YEREMIA 8:13 - Alkitab Singog In Mongondow Masa In Tanaa

¹³ Moibog totok in Akuoi mosipun kon umat-Ku naonda bo intau mosipun kon bungai in boyónea. Táe, umat-Ku in naonda bo pangkoi in anggur bo pangkoi in ara inta diá nomungai, nodapot in daunnea mita in noḷaot domandon. Tuamai Akuoi in nobogoidon kon intau ango-angoi in namangoi bo nongawasa kon butá monia. Akuoi, ki Tuhan, ain nosingog.”

YEREMIA 8:13 Mawu Ofanana

YESAYA 5:10

Bungai in pinomuḷa diá mopia, gobá in anggur inta koḷobennea mopuḷú nohitare tongá kouḻían kon mopuḷú noliter in tubig in anggur. Mogatut noliter in bibitnea tongá kinouḻían kon mopuḷú noliter in gandum.”

YEREMIA 14:12

Umpakabí in mosia mopuasa, doíbí in Akuoi moindoimai kon kuani monia mokituḷung; bo umpakabí in mosia moposumba kon i-Nakó in kuruban payongon bo kuruban gandum, yo diábí mosanang in gina-Ku kon i monia. Noyotoḻikudon kon tua, yopúon-Kubí in mosia in parang, in gogoy, bo in yampoi.”

YEREMIA 14:15

Mosia in nopotaau kon pinodoyon kon tangoi-Ku butá tanaa in diábí koantugan in parang andeka gogoy, bokaka Akuoi in diábí nopotabá kon i monia noguman kon tua. Akuoi, ki Tuhan, in nopotaau kon inimu, Yeremia, onu in aidan-Ku kon nabi mita inta diá pinotabá-Ku tua. Ḻimodon-Ku in mosia pongin parang bo gogoy.

YEREMIA 17:8

Sia in naonda bo pangkoi in kayu kon bingkí in ongkag moiḻig; uakatnea in noidapot in tubig sia in diábí moondok kon sempo in poninggai daunnea mita in tantúbí moḷunow. Umpakabí butá inonag in singgai yo sia in diábí moḻia-ḻiaw in gina sin sia in umuran momungai.

YEREMIA 5:17

Mosia in mokopodaitbí kon bungai in boyó bo kaanonmu poḷat moḻimod kon i adímu mita. Biag sapi bo dombamu in ratáanbi monia, bo gobá mita in anggur takin pangkoi mita in aramu in tokoyompatonbí monia. Kotá mita inta dininding inta pongata monimu in rimumudonbí monia.

YEREMIA 7:20

Akuoi, ki Tuhan Inta Totok in moḷantud, in mopoumabí in torú-Ku inta motoyang kon baḷoi pooibadaan tanaa, kon intau bo kon mahaḷuk, bo kon pangkoi mita in kayu bo kon bungai mita in boyó. Torú-Ku in tumaga-tagab naonda bo tuḷú inta diá kopiongan.”

YEHEZKIEL 22:31

Tuamai in tanaa pinobayá-Kudon in torú-Ku kon i monia, bo naonda bo tuḷú Akuoi in moyompat kon i monia popisí in aid monia. Akuoi ki Tuhan Inta Totok in moḷantud ain nosingog.”

HOSEA 2:12

Daiton-Kubí yompaton in pangkoi mita in anggur bo pangkoi mita in ara inta podudui kon inia nobaḻí tondan in pinobatuangannea kon intau mita inta nosiug takinnea. Baḷuian-Kubí in gobá mita in anggur bo gobá mita in aranea mobaḻí kayuon; mahaḷuk mita ḻindong in nomoguyaatbí kon tua.

YOËL 1:7

Mosia in noyompat kon pangkoi in anggur naton, bo pangkoi in ara naton, dongkadon tuodnea. Pangkoinea mita iningkuḻitandon monia, nodapot in tanganea mita nobudódon.

IMAMAT 26:20

Bayongan inta irorigaanmu diádon in mangaḻenea, sin butámu in diá bidon in mangaḻenea bo pangkoi in ayop monimu diábí momungai.

HABAKUK 3:17

Umpaka pangkoi in ara diá in bungainea bo pangkoi in anggur diá in anggurnea, umpaka bungai in zaitun diá in notuoi bo bungai in gandum kon gobá mokokudai kon gina, umpakabí domba mita minatoidon komintan bo kobang in bobiagon diá in bonunea,

HAGAI 1:11

Pinopoangoi-Kudon in inta mokoingkag kon butá bo kon tombuḷud mita, kon gobá mita in gandum bo kon buḷud mita in anggur bo kon gobá mita in zaitun, bo kon bayongan in pinomuḷa kon butá tanaa, nodapot in kon bayongan in intau bo mahaḷuk takin bayongan yagi-yagi inta iramuji monimu.”

HAGAI 2:17

Akuoi in nopoonagdon in tompot mopatú bo uyan batu sin morimumud kon bayongan in bungai in pinomuḷa kon gobámu, táe moiko in doí doman mobui kon i-Nakó.

MALEAKHI 3:11

Diábí pomayá-Ku mako in pangkoḷá momoguyaat kon bungai in boyómu, pangkoi mita in anggurmu in modatogbí totok in bungainea.

MATIUS 21:19

Kon diugmai in daḷan oyúon pangkoi in ara inontong-Nea, dá Sia minayá notayak kon bungainea, táe diá nokouḻí kon tobatúmai koḻikudbí in daunnea mita kon tua. Dá siningog-Nea in pangkoi ara tatua, “Iko in diá bidon mopomunga-mungai!” Bo kon dodaipa doman tatua, pangkoi in ara tatua noingkag.

YAKOBUS 1:11

Kon dodai mata in singgai momuká bo mopatúdon totok, yo moḷaḷow in bonok tatua sahingga in bungainea moḷabúdon bo diá domandon mopira. Natua doman intau nooyúon, morimumud in sia kon dodai in sia yogot mopobayá in totayaknea.