YEREMIA 3:17 - Alkitab Singog In Mongondow Masa In Tanaa

¹⁷ Kon dodai intua kotá in Yerusalem in tangoiondon ḷoḻitúan ‘Pomomarentaan i Tuhan’, bo bayongan in bangusa in mosipun kon kotá tatua sin mosumba kon i-Nakó. Mosia in diá bidon dumudui kon ibog in gina monia inta pamandot bo moraat tua.

YEREMIA 3:17 Mawu Ofanana

KINOBAḺIAN 8:21

Bó mobondu in kuruban sosumba tatua nokosanang kon gina i Tuhan, bo Sia in nosingog kon bonu in gina, “Akuoi in diá bidon bui mongutuk kon dunia naa popisí in oaid intau; kinotaauan-Ku, kon nongkon sia noguodpamai, raian intau tua in moraatbí. Diá bidon mokoimontanmai in Akuoi moyopú kon bayongan mahaḷuk inta nobiag ná inta bagu-Ku inaidan tanaa.

DATU MITA IMITÁNEA 8:41

Aka intau ango-angoi tobatú kon butá inta moyayú mokodongogdon kon kokokawasa-Mu bo inta mokoherang mita inta ain pinomia-Mu kon umat-Mu, bo sia in momangoi in baḷoi pososumbaan tanaa sin mohoromat kon ini-Mu bo mosambayang kon ini-Mu,

MAZMUR 102:23

kon dodai in bangusa mita bo dodatuan mita noyosipun sin mosumba kon i Tuhan.

MAZMUR 78:8

sinbá mosia diá naonda bo mogoguyang monia inta moibog momarontak bo monaḷámai; bui inta noḻiai in pirisayanea, bo diá motoḷutui kon i Allah.

MAZMUR 87:3

Indongogaidon, ei kotá i Allah, soaḷ mita inta momulia siningog-Nea soaḷ iko:

YESAYA 26:8

Kami in dumudui kon onu inta sinantú-Mu, o Tuhan, bo tantú mogoḷat mako kon ini-Mu; Ikobí in dayowon bo inta tano-tano bo in gina nami.

YESAYA 56:6

Ki Tuhan in noguman kon intau mita ango-angoi inta ain noituot kon bonu in umat i Tuhan, inta motabi kon i Tuhan bo inta noibada kon i-Nia, inta nohoromat kon singgai in Sabat bo nosatia kon dodandian-Nea,

YESAYA 59:19

Kawasa bo koagung-Nea in koondokbí in bayongan in intau nongkon pomukaan nodapot in toyopan. Sia in mamangoibí naonda bo ongkag inta motoḷog inta pinondoradak mako in tompot inta moropot.

YESAYA 6:1

Kon taong kinopatoian i Datu Uzia, akuoi nokoontong kon i Tuhan. Sia in iḻimitú kon tudu in tampat pomomarentaan-Nea inta moḷantud bo momulia. Jubah-Nea noikoḷob kon bayongan Baḷoi Tuhan.

YESAYA 66:1

Ki Tuhan in noguman, “Ḷangit in ḷoḻitúan-Ku pomarentaan, bo butá in tosindogan-Ku. Dá baḷoibí naonda in posindogonmu kon i-Nakó, bo tampat onu in pomiaanmu sin pogutunan-Ku?

YESAYA 66:18

Akuoi in nonotaaubí kon raian bo aid monia. Akuoi namangoi sin mosipun kon intau mita nongkon bayongan bangusa. Kon tungkuḷ in mosia moyosipun, mosia in mokoontongbí kon kawasa-Ku.

YESAYA 66:20

Nongkon butá mita tatua mosia in modia bui kon i utatmu mita tongobangusa monag mobaḻí tombuinag kon i-Nakó. Mosia in modiabí kon intau mita tatua mayá in tombuḷud inta motusi kon Yerusalem takin tumakoi kon kabaḷo, keledai bo unta, bo takin kereta bo roda, ná biasamai intau in Israel modia mopobayá kon Baḷoi Tuhan sosumba gandum kon bonu in tampat inta modarit.

YEREMIA 11:8

bo nopotabá kon i monia dumudui kon dodandian-Ku tatua, táe mosia in doíbí mokidongog bo doí motoḷutui. Nodapotbí in mosia umuranbí pamandot bo moraat ná koḻipod. Tuamai bayongan in hukuman inta pinais kon bonu in dodandian tatua aindon pinopoḷabú-Ku kon i monia.”

YEREMIA 12:15

Táe naonda in mopoḷuai mako kon i monia, Akuoi in buibí monotabi kon i monia; batúan in bangusa in diaan-Kubí bui mayá in butánea tontaní.

YEREMIA 12:16

Aka mosia takin ḻimbatú in gina moibog motarima kon agama in umat-Ku bo moibog mongibot takin moguman, ‘Podoyon kon i Tuhan inta nobiag,’ – ná koḻipod in mosia notundú kon umat-Ku nongibot pinodoyon kon Baal – dá mosia in moidugangdon kon umat-Ku bo mobaḻí mooyúon.

YEREMIA 14:21

Toropdon in dandi-Mu, dika kaasí poompáan-Mumai in kami; dodandian-Mu takin inami dikabí inggamáan-Mu. Yerusalem in tampat pomomarentaan-Mu inta momulia, dika kaasí poompáan-Mumai.

YEREMIA 16:12

Táe moiko in nogaid kon moiḻiu in raat bui. Moiko in pamandot bo tongá dumudui kon ibogmu tontaní inta moraat. Moiko in doí tumoḷutui kon i-Nakó.

YEREMIA 16:19

Tuhan, Ikobí in inta noḷukad kon inakó bo nobogoi in ropot kon inakó; Iko in notuḷung kon inakó kon dodai in nororiga. Bangusa mita nongkon popod in butá in mamangoibí kon ini-Mu bo moguman, “Mogoguyang nami in tongábí oyúon in ilah uboḷ inta totokbí in diá in mangaḻenea.

YEREMIA 17:12

Baḷoi i Tuhan naton naonda bo pomomarentaan inta momulia, kon buḷud inta moḷantud nongkon dungkuḷmai.

YEREMIA 18:12

Táe mosia in motubagbí, ‘Onu in baragunanea? Kami in umuranbí dumudui kon ibog nami tontaní! Kami kon batúannea in mogaidbí kon ibog in gina nami inta moraat!’ ”

YEREMIA 3:19

Ki Tuhan in noguman, “Israel, Akuoi in moibog motarima kon inimu mobaḻí ki adí-Ku, bo mobogoi kon inimu in butá inta mokosanang, butá inta totuu mopia kon sinangkub in dunia. Ibogon-Ku iko in monangoi kon i-Nakó ki Amá, bo diádon moḷagui bui kon i-Nakó.

YEREMIA 31:23

Ki Tuhan Inta Totok in mokawasa, Allah in Israel in noguman, “Aka umat-Ku binaḻí-Kudon ponango-nangoian ná dungkuḷmai, dá kon butá in Yohuda bo kon ḻipúnea mita yo kodongogandon bui intau in moguman, ‘Igumon mako ki Tuhan in momarakat kon tombuḷud motusi kon Yerusalem tampat pogutunan inta ain sinantú kon i-Nia.’

YEREMIA 33:9

Yerusalem in mobaḻí koḷungangaan bo koyunggagaan-Ku. Bayongan in bangusa kon dunia in mobaḻíbí moondok bo mourot poḷat mohoromat kon i-Nakó, aka mokodongogdon kon bayongan inta mopia inta inaidan-Ku kon intau inta nogutun kon Yerusalem, bo kobiagan motompia inta ogoi-Ku kon kotá tatua.”

YEREMIA 4:2

Aka moiko in mongibot podoyon kon tangoi-Ku bo moiko in mobiag mojujur moadil bo mobanar, dá bayongan in bangusa in mopoigumbí kon i-Nakó sinbá barakatan-Ku in mosia, bo mosia in modayow kon i-Nakó.”

YEREMIA 7:24

Táe mosia in doíbí mokidongog bo doí monondudut. Mosia in tongábí dinumudui kon ibog in gina monia tontaní inta motogat bo moraat tua. Mosia in deemanbí nobaḻí mopia táe nodugangbí moraat.

YEREMIA 9:14

Mosia in pamandot bo mosumba kon berhala mita in Baal ná inta sinundú in mogoguyang monia.

YEHEZKIEL 1:26

Kon tudu in kubah tatua oyúon in ná batangan in ḷoḻitúan pomomarentaan nongkon batu in nilam, bo kon tudunea iḻimitú inta koontongan ná intau.

YEHEZKIEL 43:7

“Ei intau ilo-ilow, naa in ḷoḻitúan pomomarentaan-Ku. Kon naa in pogutunan-Ku kon yua-yuak in umat in Israel bo momarenta kon i monia modapot in mononoi. Pinomayá mosia, andeka datu mita monia, diá bidon in mongotor kon tangoi-Ku inta motusi pongin mosumba kon berhala andeka pongin moḷobong kon minatoi datu mita monia kon tampat tanaa.

YEHEZKIEL 48:35

Bayongan in dinding tatua kobanatnea in siow nopuḷú noribu nometer. Bo pinangkoi kon tanaa intau monangoi kon kotá tatua: “Ki Tuhan IN OYÚON IN KON TUA!”

ZAKHARIA 2:11

Kon dodai intua mobayong in bangusa in mamangoi kon i Tuhan sin nobaḻí umat-Nea. Sia in mogutunbí kon yua-yuakmu, bo kotaauandon monimu kon ki Tuhan in nopotabádon kon inakó namangoi kon inimu.

ZAKHARIA 8:8

bo modia bui kon i monia nongkon pomukaan bo nongkon toyopan, dá mosia in mogutun kon Yerusalem bui. Mosia in mobaḻí umat-Ku bo Akuoi in ki Allah monia. Akuoi in momarenta kon i monia takin satia bo moadil.”

PINOGIAPAN 15:39

Ḷambe-ḷambé mita in nobaḻí tompoingat: Pomuḷoi in moiko mokoontong kon tua, kotoropan monimu in bayongan parenta-Ku bo dumudui. Bo popisí intua diábí in moiko mokoḻiong kon i-Nakó sin dumudui kon ibogmu tontaní.

SURAT I PAULUS KON JAMAAT RUM 1:21

Intau in nonotaau bidon kon i Allah, táe diábí i horomat monia in Sia saḷaku Allah bo mosia in doí doman mosukur kon i-Nia. Sin soaḷbí mita inta diá in mangaḻenea in raion monia; nosindipdon in gina monia.

SURAT I PAULUS KON JAMAAT RUM 6:14

Dosa in diá bidon mongawasa kon i monimu, sin moiko in diádon nobiag kon bonu in kawasa in hukum agama in Yahudi, táe kon bonu bidon kawasa in totabi Allah.

GALATIA 4:26

Táe Yerusalem inta kon soroga tuata in Yerusalem inta nobebas, bo siabí tua in ki iná naton.

ULANGAN 29:29

Tongonu nopasaḷ in binuni i Tuhan Allah naton; táe hukum-Nea in pinoniata-Nea kon i naton, bo kita takin buí naton in musti umuran dumudui modapot in adí bo ompu.”

HAKIM MITA 2:19

Tongá aka itoi tatua bo matoidon, dá dodia in bangusa tatua in modugangdon moraat moiḻiudon kon intau mita inta muna nobiag kon i monia. Mosia in mogundoi kon ilah mita ibanea bo mosumba kon ilah mita tatua. Mosia in nobuidon kon oaid mita monia inta moraat bo doí monimbaḷui kon dodia monia.