YEREMIA 27:14 - Alkitab Singog In Mongondow Masa In Tanaa

¹⁴ Dika indongogan in nabi mita inta mongampag kon i Tuang Datu mokiompu kon i datu in Babel, sin mosia tua in monompobaḻikbí kon i Tuang Datu.

YEREMIA 27:14 Mawu Ofanana

YEREMIA 14:14

Táe ki Tuhan in notubag, “Nabi mita tatua in nopotaau in habar uboḷ pinodoyon kon tangoi-Ku; Akuoi in diábí nopotabá kon i monia, bo diábí doman nomarenta andeka noyosingog monia. Oontongon mita inta inouman monia in deemanbí nongkon i-Nakó; mosia in nonoḻindap kon soaḷ mita inta diá in mangaḻenea inta sinontuon inaidan monia tontaní.

YEREMIA 23:21

Ki Tuhan in noguman, “Totokbí in mogaid in nabi mita tatua, bokaka mosia in diábí pinotabá-Ku. Podoyon kon tangoi-Ku in mosia mopotaau in habar, bokaka diábí in koyow in inogoi-Ku kon i monia.

YEREMIA 23:25

Bayongan inta siningog in nabi mita tatua in kinotaauan-Ku bidon. Pinodoyon kon tangoi-Ku mosia in nonguboḷ kon koyow-Ku in sinarimadon monia pinongin togoindop.

YEREMIA 28:15

Tua komintan in pinotaauku kon i Hananya, bo akuoi in noguman doman bui, “Indongogai, ei Hananya! Ki Tuhan in diábí nopotabá kon inimu; iko in nomaḻídon kon bangusa tanaa nopirisaya kon tosingogon uboḷ.

YEREMIA 37:19

Kon onda in nabi mita i Tuang datu tua inta noguman kon datu in Babel tua in diábí monubu kon i Tuang bo butá tanaa?

YEREMIA 38:22

Kon bonu in oontongon tatua akuoi in nokoontong kon bayongan in bobay inta kon komaḻigpa in Yohuda pinoḷuai dinia kon pojabat mita in Babel. Kobaya-bayá mosingog in mosia, ‘Ki datu in pinomiadon ibo-ibog in yobayatnea mita inta modagin, bo kinawasa monia. Tanaa, naonda in sioḷnea noiḷosok kon bonu in yoná, inumundok komintan in mosia.’ ”

OMBAḶ 2:14

Inta pinotaau in nabi mita kon inimu, tongábí tompobaḻik bo uboḷ komintan. Mosia in diábí kon dodai in onda in nobuká kon dosamu, manangka intua iko in diábí notobat. Noyotoḻikud kon tua yo mosia in tongábí mopotaau kon inimu in tosingogon mita uboḷ inta mokosanang.

MIKHA 2:11

Koibog monimu in nabi inta moibog monguboḷ bo mongakaḷ poḷat monoḷanow kon moiko in mokouḻíbí kon anggur bo oinumon inta mokoḷoḷangu inta mobayong totok.”

ZAKHARIA 10:2

Intau mita mopoigum in topotundú kon berhala mita bo mononoḻindap mita, táe tubag mita inta nouḻí monia in uboḷ bo tongábí kon bibig. Oyúon in noginsilang kon togoindop, táe insilang monia in tongábí mokopoḷaḻe kon i monimu, bo ḷoḻipoi inta inogoinea diá in mangaḻenea. Tuamai in rayat noirangkapdon magí-mako naonda bo domba. Moajar monia sin diá in itoi.

MATIUS 7:15

“Mokopoingatdon kon nabi mita inta diá totuu. Nabi inta mamangoi kon inimu naonda bo intau inta mongopia, táe sabanarnea mosia tua intau bí moromú.

PILIPI 3:2

Mokopoingatdon kon i monia inta umuran mogaid kon inta diá mopia, mosia inta motaaudon tangoion ‘ungkú’. Mosia inta umuran momakisa kon bá sunatondon mita in bayongan intau.

YOHANES 1 4:1

Utat mita inta kotabiku! Donaaibí mogampang kinopiri-pirisayanea kon intau mita inta mongaku kinawasa in Roho i Allah, táe ujipa muna in mosia tua sinbá kotaauandon monimu mongo roho kon i monia tua nongkon i Allah andeka deeman. Sin nobayongdon intau in maya-mayá mako bo mongaku nabi bokaka deemanbí totuu nabi.