YEREMIA 33:12 - Alkitab Singog In Mongondow Masa In Tanaa

¹² Ki Tuhan Inta Totok in mokawasa in noguman, “Butá bo kotánea mita inta ná padang gurun tanaa diá inutunan in intau andeka mahaḷuk. Táe umpaka natua, kon singgai moiduduimai oyúonbí in rawang mita in bonok tampat popokaanan in intau kon dombanea mita.

YEREMIA 33:12 Mawu Ofanana

DONDONG MOḶANTUD 1:7

Pogumandon, uḻe batoḷ in dodobku, kon onda in pinopokaananmu in domba mita, kon onda in pinoposiuganmu kon i monia aka ḷoḷabungneadon? Umpaka yo akuoi ná don onda bo intau mododondaḷoi kon sigad in paanan domba yobayatmu mita?

YESAYA 65:10

Umat-Ku in mosumbabí kon i-Nakó; domba bo sapi monia in mokaanbí kon bonok kon rata in Saron bo kon Ḷopá in Akhor.

YEREMIA 17:26

Intau mita in mamangoibí nongkon kotá mita in Yohuda, bo nongkon ḻipú mita kon diugmai in Yerusalem; mosia in mamangoibí nongkon butá in Benyamin, nongkon butá kon sioḷanmai in tombuḷudnea, nongkon buḷud, bo nongkon Yohuda kon dotá in toḷatan. Mosia in modiabí mangoi kon biag mita pokuruban kon Baḷoi-Ku, pinomayá inta tubáan andeka diá, bo sosumba doman gandum bo kamania takin sosumba sukur.

YEREMIA 31:12

Mosia in mamangoi in Tombuḷud in Sion takin pogot motamburiang, poḷat modondong takin pia in gina popisí in bayongan inta inogoi-Ku kon i monia, gandum, ḷana, anggur, sapi bo domba. Mosia in mobaḻídon naonda bo taman inta mobayong in tubignea, bo diábí kodaitan in onu bo onu.

YEREMIA 31:24

Intau in mogutun kon Yohuda bo kon ḻipúnea mita. Kon tua in oyúon bidon in monononggobá bo mononombobiagon kon sapi bo dombanea.

YEREMIA 32:15

Ki Tuhan Inta Totok in mokawasa, ki Allah in Israel, in noguman kon baḷoi, butá, bo gobá in anggur in kon singgai moiduduimai in potaḷuibí bui kon butá tanaa.”

YEREMIA 36:29

Ki Tuhan in nopotabá kon inakó moguman nanaa kon i datu, “Iko in notubádon kon ḻitodan in buk tatua, bo iko in noḻibó kon i Yeremia nongonu sin sia in nomaisbí kon ki datu in Babel in mamangoi bo morimumud kon butá tanaa poḷat moḻimod kon intau inta nogutun kon naa takin bobiagonnea mita.

YEREMIA 50:6

Umat-Ku in nádon domba inta pinomayá mako in gombalanea mita noiḷaḻe kon buḷud. Mosia in nodondaḷoi nongkon buḷud tobatú mopobayá in buḷud ibanea bo diádon kinotaauannea monia in baḷoi monia.

YEREMIA 51:62

Mopaḷut mako kon tua posambayang nanaa, ‘Tuhan, Iko in nogumandon kon kotá tanaa in rimumudon-Mu dá pinomayá intau andeka mahaḷuk in moyopúdon komintan, bo tampat tanaa in mobaḻídon naonda bo padang gurun modapot in mononoi.’

YEHEZKIEL 36:35

Dá bayongan in intau mongoherang, popisí in butá tatua inta dungkuḷmai noḷogatdon tanaa in nobaḷuidon nobaḻí taman in Eden, bo kotá mita inta dungkuḷmai noingongow, norimumud bo nobaḻídon apug mita, tanaa in nobaḻídon kotá mita inta notorindog in poḷoḷukadannea bo nosisídon in intaunea.

HAGAI 1:4

“Ei umat-Ku, degá orasneadon kon inimu in mogutun kon baḷoi inta moropot bo motorindog, bokaka Baḷoi-Ku in apugpa doman mako?