YEREMIA 23:19 - Alkitab Singog In Mongondow Masa In Tanaa

¹⁹ Torú i Tuhan in nádon deḷang inta nondangat bo nonubu kon intau mita inta moraat.

YEREMIA 23:19 Mawu Ofanana

MAZMUR 58:9

Biódon mako in mosia naonda bo kií inta ḷumoḷayat mobaḻí muntong, naonda bo adí mointok inta minatoi kon tungkuḷ in diápa nokoontong kon nobayag.

AMSAL 1:27

Singkuḻeonku in moiko aka moḻia-ḻiaw in gina monimu bo mororiga popisí in kinoantugan in bodito inta namangoi naonda bo deḷang.

AMSAL 10:25

Aka deḷang mondangat, moyopúdon in intau moraat; táe intau inta motuḻid in gina in umuranbí moroton.

YESAYA 21:1

Naa in koyow kon Babel: Ná uḷu in tompot motoninsing moitaḻib kon padang gurun, natuata in koangoi in bodito nongkon butá inta motoyang.

YESAYA 40:24

Mosia tua in naonda bo pinomuḷa noguod inta bagu momuká in uakatnea. Aka ki Tuhan mopoirup in tompot, moingkag in mosia bo poḷayugon naonda bo wawa.

YEREMIA 25:31

Modapot kon popod in butá singog-Nea in kodongogan; ki Tuhan in momia kon pelekara kon bangusa mita. Bayongan in intau in sisiganbí bo inta moraat in hukumonbí matoi.’ ”

YEREMIA 25:32

Ki Tuhan Inta Totok in mokawasa in noguman, “Nongkon popod mita in dunia deḷang in mogonugur; bodito in moidantug kon batúan in bangusa mita.”

YEREMIA 30:23

Torú i Tuhan nádon deḷang, nádon tompot moropot inta nondangat kon intau mita moraat, bo diádon mooyong kon dodai in diápa mobaḻí in bayongan tomayá-Nea. Kon singgai moiduduimai umat-Nea in monotaaudon kon tua.

YEREMIA 4:11

Wakutunea in moiangoibí intau in Yohuda bo intau in Yerusalem mokouḻí kon habar kon tompot mopatú nongkon padang gurun koyogotdon in mogirup mamagí kon i monia. Tompot tatua in deemanbí tompot biasamai inta tongá mopoḷayug in baḻeká,

YEREMIA 51:1

Ki Tuhan in noguman, “Popoangoi-Kubí in tompot pomoguyaat inta mogirup mopobayá in Babel bo kon intaunea mita.

YEHEZKIEL 1:4

Akuoi in iḷumangag bo nokoontong kon deḷang nogirup nongkon utuan. Gotup moyotampí nongkon kapunan in goḷom inta moḷoben totok, bo ḷangit kon diugneamai in nobayag totok. Kon bonu in kilat inta moninda-nindar tatua kinoontongan in inta mopouḻi-uḻinag naonda bo porunggu.

YEHEZKIEL 13:13

Ki Tuhan Inta Totok in moḷantud noguman, “Kon bonu in torú-Ku, Akuoi in mopoangoi in deḷang, uyan morogot bo uyan eis sin morimumud kon dinding tatua.

AMOS 1:14

Tuamai, potabá-Kubí in tuḷú kon dinding mita in kotá in Raba, bo momokak komintan kon bentengnea mita. Kon tungkuḷ intua kodongogandon in dowawá in parang, bo parang tumagabdon naonda bo deḷang.

ZAKHARIA 7:14

Naonda bo deḷang, Akuoi in nongaitdon kon i monia dá pakisadon in mosia nogutun kon butá mita in intau. Butá inta mopia tanaa ain nobaḻí noingongow diádon in mogogutun bo noḷogatdon.”

ZAKHARIA 9:14

Ki Tuhan in mokipogontongbí kon umat-Nea, naonda bo kilat in piot-Nea mita pinoḷutam-Nea. Ki Tuhan Inta Totok in moḷantud in mogirupbí kon torompet tomponuot monubu bo mayá kon bonu in deḷang nongkon toḷatan.