YEREMIA 24:10 - Alkitab Singog In Mongondow Masa In Tanaa

¹⁰ Akuoi in mopoangoibí kon i monia in parang, gogoy, bo yampoi in takit dá mosia komintan in matoi bo diá in kotaḷáan kon butá tanaa inta ain inogoi-Ku kon i monia bo kon mogoguyang monia.”

YEREMIA 24:10 Mawu Ofanana

DATU MITA IMITÁNEA 14:15

ki Tuhan in mohukumbí kon Israel dá modandúdon ná tampiring kon bonu in tubig. Ki Tuhan in morabutbí kon rayat in Israel bo nongkon butá inta mopia tanaa inta inogoi-Nea kon mogoguyang monia. Sia in moporaritbí kon i monia kon ḷoḷan in Ongkag in Eprat, sin mosia in nopomukádon in torú-Nea sin nomia kon patong mita i dewi Asyera.

YESAYA 51:19

Iko in kinoantugan in doyowa norupa in bodito; popisí in parang, ḻipúmu in nogoguyaatdon komintan bo rayatmu in minatoi in gogoy. Diá in notabi bo noḻipoi kon inimu.

YEREMIA 14:12

Umpakabí in mosia mopuasa, doíbí in Akuoi moindoimai kon kuani monia mokituḷung; bo umpakabí in mosia moposumba kon i-Nakó in kuruban payongon bo kuruban gandum, yo diábí mosanang in gina-Ku kon i monia. Noyotoḻikudon kon tua, yopúon-Kubí in mosia in parang, in gogoy, bo in yampoi.”

YEREMIA 15:2

Aka ḻibóon monia kon inimu mongo kon onda in bayáan monia, yo tubagai nanaa, ‘Ki Tuhan in noguman, inta sinantú matoi popisí in takit yo biódon mako in sia matoi in takit. Inta sinantú matoi kon poparangan yo biódon mako in sia matoi kon parang. Inta sinantú matoi popisí in gogoy yo biódon mako in sia matoi in gogoy. Inta sinantú dakopon, yo biódon mako in sia diaan saḷaku intau dinakop!’

YEREMIA 16:4

Mosia in matoi kotugatan in yampoi in takit inta mokopatoi, bo mosia in matoi kon poparangan andeka matoi in gogoy. Diábí tobatúmai in intau in mongombaḷ andeka moḷobong kon i monia. Mayat monia in moirarit magí mako naonda bo pupuk kon butá, bo kaanon in ḷagapan bo mahaḷuk inta mokokaan kon tapú.

YEREMIA 19:7

Kon tampat tanaa pogogaion-Ku in bayongan tomayá in intau in Yohuda bo intau in Yerusalem. Mosia in pomayá-Kubí in taḷowon in musung mita monia bo ḻimodon kon poparangan. Mayat monia in pomayá-Kudon mako in kaanon in ḷagapan bo mahaḷuk mokokaan kon mahaḷuk ibanea.

YEREMIA 21:9

Bayongan in intau inta mogutun kon bonu in kotá in matoibí popisí in parang, gogoy, andeka yampoi in takit. Táe mosia inta ḷumuai sin tumungkud kon intau in Babel inta koyogot in nonubu kon kotá tanaa, in kotaḻibanbí bo diá ḻimodon.

YEREMIA 27:8

Bangusa andeka dodatuan inta doí mokiompu kon i Nebukadnezar in hukumon-Ku pongin parang, gogoy, bo yampoi in takit, modapot in kon imbuitnea bangusa tatua in mokiompubí doman.

YEREMIA 29:17

Ki Tuhan Inta Totok in mokawasa in noguman, ‘Akuoi in mopoangoibí in parang, gogoy, bo yampoi in takit kon i monia. Mosia in aidan-Kubí naonda bo bungai mita in ara inta noiḻiudon in bongkog nodapot in diádon motaau kaanon.

YEREMIA 29:18

Mosia in aḷo-aḷowan-Kubí mako in parang, gogoy, bo yampoi in takit modapot in bayongan in bangusa kon sinangkub in dunia in mokoningkimbí in mokoontong kon kaadaan monia. Kon ondakabí in poporaritan-Ku kon i monia, intau in mokoningkimbí bo moondok in mokoontong kon onu inta nobaḻí kon i monia. Mosia in singkuḻeonbí, bo tangoi monia in pakéon mobaḻí kutukan.

YEREMIA 32:24

Intau mita in Babel ain noposindog in dinding mita pongopungan kon ḻibu mita in kotá sin mogagow, bo tanaa mosia in nonubu. Parang, gogoy, bo yampoi in takit in mokopopisí kon kotá tanaa moḷabú kon ḻima monia. Iko in nokoontong kon bayongan inta pinoguman-Mu in noniatadon.

YEREMIA 32:25

Táe umpaka natua, o Tuhan Inta Totok in momulia, Ikobí in nopotabá kon inakó notaḷui kon butá tanaa kon tayowon in sakusi mita, umpaka topiḻikpa bo kotá tanaa in agowondon in intau in Babel.”

YEREMIA 42:17

Bayongan in intau inta momakisa mayá in Mesir bo mogutun kon tua in matoibí kon bonu in parang, andeka matoi in gogoy andeka yampoi in takit. Diábí tobatúmai in moiḷagui nongkon bodito inta poangoi-Ku kon i monia; komintanbí matoi.

YEREMIA 42:22

Tuamai, toropdon: kon butá inta koibog monimu bayáan sin mogutun kon tua, yo matoibí in moiko kon parang, andeka matoi in gogoy andeka matoi in yampoi in takit.”

YEREMIA 5:12

Umat i Tuhan in noguman kon inta diá totuu soaḷ ki Tuhan. Mosia in noguman, “Ah, Sia in diábí momia kon onu bo onu. Kita in diábí kotugatan in bodito bo diábí doman koumaan in parang andeka gogoyon.

YEREMIA 9:15

Tuamai, indongogaidon onu in aidan-Ku, Tuhan Inta Totok in mokawasa, Allah in Israel: umat-Ku in ogoian-Ku pinomuḷa mopait sin kaanon bo rasum sin inumon.

YEREMIA 9:16

Mosia in porariton-Ku kon sigad in bangusa mita inta diá kinotaauan monia andeka in mogoguyang monia. Akuoi in umuranbí mopotabá in tontara inta monubu kon i monia modapot in Akuoi momutú kon i monia komintan.”

YEHEZKIEL 33:27

Podoyon kon i-Nakó, ki Allah inta nobiag, ki Tuhan Inta Totok in moḷantud, intau mita inta nogutun kon apug in kotá tatua in matoibí ḻimodon. Mosia inta nogutun kon rawang mita in kaanonbí in mahaḷuk mita inta moraat. Mosia inta nogadop kon buḷud mita bo kon angob mita in matoibí kotugatan in yampoi in takit.

YEHEZKIEL 6:11

Ki Tuhan Inta Totok in moḷantud in noguman, “Konakitdon in gina! Pogamuidon! Pongombaḷdon totok popisí in bayongan in aid moraat bo mokorongó inta ain inaidan in bangusa in Israel. Mosia in matoibí popisí in parang, malarat in gogoy bo yampoi in takit.

YEHEZKIEL 7:15

Kon daḷan mita in kotá oyúon in parang, kon baḷo-baḷoiannea oyúon in yampoi in takit bo malarat in gogoy. Ki inekabí in kon ḷuai in kotá yo matoibí kon bonu in parang, bo inta mogutun mako kon bonu in kotá in matoibí in takit bo gogoy.

ULANGAN 28:21

Bayongan in takit moiuma kon i monimu, modapot in buitnea diádon tobatúmai in intau nongkon i monimu in mogutunpa kon butá inta iḻitúan monimu tatua.

WAHYU 6:8

Bo inontongku in tobatú kabaḷo inta nobilai. Ki inta sinumakoi tua tangoinea in ki Maut. Bo dumuduianmai kon inia in dodatuan popatoi. Tokoar in kawasa kon dunia naa in pinosarakan kon i monia, sinbá mosia in motaau moḻimod popototoi kon parang, malarat bo popototoi kon takit mita bo popototoi kon mahaḷuk mita inta mokokaan kon intau.