YEREMIA 22:18 - Alkitab Singog In Mongondow Masa In Tanaa

¹⁸ Tuamai in soaḷ ki Yoyakin datu in Yohuda, ki adí ḷoḷaki i Yosia, ki Tuhan in noguman nanaa, “Kopatoiannea in diábí ombaḷan; diábí in moguman, ‘Adodoia kaasí, yobayatku, adodoia.’ Diábí in monogumatoi andeka momaḷú, ‘Kaasí in ki tuang datu!’

YEREMIA 22:18 Mawu Ofanana

SAMUEL 2 1:26

Yonatan, uḻe utatku, monakit totok in ginaku, sin moḷoben totok in mangaḻemu kon inakó. Tabimu kon inakó in totuu motuḻid, nodapot in noiḻiubí kon tabi in bobay.

DATU MITA IMITÁNEA 13:30

Nabi mogoguyang tontaní tatua in noḷobong kon minatoi tatua kon poḷoḷobongan kon motoḷuadínea, bo sia takin i adínea mita nongombaḷ kon minatoi tatua. Mosia in noguman, “Kaasí in iko awú utatku, kaasí ah!”

DATU MITA 2 23:36

Ki Yoyakin in umur 25 notaong kon dodai in sia nobaḻí datu in Yohuda, bo nomarenta in sia kon Yerusalem mopuḷú bomitá notaong in koonggotnea. Ki inánea in ki Zebuda, ki adí i Pedaya nongkon kotá in Ruma.

DATU MITA 2 23:6

Patong mita i Dewi Asyera pinoḷuainea nongkon bonu Baḷoi Tuhan, bo dinia kon ḷuai in kotá kon Ḷopá in Kidron. Kon tua patong tatua sinubá, bo buingnea in dinodok kino rumomok, bo ḷobudnea in pinorarit kon tudu in poḷoḷobongan kon intau mita.

TAWARIKH 1 3:15

Ki Yosia in kogadí kon adí ḷoḷaki taya opat: ki Yohana, ki Yoyakim, ki Zedekia bo ki Yoahas.

TAWARIKH 2 35:25

Ki Nabi Yeremia in nomia kon dondong amui tobatú kon i Datu Yosia. Nodapot in tanaa dondong tatua in pinaké kon Israel in intau mita mododondong, pinomayá ḷoḷaki andeka bobay, kon pinonogumatoian kon i Yosia. Dondong tatua in pinotuotdon kon bonu in pinosipunan kon dondong mita in amui.

TAWARIKH 2 36:5

Ki Yoyakin umur 25 notaong kon dodai in sia nobaḻí datu kon in Yohuda, bo sia in nomarenta kon Yerusalem 11 notaong in koonggotnea. Sia in binaradosa kon i Tuhan Allahnea.

YEREMIA 16:4

Mosia in matoi kotugatan in yampoi in takit inta mokopatoi, bo mosia in matoi kon poparangan andeka matoi in gogoy. Diábí tobatúmai in intau in mongombaḷ andeka moḷobong kon i monia. Mayat monia in moirarit magí mako naonda bo pupuk kon butá, bo kaanon in ḷagapan bo mahaḷuk inta mokokaan kon tapú.

YEREMIA 16:6

Intau nooyúon bo nobogá kon butá tanaa in matoi bo diábí in moḷobong kon i monia. Diábí tobatúmai in intau in rumoriga andeka mokiḷogat in uḷunea saḷaku tomponuot nonogumatoi kon i monia.

YEREMIA 21:11

Ki Tuhan in nopotabá kon inakó nopotaau in koyow tanaa kon motoḷuadí in datu in Yohuda, buí i Daud: “Indongogai onu inta poguman-Ku, Akuoi, ki Tuhan. Poḷongasidon sinbá inta moadil in pobayá pomuḷoi in singgai. Poḷuatdon in intau inta umuran pogamáan in intau inta nongawasa kon inia. Aka diá, yo aid moraat inta inaidanmu mokotagab kon torú-Ku naonda bo tuḷú inta diá kopiongan.”

YEREMIA 22:10

Intau in Yohuda, dikadon monogumatoi sin kopatoian in Datu Yosia. Ombaḷaibí in ki Yoahas ki adínea ḷoḷaki sin sia in diniadon minayá bo diá bidon mobui mangoi. Butá kinolahirannea in diá bidon bui ontongonnea.

YEREMIA 22:12

Sia in matoibí kon pinoḷumbúan, bo diá bidon mokoontong kon butá tanaa.”

YEREMIA 34:5

táe matoibí takin motomoman. Bo ná doman onda in pinototubá in rayat kon kamania kon dodai in noḷobong kon mogoguyangmu inta nomarenta noiuna kon inimu, yo natua doman in rayat in motubá kon kamania kon inimu. Mosia in mononogumatoibí bo moguman, ‘Adodoia kaasí! Datu nami in diádon!’ Akuoi, ki Tuhan, ain nosingog.”

YEREMIA 36:30

Tuamai, Akuoi, ki Tuhan, noguman kon inimu, ei Datu Yoyakim, diábí tobatúmai in nongkon buímu in momarenta mobaḻí datu buí i Daud. Mayatmu in pogambatbí kon ḷuai, onagon in patú kon dodai in singgai, bo oḷú motumping kon dodai in doḷom.