

Kon bonu in mogamá kon kaputusan, mosia in diábí motaau kinotantu-tantúnea ande mobogat kon toḷosi. Mosia in diábí doman motaau motarima kon doit tondan in pelekara, sin tondan in pelekara tua in mokobilog kon intau, nodapot in intau mobijaksana bo mojujur, dá mogamádon kon kaputusan inta diá moadil.

YAKOBUS 1:27

Podudui ibog i Allah, ibada inta moitutui in motuḷungbí kon adí mita inta uno-unondon bo kon i monia inta dongkadon boba-bobay inta nobiag moyoyiga, poḷat doman moḷukad kon awak tontaní sinbá diá poguyaaton in dunia naa.

SAMUEL 1 8:3

Táe mosia in diá dinumudui kon dodia i amá monia, táe tongábí motayak kon kauntungan monia tontaní. Mosia in moibog uboḻian kon pelekara bo diá moadil in mohakim kon rayat.