YEREMIA 23:16 - Alkitab Singog In Mongondow Masa In Tanaa

¹⁶ Kon intau inta nogutun kon Yerusalem, ki Tuhan Inta Totok in mokawasa noguman, “Dika indongogan in tosingogon in nabi mita inta umuran tongá mobogoi in kamang inta diá in mangaḻenea. Mosia in tongábí mopotaau in onu in inta kon raian monia tontaní bo deemanbí koyow-Ku.

YEREMIA 23:16 Mawu Ofanana

DATU MITA IMITÁNEA 22:11

Nabi tobatú inta kon sigad in nabi mita tatua, inta ki Zedekia ki adí i Kenaana, nomia kon tungoi mita nongkon uatoi bo noguman kon i Ahab, “Naabí inta pinoguman i Tuhan, ‘Takin tungoi mita ná tanaa ki tuang datu in momongkug kon Siria bo morimumud kon i monia.’ ”

DATU MITA 2 17:15

Israel bo Yohuda in doíbí dumudui kon parenta mita i Tuhan bo diá mosatia kon dodandian inta ain pinomia-Nea takin mogoguyang monia. Diábí in pandungonmai monia in toboḷow mita táe tongábí mosumba kon berhala mita inta diá in mangaḻenea. Dá mosiadon tontaní in nobaḻí diá in mangaḻenea. Dinumudui in mosia kon oaid in bangusa mita kon diugmai monia, umpaka ain inimaḷowan i Tuhan.

TAWARIKH 2 18:5

Dá ki Ahab in nosipun kon degá 400 in nabi bodongka noḻibó kon i monia, “Motaau degá in akuoi mayá monubu kon Ramot andeka diá?” “Motaau!” tubag monia. “Posarakanbí i Allah in kotá tatua kon i Tuang datu.”

AMSAL 19:27

Adíku, aka iko doídon mobalajar bui, yo koḻionganmudon onu inta ain binalajarmu.

YEREMIA 14:14

Táe ki Tuhan in notubag, “Nabi mita tatua in nopotaau in habar uboḷ pinodoyon kon tangoi-Ku; Akuoi in diábí nopotabá kon i monia, bo diábí doman nomarenta andeka noyosingog monia. Oontongon mita inta inouman monia in deemanbí nongkon i-Nakó; mosia in nonoḻindap kon soaḷ mita inta diá in mangaḻenea inta sinontuon inaidan monia tontaní.

YEREMIA 2:5

Ki Tuhan in noguman, “Taḷá onu in nouḻí in mogoguyangmu kon i-Nakó, nodapot in mosia nomaḻidawan kon i-Nakó? Mosia in nomatuk kon berhala inta diá in mangaḻenea bo imbuitnea mosiadon tontaní in nohina.

YEREMIA 23:21

Ki Tuhan in noguman, “Totokbí in mogaid in nabi mita tatua, bokaka mosia in diábí pinotabá-Ku. Podoyon kon tangoi-Ku in mosia mopotaau in habar, bokaka diábí in koyow in inogoi-Ku kon i monia.

YEREMIA 23:26

Modapot in toonupa in nabi mita tatua moibog mopoḷaḻe kon umat-Ku takin habar inta inai-aidan monia tontaní?

YEREMIA 29:23

Natuata in ukur monia popisí in nogaidon kon dosa mita moḷoben kon Israel: Mosia in nonuaḻing, bo nopomaké in tangoi i Tuhan sin mongonguman kon inta diá mita totuu. Tua in noyotoḻikud in ibog i Tuhan. Kinotaauan-Neabí in onu inta inaidan monia, bo sia tontaní in nobaḻí sakusi moḷawang kon i monia. Ki Tuhan ain nosingog.”

YEREMIA 29:8

Akuoi ki Tuhan, Inta Totok in mokawasa, Allah in Israel, mopotoingat kon i monimu sinbá diá mopomayá mako in awakmu koakaḷan in nabi mita inta nogutun kon yuakmu andeka i inekadon inta noguman kon mosia in mokotoḷanow kon singgai moiduduimai. Dika moindoimai kon togoindop mita monia.

YEREMIA 9:12

Akuoi in noḻibó, “Tuhan, nongonu sin butá tanaa in pinomayábí mako in noḷogat bo noingkag naonda bo padang gurun nodapot in diádon in tumaḻib? Oyúon degá in mopandoi totok sinbá momangaḻe kon naa komintan? Ki ine in pinoginsilangan-Mu sinbá sia in mokopoyaput kon intau ibanea?”

YEREMIA 9:20

Akuoi in noguman, “Indongogaipa in tosingogon mita i Tuhan, ei bayongan in bobay! Tundú kon i adímu mita bobay in dondong oamui, kon yobayatmu mita in dondong ponogumatoian.

OMBAḶ 2:9

Bonawangnea mita in kinobumbunandon in butá, bayongan in bonoboinea mita noputoḷ; datu bo pojabat in pomarenta dinia kon pinoḷumbúan. Hukum i Tuhan in diádon bui sinundú; nabi in diádon notarima kon tongkoyow nongkon i Tuhan.

YEHEZKIEL 13:16

ei nabi mita inta deeman totuu nabi! Moiko in nonoḻindap kon Yerusalem in noaman bo notoinutdon, bokaka totokbí in diá!” Natuata in guman i Tuhan Inta Totok in moḷantud.

YEHEZKIEL 13:23

Tanaa in mopaḷutdon in oontongon mita diá totuu bo toḻindapmu mita uboḷ. Posaḷamaton-Ku in umat-Ku nongkon tongganut moraatmu. Dá kotaauandon monimu kon Akuoibí in ki Tuhan.”

YEHEZKIEL 13:3

Ki Tuhan Inta Totok in moḷantud in noguman, “Moboditodon in nabi mita inta bodok tatua! Toḻindapnea in tongábí nouḻínea kon onu in irainea tontaní bo oontongonnea in diábí totuu.

YEHEZKIEL 13:6

Oontongon mita monia in diábí totuu bo toḷanow mita monia in tongábí uboḷ. Mosia in tumangoi kon nodia kon koyow nongkon i-Nakó, bokaka Akuoi in diábí nokoimontanmai in nopotabá kon i monia. Yo naondabí in pongongamang monia kon mobaḻí in toḷanow monia?

YEHEZKIEL 22:28

Nabi mita mobuni kon dosa mita tatua; mosia in naonda bo intau inta nocet kon dinding nokotor. Oontongon monia tua in diábí totuu oontongon, natua doman in toḻindap mita monia. Mosia in noguman kon koyow mita inta pinotaau monia in nouḻí monia nongkon i Tuhan Inta Totok in moḷantud, bokaka Akuoi in diábí nosingog kon i monia.

MIKHA 2:11

Koibog monimu in nabi inta moibog monguboḷ bo mongakaḷ poḷat monoḷanow kon moiko in mokouḻíbí kon anggur bo oinumon inta mokoḷoḷangu inta mobayong totok.”

MATIUS 7:15

“Mokopoingatdon kon nabi mita inta diá totuu. Nabi inta mamangoi kon inimu naonda bo intau inta mongopia, táe sabanarnea mosia tua intau bí moromú.

SURAT I PAULUS KON JAMAAT RUM 1:21

Intau in nonotaau bidon kon i Allah, táe diábí i horomat monia in Sia saḷaku Allah bo mosia in doí doman mosukur kon i-Nia. Sin soaḷbí mita inta diá in mangaḻenea in raion monia; nosindipdon in gina monia.

YOHANES 1 4:1

Utat mita inta kotabiku! Donaaibí mogampang kinopiri-pirisayanea kon intau mita inta mongaku kinawasa in Roho i Allah, táe ujipa muna in mosia tua sinbá kotaauandon monimu mongo roho kon i monia tua nongkon i Allah andeka deeman. Sin nobayongdon intau in maya-mayá mako bo mongaku nabi bokaka deemanbí totuu nabi.