YEREMIA 5:15 - Alkitab Singog In Mongondow Masa In Tanaa

¹⁵ Ei umat in Israel, ki Tuhan in tayo-tayowdon in mopoangoi in bangusa tobatú nongkon ḻipú moyayú sin monubu kon i monimu. Bangusa tatua in oyúondon nongkon dungkuḷpabímai, singognea in diábí komangaḻean monimu. Mosia in moropot totok,

YEREMIA 5:15 Mawu Ofanana

KINOBAḺIAN 11:7

Maníka kita in momangoi bo mopotombauk in bahasa monia sinbá diádon mosia mosimangaḻean kon singog in tobatú bo tobatú.”

MAZMUR 81:5

Sin tua in tobatú atorang kon Israel, tobatú parenta nongkon i Allah i Yakub.

YESAYA 28:11

Aka moiko doí mokidongog kon inakó, dá ki Tuhan in mopotabádon mangoi in intau ango-angoi sin motundú kon i monimu podoyon kon ḻegú bo tosingogon inta diá komangaḻean.

YESAYA 29:3

Ki Allah in monububí kon kotá tatua bo kopungon nongkon bayongan tampat.

YESAYA 29:6

Ki Tuhan Inta Totok in mokawasa mopoḷuatbí in kotá tatua pongin deḷang bo ḻinug inta motoyang totok. Sia in mopoangoibí in deḷang bo tuḷú inta tumagab.

YESAYA 33:19

Moiko in diá bidon mokoontong kon intau mita ango-angoi inta moromú inta mosingog kon tosingogon inta diá kinomangaḻean monimu.

YESAYA 39:3

Onda intua ki Nabi Yesaya minayá nokipodungkuḷ kon i Datu Hizkia bo noḻibó, “Nongkon onda in intau mita tatua? Onu in pinoguman monia?” Ki Hizkia in notubag, “Mosia in nongkon Babel, butá moyayú.”

YESAYA 5:26

Ki Tuhan in mogoiníbí kon bangusa inta moyayú bo mosia in ḻimikatbí in mamangoi!

YESAYA 5:7

Sin gobá in anggur i Tuhan Inta Totok in Mokawasa in umat in Israel, bo intau mita in Yohuda in pangkoi in anggur inta pinomuḷa-Nea. Kon i monia iharap-Nea mako in aid inta moadil, táe tongábí aid moraat. Kon bonu in kamang-Nea mosia in moposindogbí in inta mobanar, táe tongábí oyúon in karak moigum kon koadilan.

YEREMIA 1:15

Akuoi in mopotabá kon bayongan in bangusa kon dotá in utuan mamangoi mongawasa kon Yerusalem. Dinding mita in kotá tanaa takin ḷoḻingkop in bonawangnea bo bayongan in kotá kon Yohuda in agowonbí monia.

YEREMIA 2:26

Ki Tuhan in noguman, “Naonda bo mononakow inangoian in oyá naonda in kinodomokan, natuata in moiko komintan in mooyábí doman, ei intau in Israel, datu mita bo intaumu mita moḷoben, imang mita bo nabimu mita!

YEREMIA 25:9

‘Akuoi in mogoiníbí kon bayongan in bangusa nongkon utuan, bo mogogundoi-Ku doman, ki Nebukadnezar datu in Babel. Mosia in potabá-Ku moparang monayow kon Yohuda bo intau inta nogutun kon bonunea takin bayongan in bangusa kon diugneamai. Bangusa in Yohuda takin bangusa mita topodiugneamai in yopúon-Ku bo bióon-Ku mako in morimumud modapot in mononoi. Intau mita inta mokoontong kon inia in moitaḻikokogbí bo mokoningkim. Akuoi, ki Tuhan, ain nosingog.

YEREMIA 4:16

Mosia in nopotoingat kon bangusa mita bo nopotaau kon intau in Yerusalem kon musung niondon taya-taya mangoi nongkon butá inta moyayú. Mosia in mopobaḷúbí in baḷú in parang kon kotá mita in Yohuda

YEREMIA 5:11

Umat in Israel bo Yohuda in totu-totuudon ain nomaḻidawan kon i-Nakó. Akuoi, ki Tuhan, ain nosingog.”

YEREMIA 6:22

Ki Tuhan in noguman, “Bangusa tobatú inta moropot in niondon tayo-tayow mangoi nongkon butá inta moyayú kon utuan. Mosia in mamangoi sin moparang.

YEHEZKIEL 18:31

Gogaiaidon in bayongan inta moraat inta inaidan monimu bo pomayádon mako in gina bo raianmu motomobagu. Nongonu sin moiko in mustibí matoi?

DANIEL 1:4

Mosia in mustibí tayowmobiag inta diá in bogit. Musti moḷunat, norosikoḷa moḷantud, mopandoi bo mobarong in kotaauan monia bo patus mopobayá in oaidan kon bonu in komaḻig. Ki Aspenas in mustibí motundú kon i monia mobaca bo momais kon bonu in singog in Babel.

DANIEL 7:7

Kon dodai in akuoi inimindoi mako kon inia, mahaḷuk inggopatnea nomuká. Sia in totok in moropot bo motoyang bo mokokoningkim. Takin ingiponnea mita inta mongoḷoben bo ná kotogat in uatoi, sia in nomutuk bo nokaan kon kokaanonnea, bo noritak kon ki agatnea mita. Noyoposi in mahaḷuk mita inta noiuna sia in kotungoi mopuḷú.

AMOS 6:14

Ki Tuhan Inta Totok in moḷantud bo Inta Totok in mokawasa tua in noguman tontaní, “Umat in Israel, Akuoi in mopotabábí mangoi in tontara nongkon bangusa tobatú ango-angoi sin monubu kon butámu. Mosia in mopororigabí kon i monimu nongkon daḷan mopobayá in Hamat kon utuan modapot kon Ḷopá in Araba kon toḷatan.”

HABAKUK 3:16

Nokodongogmai kon tua, inagían in ondok in akuoi bo bibigku in motondodaḷó. Akuoi in nobaḻí noḻemé diádon in ropot, sioḷku in noipintud, kon ondaka in bayáanku. Oḷatonkubí takin gina moodom in hukuman i Allah kon mononubu.

KORINTUS 1 14:21

Sin kon bonu in Buk Motusi in pinais nanaa, “Ki Tuhan in nosingog, ‘Pinongin intau mita ibanea inta bahasanea tolaeng, Akuoi in mosingog kon umat tanaa. Bo pongin bibig in intau mita inta mokokiangoi, Akuoi in mosingog kon umat-Ku; tongá mosia in doí mokidongog kon singog-Ku.’ ”

ULANGAN 28:33

Bangusa ango-angoi in mogamádon kon bayongan bungai in boyómu inta nouḻí monimu takin iyumoyiga in nogaid, táe moiko tontaní in diábí mokouḻí kon onu bo onu koḻikudbí in umuran tonggataan bo popoaidan monia in aid moraat.

ULANGAN 28:49

Bangusa tobatú inta diá komangaḻean monimu in tosingogon monia popoangoi i Tuhan nongkon toḷosimai sin moḷawang kon i monimu. Ná ḷagapan boniá in mosia monampí kon i monimu.