YEREMIA 21:14 - Alkitab Singog In Mongondow Masa In Tanaa

¹⁴ táe Akuoi in mohukumbí kon inimu popisí in oaidmu. Komaḻigmu in turubonkubí, bo bayongan in yagi-yagi kon diugnea in mopokakbí doman. Akuoi, ki Tuhan, ain nosingog.”

YEREMIA 21:14 Mawu Ofanana

TAWARIKH 2 36:19

Sia in nogumpag kon dinding in kotá in Yerusalem, bo nonurub kon kotá tatua, takin doman Baḷoi Tuhan bo bayongan in komaḻig takin pakakat mita inta koboḻi inta kon bonupa in komaḻig mita tatua.

AMSAL 1:31

Tuamai, korasaanbí monimu in bungai in aidmu mita bo tomayámu mita inta moraat.

AMSAL 12:14

Batúan in intau mokouḻí kon tontuḻínea podudui in singog mita bo oaidnea; kon batúannea inogoian in boḻinea podudui in aidnea.

YESAYA 10:12

Táe ki Tuhan in noguman, “Aka inta aidan-Ku kon Buḷud in Sion bo Yerusalem tatua ain nopaḷut, Akuoi in mohukumbí kon datu in Asyur popisí in ḷoḷatú bo dodianea.”

YESAYA 10:16

Popisí in intau in Asyur ain dinumodia, ki Tuhan Inta Totok in mokawasa in mopoangoibí in yampoi in takit sin mohukum kon porwira mita inta mongotorindog. Mosia in ponikonbí in patú totok naonda bo tuḷú inta tantú momokak.

YESAYA 24:21

Kon dodai intua ki Tuhan in mohukumbí kon mongongawasa mita in ḷangit bo datu mita kon dunia.

YESAYA 37:24

Iko in nopotabá mangoi in totabá sin mosingog kon uboḷ kon podoyon kon kobayong in kereta in parangmu, iko in nokopotungkudon kon buḷud mita inta totok in moḷantud kon Libanon. Iko in dumodia kon iko in nomupuḷdon kon pangkoi mita in ḷokuyúnea inta totok in moḷantud bo inta totok in mogaga, bo irumudak doman kon kayuonnea mita inta totok in moromon.

YEREMIA 11:16

Nokoimontandon in Akuoi nonangoi kon i monia pangkoi in zaitun mobambar, nopuḻing in bungai in ayop inta mopia. Táe, tanaa takin singog in gotup inta motoyang turubon-Ku in daunnea mita bo putoḷon-Ku in bayongan in tanganea.

YEREMIA 11:22

Tuamai, ki Tuhan Inta Totok in mokawasa in noguman, “Akuoi in mohukumbí kon i monia! Intau mita moguod monia in matoibí kon parang, adí mita monia in matoibí in gogoy.

YEREMIA 17:10

Akuoi, ki Tuhan monaridi kon gina, bonu in dodob in intau ujion-Ku kon batúan in intau tuḻían-Ku podudui in dodianea, bo aidan-Ku podudui in oaidnea.”

YEREMIA 17:27

Bayongan intua in mobaḻíbí aka moiko motoḷutui kon i-Nakó bo mopotondí in Singgai in Sabat kon i-Nakó. Dika mogakut kon pakakat onuka bo tumaḻib kon bonawang mita in Yerusalem kon singgai tatua. Aka moiko ḻimimpat kon parenta-Ku mita tatua, bonawang mita in Yerusalem bo komaḻignea mita in daiton-Ku turubon tuḷú tatua in diábí kopiongan.’ ”

YEREMIA 22:1

Ki Tuhan in nopotabá kon inakó minayá in komaḻig i datu in Yohuda, buí i Daud, sin mopotaau in koyow i Tuhan kon i datu, bo kon pogawainea mita, takin intau in Yerusalem. Naa in tosingogon mita i Tuhan kon i monia,

YEREMIA 22:7

Potabá-Kubí mangoi in intau sin morimumud kon inia. Mosia in modiabí kon boḻiung, bo mogumpag kon oiginea mita inta mogaga inta pinomia nongkon kayu ḷokuyú in Libanon. Bo mosia in mopogambatbí intua kon bonu in tuḷú.

YEREMIA 32:19

Tomayá-Mu mita in motoyang, bo aid-Mu mita in mokoherang; Iko in nokoontong kon bayongan inta inaidan in intau, bo motuḻí kon i monia podudui in aid monia.

YEREMIA 46:23

bo monaḷun kon kayuon moromon inta diá motaau tuotan. Tontara in musung diá koiapan, mobaro-barongdon nongkon pangkoḷá. Akuoi, ki Tuhan in noguman.

YEREMIA 50:32

Bangusamu inta motosiḷantud in gina tua in moipintudbí bo moidompaḷak. Diábí tobatúmai in motuḷung kon inimu moposindog. Kotámu mita in turubon-Ku, bo bayongan inta kon diugneamai in payongon.”

YEREMIA 52:13

Ki Nebuzaradan in nonurub kon Baḷoi Tuhan, komaḻig in datu, bo baḷoi in bayongan intau inta tongganut mita kon Yerusalem.

YEREMIA 6:19

Taridiai, ei butá! Umat-Ku in doíbí motarima kon totundú-Ku bo diá motoindudui kon i-Nakó. Mobaḻí bungai in tomayá monia in popoangoi-Ku in inta mokororiga kon i monia.

YEREMIA 6:29

Poḷoḷoḷangan in nopatúdon totok, táe kotoran in logam diá doman moḷoḷayat bo moinggamá. Diá in mangaḻenea umat-Ku umuranbí tungkuḷan sin pomurnion, sin intaunea mita inta moraat diá iḷumbú.

YEREMIA 9:25

Ki Tuhan in noguman, “Moiangoibí in wakutunea Akuoi mohukum kon intau in Mesir, Yohuda, Edom, Amon, Moab, bo intau inta nogutun kon padang gurun inta nonggonsing in buoknea kinopoḷok. Mosia komintan in sinoit ná intau in Israel, táe pinomayá mosia andeka bangusa in Israel in nomia naonda bo intau mita inta diá sinoit, popisí in mosia diá motoindudui kon dodandian inta sinomponuotan in toit tua.”

OMBAḶ 2:3

Kon bonu in torúnea inta tumaga-tagab, ropot in Israel pinutoḷ-Nea. Kon wakutu in kita sinubu in ḷawang, mobogat in gina-Nea in motuḷung. Naonda bo tuḷú moborambang momokak kon bayongan in yagi-yaginea, natuata in ki Tuhan sinumorú kon i naton komintan.

YEHEZKIEL 21:3

kon Akuoi, ki Tuhan, in noguman nanaa, ‘Akuoi naa in musungmu. Rabuton-Kubí in kedang-Ku bo moḻimod kon i monimu komintan, inta moraat andeka inta mopia.

MIKHA 7:13

Táe butá in moḷogatbí popisí in aid moraat in intaunea mita.

ZAKHARIA 11:1

Ei Libanon, bukádon in ngaramu mita, sinbá tuḷú momokak kon pangkoi mita in arasmu!