YEREMIA 32:20 - Alkitab Singog In Mongondow Masa In Tanaa

²⁰ Dungkuḷmai Iko in nogaid kon inta mokoherang bo soaḷ mita inta diá in poḻiu kon Mesir, bo dapot in tanaa doman Iko in umuranpabí doman mogaid kon natua, pinomayá kon sigad in intau in Israel andeka kon sigad in bayongan in bangusa ibanea. Tuamai tanaa Iko in ponango-nangoian kon bayongan tampat.

YEREMIA 32:20 Mawu Ofanana

SAMUEL 2 7:23

Kon dunia naa in diábí in bangusa ná Israel. Tongábí Israel tuata in bangusa inta ain pinoḷuat-Mu nongkon pinononggataan sin mobaḻí umat-Mu tontaní. Bayongan in aid moḷoben bo inta mokoherang inta pinomia-Mu kon i monia, mopobaḻí kon tangoi-Mu ponango-nangoian kon dunia. Bangusa mita ibanea takin dewa mita monia aindon inuntun-Mu kon tungkuḷ in umat-Mu minayá noparang.

TAWARIKH 1 17:21

Kon sinangkub in dunia naa diábí in bangusa in ná Israel. Israel in bangusa tobatú inta pinoḷuat-Mu nongkon pinononggataan sin baḻíondon umat-Mu tontaní. Bayongan oaidan moḷoben bo inta mokoherang inta Inaidan-Mu kon i monia nokobaḻídon kon tangoi-Mu ponango-nangoian kon sinangkub in dunia. Pinoḷuat-Mu in umat-Mu nongkon Mesir, bo nopoguntun in bangusa mita ibanea kon tungkuḷ in umat-Mu minayá noparang.

NEHEMIA 9:10

Pinopoaid-Mu kon datu in Mesir in aid mita inta diá in poḻiuan, bo kon pogawai takin rayat kon butánea, sin kinotaauan-Mu naonda in pinororiga monia kon umat-Mu. Bo ponango-nangoiandon in tangoi-Mu noidapot in singgai naa.

NEHEMIA 9:11

Sinbá oyúon in bayáan in umat-Mu, dagat binotak-Mu; Pinopoḷoḷan-Mu in mosia nongin gantog in dagat inta modaḷom, naonda bo batu inta noitaḷom kon dagat inta mokoondok.

MAZMUR 135:9

Kon tua nobayong in inaidan-Nea in mokoherang bo tomponuot sin mohukum kon datu bo bayongan in pogawainea,

IḶUAIAN 10:2

bo bá motaau oumanonmu kon i adí bo kon i ompumu kon naonda in bangusa Mesir pinoyambá-Ku takin nogaid kon inta mokoherang mita tatua. Dá kotaauandon monimu komintan kon Akuoibí in ki Tuhan.”

IḶUAIAN 3:20

Táe Akuoi mopomakébí in kawasa-Ku, bo mohukum kon Mesir takin mopoangoi in bayongan inta mokoondok kon tua. Mopaḷut mako in tua, ogoineadon in moiko mobuat nongkon tua.

IḶUAIAN 7:3

Táe baḻíon-Ku in datu motogat in gina. Iko in diábí pandungonneamai, umpakabí Akuoi mopoangoi in bodito mobarong kon butá in Mesir.

IḶUAIAN 9:16

Táe pinomayá-Kupa mako moiko in nobiag, sinbá Akuoi in motaaupa mopoontong in kawasa-Ku kon inimu, sinbá tangoi-Ku totokdon kotaauan in bayongan intau kon dunia naa.

YESAYA 63:12

Kon onda in ki Tuhan inta koyot-yotakin i Musa takin ḻima-Nea inta moropot motorindog, bo nomotak kon tubig kon tayowon monia sinbá tangoi-Nea in kotaauandon modapot in mononoi?

YESAYA 63:14

Ki Tuhan in nodia kon i monia minayá in tampat pogogaian, naonda bo bobiagon dinia binayá pinokaan kon rawang. Natuata in Sia nodia kon umat-Nea, sinbá tangoi-Nea in poḷantudon.

YEREMIA 13:11

Naonda bo bintoḷ nopoḷok noitogot nopia kon ogotan in intau inta nomaké, natuata in makusud-Ku sinbá umat in Israel bo Yohuda moyotogot modagin kon i-Nakó. Pongin natua mosia in mobaḻí umat-Ku inta nomaḻí kon tangoi-Ku in dinayow bo horomaton. Táe, mosia in doíbí dinumudui kon i-Nakó.”

DANIEL 6:28

Sia in moposaḷamat bo mopoḷuat, mogaid kon mujizat bo inta mokoherang pinomayá kon ḷangit andeka kon butá. Ki Daniel in pinosaḷamat-Neadon, nongkon konuku in singa mita.”

DANIEL 9:15

Oo Tuhan, Allah nami, Iko in nopoontongdon in kawasa-Mu pinongin nodia kon umat-Mu iḻumuai nongkon Mesir, bo kawasa-Mu tatua in umuranpabí toro-toroponmai. Kami in binaradosadon bo nogaid kon noitaḷá.

OUMAN IN RASUL MITA 7:36

Ki Musabí tuata inta nodia kon bangusa in Israel iḻumuai nongkon Mesir takin nogaid kon soaḷ mita inta totok in mokoherang bo soaḷ mita inta diá in poḻiuan kon Mesir, bo kon Dagat Nopuya bo kon padang gurun kon bonu in opat nopuḷú notaong.

ULANGAN 11:3

bo inta mokoherang mita inta pinomia-Nea. Moiko ain nokoontong tontaní onu inta ain pinomia-Nea kon i datu in Mesir bo kon bayongan in butánea.

ULANGAN 4:34

Dodai in onda in oyúon in ilah tobatú inta nobarani nogamá kon bangusa tobatú nongkon bangusa mita inta oyúon bodongka binaḻí umatnea tontaní, ná inta inaidan i Tuhan Allahmu kon inimu kon Mesir? Inontongdon monimu tontaní naonda in ki Allah takin ropot inta moḷoben nopoangoi in bodito bo parang, nomia kon inta mokoherang mita bo nomia kon soaḷ mita inta motoyang totok.

ULANGAN 6:22

Kami tontaní in nokoontong kon ki Tuhan nomia kon inta mokoherang mita bo inta mokoondok mita kon intau in Mesir bo datu monia takin bayongan intau moḷoben monia.

ULANGAN 7:19

Toropdon in bodito mita inta motoyang inta inontong monimu tontaní, soaḷ mita inta mokoherang, bo ropot inta moḷoben inta pinaké i Tuhan Allahmu sin mopoḷuat kon i monimu. Ná doman in popoaid i Tuhan Allahmu kon bayongan bangusa inta kinoondok monimu.