YEREMIA 23:25 - Alkitab Singog In Mongondow Masa In Tanaa

²⁵ Bayongan inta siningog in nabi mita tatua in kinotaauan-Ku bidon. Pinodoyon kon tangoi-Ku mosia in nonguboḷ kon koyow-Ku in sinarimadon monia pinongin togoindop.

YEREMIA 23:25 Mawu Ofanana

KINOBAḺIAN 37:5

Kon doḷom tobatú ki Yusup sinumogoindop, bo naonda inoumannea kon i guya-guyangnea in togoindopnea tatua, nodugangdon noyaat in gina monia kon inia.

KINOBAḺIAN 37:9

Noiduduimai kon tua ki Yusup bui doman sinumogoindop, bo sia noguman kon i guya-guyangnea mita, “Akuoi in sinumogoindop bui, inontongku mata in singgai, buḷan bo tundi mopuḷú bomitá sinumungkud nosumba kon inakó.”

MAZMUR 139:2

Kinotaauan-Mu in bayongan in aidku; nongkon noyayú kinomangaḻean-Mu in raianku.

MAZMUR 139:4

Nodapot in diápa akuoi nosingog, kinotaauan-Mu onu in singogonku.

YEREMIA 13:27

Akuoi in nokoontongdon kon i monimu in nogaid kon inta kinodoí-Ku. Inontong-Kudon in ilah mita ibanea kon tombuḷudnea bo kon gobá, naonda bo ḷoḷaki tobatú mongibog totok kon i buḷoi bobay in intau ibanea andeka naonda bo kabaḷo koḷakian inta mongibog kon kabaḷo kobaayan. Ei intau in Yerusalem, moboditodon in moiko! Toonu degá in moiko in moiḷuat kon bayongan in inta moraat?”

YEREMIA 14:14

Táe ki Tuhan in notubag, “Nabi mita tatua in nopotaau in habar uboḷ pinodoyon kon tangoi-Ku; Akuoi in diábí nopotabá kon i monia, bo diábí doman nomarenta andeka noyosingog monia. Oontongon mita inta inouman monia in deemanbí nongkon i-Nakó; mosia in nonoḻindap kon soaḷ mita inta diá in mangaḻenea inta sinontuon inaidan monia tontaní.

YEREMIA 16:17

Akuoi in nokoontong kon bayongan inta inaidan monia. Diábí in noibuni kon i-Nakó; dosa doman mita monia ain inontong-Ku.

YEREMIA 23:28

Nabi inta sinumogoindop mustibí moguman, ‘Naa in tongábí togoindop.’ Táe nabi inta nokouḻí kon koyow nongkon i-Nakó mustibí mopotaau in koyow tatua podudui in koyow inta mobanar tua. Gandum in diábí motaau potongkaion in wawa.

YEREMIA 23:32

Akuoi, ki Tuhan, in moḷawangbí kon nabi mita tatua inta nopotaau in togoindopnea mita inta nopuḻing in uboḷ. Mosia in nopoḷangkam in umat-Ku pinodoyon kon uboḷ bo ambungangaḷ monia. Akuoi in diábí nopotabá kon nabi mita tatua. Mosia in beresibí diá baraguna kon umat-Ku. Akuoi, Tuhan, ain nosingog.”

YEREMIA 27:10

Mosia in monompobaḻik kon i monimu dá moiko in dinia noyayú nongkon butámu. Akuoi in mopoguntunbí kon i monimu nongkon butámu bo moputú in moiko.

YEREMIA 27:15

Mosia in gumuman kon mosia in mosingog podoyon kon tangoi i Tuhan, táe mosia in monguboḷ. Ki Tuhan tontaní in noguman kon Sia in diábí nopotabá kon i monia. Tuamai in potabudon bo yopúon-Neabí in ki Tuang Datu takin nabi mita inta ain nonguboḷ kon i Tuang Datu.”

YEREMIA 29:23

Natuata in ukur monia popisí in nogaidon kon dosa mita moḷoben kon Israel: Mosia in nonuaḻing, bo nopomaké in tangoi i Tuhan sin mongonguman kon inta diá mita totuu. Tua in noyotoḻikud in ibog i Tuhan. Kinotaauan-Neabí in onu inta inaidan monia, bo sia tontaní in nobaḻí sakusi moḷawang kon i monia. Ki Tuhan ain nosingog.”

YEREMIA 29:8

Akuoi ki Tuhan, Inta Totok in mokawasa, Allah in Israel, mopotoingat kon i monimu sinbá diá mopomayá mako in awakmu koakaḷan in nabi mita inta nogutun kon yuakmu andeka i inekadon inta noguman kon mosia in mokotoḷanow kon singgai moiduduimai. Dika moindoimai kon togoindop mita monia.

YEREMIA 8:6

Inindongogan-Kudon kinopia, táe moiko in diábí nosingog noitutui. Diábí tobatúmai in kon sigad monimu in nomanasaḷ sin nogaidon kon inta moraat. Diábí in moguman, ‘Onu in taḷáku?’ Moiko komintan in dinumudui kon daḷanmu tontaní naonda bo kabaḷo nonubu kon pinoparangan.

OMBAḶ 2:14

Inta pinotaau in nabi mita kon inimu, tongábí tompobaḻik bo uboḷ komintan. Mosia in diábí kon dodai in onda in nobuká kon dosamu, manangka intua iko in diábí notobat. Noyotoḻikud kon tua yo mosia in tongábí mopotaau kon inimu in tosingogon mita uboḷ inta mokosanang.

YEHEZKIEL 22:28

Nabi mita mobuni kon dosa mita tatua; mosia in naonda bo intau inta nocet kon dinding nokotor. Oontongon monia tua in diábí totuu oontongon, natua doman in toḻindap mita monia. Mosia in noguman kon koyow mita inta pinotaau monia in nouḻí monia nongkon i Tuhan Inta Totok in moḷantud, bokaka Akuoi in diábí nosingog kon i monia.

YOËL 2:28

“Kon singgai moiduduimai bayongan in intau in ogoian-Kudon in roho-Ku. Dá ki adímu ḷoḷaki bo bobay in mopotaaudon in koyow-Ku mita; intau mita inta noguyangdon mita kon yuakmu in tumogoindopdon oontongon in ogoidon kon tayowmobiag bo mongodeaga.

ZAKHARIA 13:3

Bo aka oyúonpa doman in intau inta noguman kon sia in mopotaau in koyow, yo ki amá bo ki ináneadon tontaní in moguman kon inia kon sia in musti hukumon dapot in matoi, sin uboḷbí in siningognea tua, sia in tumbukonbí i amá bo inánea tontaní modapot in matoi.

PINOGIAPAN 12:6

bo ki Tuhan noguman, “Indongogai in tosingogon-Ku naa! Aka kon sigad monimu bo oyúon in tobatú nabi, yo Akuoi in mokipogontong kon inia kon bonu in oontongon mita, bo mongonguman takinnea kon bonu in togoindop.

MATIUS 1:20

Tongá kon wakutu in sia koyogot nopomiki-mikirmai kon makusudnea tatua, malaekat i Tuhan namangoi kon inia kon bonu in togoindop bo noguman: “Yusup, buí i Daud, donaaibí moondok iko motonibuḷoi takin i Maria, sin adí inta kon bonupa in siannea tua in nobaḻí sin kawasabí in Roho i Allah.

LUKAS 12:3

Manangka intua onu inta siningog monimu doḷom yo kodongoganbí kon wakutu in mobayagdon; bo onu inta pinogombong monimu sinbá diá dongogon in bayongan intau, tua in pobaḷúbí kon bayongan intau.”

KORINTUS 1 4:5

Popisí in deemanpabí wakutunea dá dika ḻimika-ḻikat in mohakim kon intau, kotaḷá andeka diá. Oḷatdon dapot moiangoi in ki Tuhan. Bambí Sia in mobuká kon onu inta nongoibuni kon sindip bo mobuká kon onu inta kon bonu in gina mita in intau. Bain kon wakutu in tuata bo duíon i Allah in intau mita podudui in oaid mita monia.

IBRANI 4:13

Diábí tobatúmai in mahaḷuk in diá ontongon i Allah. Bayongan yagi-yagi komintanbí ontongon-Nea mako motarang kon tayowon-Nea. Bo mustibí tanggung jawab bo naton kon tayowon-Nea.

WAHYU 2:23

Dumoduduinea mita in ḻimodon-Kubí doman sinbá kotaauandon in bayongan jamaat kon Akuoibí naa in Sia inta nonotaau kon raian bo gina intau. Bo moiko in tuḻían-Kubí podudui in aid monimu tontaní.