YEREMIA 30:10 - Alkitab Singog In Mongondow Masa In Tanaa

¹⁰ Umat-Ku Israel, dikadon moondok! Mogogundoi-Ku Yakub, dika mourot! Moiko bo buímu in posaḷamaton-Kubí nongkon butá moyayú, tampat pinodakopan kon i monimu. Moiko in mobuibí bo mogutun kon butámu takin moaman. Moiko in mobiagbí motomoman; diá bidon in koondok monimu.

YEREMIA 30:10 Mawu Ofanana

KINOBAḺIAN 15:1

Nopaḷut mako kon tua, ki Abram nokoontong kon oontongon bo nokodongog kon i Tuhan noguman kon inia, “Dika moondok, Abram, ḷukadan-Kubí in iko nongkon bodito, bo moḷoben totok tondan in pinogaidanmu in ogoi-Ku kon inimu.”

YESAYA 14:3

Ki Tuhan in mopoḷuatbí kon intau in Israel nongkon takit bo roriganea, bo nongkon oaidan mobogat inta pinakisa pinoki aid kon inia.

YESAYA 35:9

Kon tampat tatua in diábí in singa, andeka mahaḷuk moraat ibanea. Intau mita inta pinosaḷamat i Tuhan in mayá mongintua.

YESAYA 43:5

Dika moondok, sin Akuoi in moḷukad kon inimu. Nongkon toyopan bo nongkon dotá in pomukaan pinotabá-Ku in ki adí bo ki ompumu mamangoi moyosipun.

YESAYA 44:1

Ki Tuhan in noguman, “Indongogaidon, ei Yakub mogogundoi-Ku, ei Israel, umat inta piniḻí-Ku!

YESAYA 44:2

Akuoibí in ki Tuhan inta nomaḻí kon inimu, inta nomia kon inimu nongkon bonupa in sian, bo inta notuḷung kon inimu. Dika moondok, iko in mogogundoi-Ku, umat inta piniḻí-Ku inta kinotabi-ku.

YESAYA 46:11

Akuoi in mogoiní kon mongongawasa tobatú nongkon dotá in pomukaan sia in mamangoi naonda bo ḷagapan turá sin mopobayá in onu inta ain siningog-Ku Onu in inta ain siningog-Ku notantúbí kon aidan-Kubí, onu in sinomayá-Ku notantú bidon kon pomiaan-Ku.

YESAYA 46:13

Akuoi in mopodiug bidon kon singgai popoḷuatan, kasaḷamatan inta ogoi-Ku in diá bidon mobaḷui. Akuoi in moposaḷamatbí kon Yerusalem, bo mobogoi in kahoromatan kon Israel.”

YESAYA 49:12

Nongkon moyayú umat-Ku in moroangoi, nongkon dotá in utuan, toyopan bo Sinim kon toḷatan.”

YESAYA 49:25

Ki Tuhan in notubag, “Tuata in mobaḻí. Intau mita inta dinakop in pahlawan mita in agowonbí bui. Inta inagow in intau moraat in agowonbí bui. Sin Akuoibí tontaní in monayow kon musungmu; Akuoi in moposaḷamatbí kon i adímu mita.

YESAYA 54:4

Dika moondok, iko in diábí pokopooyáanmai: diábí singkuḻeon bo oyáon. Iko in mokoḻiong bidon kon aidmu inta diá motoindudui kon tungkuḷ noguodpa; diá bidon mokotorop bui kon kaadaanmu saḷaku boba-bobay.

YEREMIA 23:3

Táe ki agat in umat-Ku in sipunon-Kubí nongkon butá mita inta pinoḷumbúan kon i monia. Mosia in diaan-Kubí buí kon butá monia bo bui monia in modugangdon mobarong.

YEREMIA 23:4

Akuoi in moduíbí kon itoi sin momiag kon i monia. Umat-Ku in diá bidon moondok andeka mourot, diábí tobatúmai in nongkon i monia in mobuḻi. Akuoi, ki Tuhan, ain nosingog.”

YEREMIA 23:6

Aka momarenta in sia, intau in Yohuda in mosaḷamatbí, bo intau in Israel in mobiagbí moaman. Datu tatua in tangoionbí ‘Tuhan kasaḷamatan naton’.

YEREMIA 23:8

táe podoyon kon i-Nakó, Allah inta nobiag, inta nodia kon umat in Israel iḻumuai nongkon butá tobatú kon dotá in utuan, bo nongkon bayongan in butá ibanea kon tampat inta ain pinoporaritan-Ku. Mosia in mogutundon kon butánea tontaní.”

YEREMIA 29:11

Kinotaauan-Ku bidon in tomayá-Ku mita kon i monimu! Tomayá mita tatua in deemanbí mopobodito kon i monimu, táe kobiaganmubí inta motompia bo mobogoi kon inimu in kobiagan moiduduimai inta nopuḻing in kamang.

YEREMIA 29:14

Totuu, moiko in mokodungkuḷbí kon i-Nakó. Moiko in sipunon-Kubí nongkon yuak in bayongan bangusa bo nongkon bayongan in butá inta pinoporaritan bo pinoḷumbúan. Moiko in diaan-Kubí bui kon butámu tanaa bo monompia bui kon kobiaganmu. Akuoi, ki Tuhan, ain nosingog.’

YEREMIA 3:18

Israel in dumugangdon kon Yohuda, bo moyotakindon mamangoi nongkon butá pinoḷumbúan kon dotá in utuan. Mosia in mobuidon kon butá inta ain inogoi-Ku nobaḻí butá kapunyaan kon mogoguyangmu.”

YEREMIA 30:3

Sin moiangoibí in wakutunea Akuoi mopoguḻit bui in kaadaan in umat-Ku Israel bo Yohuda. Diaan-Kubí bui in mosia mayá in butá inta ain inogoi-Ku kon mogoguyang monia. Butá tatua in buibí mouḻí monia. Akuoi, ki Tuhan, ain nosingog.”

YEREMIA 30:7

Singgai motoyang ain noiangoi, singgai inta diá in poḷawangan. Kon i umat-Ku, tua in singgai inta mokoondok; táe mosia in posaḷamaton-Kubí.”

YEREMIA 33:16

Intau in Yohuda bo intau inta nogutun kon Yerusalem in posaḷamatonbí bo mobiag moaman. Kotá in Yerusalem in tangoian ‘Tuhan Mopoposaḷamat Naton’.

YEHEZKIEL 38:11

Iko in monantúdon kon monubu kon butá inta diá dininding tatua, inta intaunea mita nogutun takin pia-pia mako bo notompia kon kotá mita inta diá dininding bo diá doman in pakakat mita in parang.

DANIEL 12:1

Malaekat inta nogiḷambung in pakeang linen tatua in noguman bui, “Kon dodai intua moitukatbí in malaekat moḷoben ki Mikhael moḷoḷukad kon bangusamu. Onda intua moiangoi in sempo in roriga inta diá in poḻiuan pinangkoi kon oyúondon in bangusa mita. Táe bayongan in intau nongkon bangusamu inta tangoinea pinais kon buk i Allah, in posaḷamatonbí.

HOSEA 2:18

Kon dodai intua Akuoi in momia kon dodandian takin bayongan in mahaḷuk sinbá mosia in dika monuyayow kon umat-Ku. Akuoi mopogogaibí in bayongan parang bo moposí in pakakat mita in parang nongkon butá in umat-Ku tatua, bo momaḻí kon i monia mobiag motompia bo moaman.

HOSEA 2:20

Podudui in dandi-Ku, iko in tonibuḷoion-Kubí. Akuonmubí in Akuoi mobaḻí Tuhanmu tontaní.

HOSEA 6:11

Soaḷ moiko, ei intau in Yohuda, Sinantú-Ku domandon in wakutunea mohukum kon i monimu popisí in oaidmu.”

YOËL 2:21

Dika moondok, ei gobá, posanangdon in ginamu; toropdon in inta moḷoben inta pinomia i Tuhan kon inimu!

MIKHA 4:9

Nongonu sin iko in mongombaḷbí totok in moropot? Nongonu sin iko in mororigabí naonda bo bobay inta mononggadí? Eta degá popisí in iko diádon in datu, bo mononongginamu aindon minatoi?

ZAKHARIA 3:10

Aka singgai tatua moiangoi, pomuḷoi in intau in mogoiníbí kon topodiugneamai sin mamangoi motarima kon dame bo kobiagan motompia kon yua-yuak in gobá mita in anggur bo pangkoi mita in aramu.”

YOHANES 12:15

“Donaai moondok, mongodeaga mita in Sion! Indoiaika Datumu in namangoi, Sia in sinumakoi kon tobatú keledai inta noguodpa!”